Wopismo wobkruća kwalitu wudźěłka Rakečanskeho předewzaća
Rakecy (SN/MWj). Štóž w kuchni rady regionalne wudźěłki wužiwa, njenadeńdźe je jenož na najwšelakorišich wikach, ale hižo nimale štyri lěta tež w dworowym wobchodźe Gahnec swójby w Rakecach. Nimo wolijow z Lommatscha, žonopow z Budyšina, nudlow z Weinböhle a wjele dalšich žiwidłow poskićujetaj André Gahno a jeho mandźelska Antje tójšto produkty, w kotrychž předźěłujetaj swójski plahowany kobołk.
Najwjetši wotbytk mataj ze swojej korjeninowej měšeńcu za zeleninowu jušku. A runje za tónle wudźěłk dóstachu Gahnecy nětko złote wopismo Němskeje towaršnosće za ratarstwo. „Z tym so nam jenož njewobkrući, zo je to kwalitny produkt, ale zo maja tež jednotliwe přidawki wysoku kwalitu a zo juška z našeje měšeńcy derje słodźi“, je André Gahno z prawom hordy. Wopismo ma nětko čestne městno w Rakečanskim wobchodźe na Cyhelowym puću. Wone wobswědča, zo su wšitke přidawki ryzy přirodneho razu a bjez chemiskich přidawkow.
