Tež we Worklecach kermušowali
Za jězbu so přizjewić
Chrósćicy. Župa „Michał Hórnik“ přewjedźe 29. nowembra kubłansku jězbu do Drježdźan. Wotjězd budźe w 10 hodź. z Chrósćic. Na programje stejitej mj. dr. wodźenje po telewizijnym studiju Wuhladka a zetkanje z předsydstwom towarstwa „Stup dale“. Nimo toho budźe składnosć, wopytać adwentne wiki. Přinošk na wosobu je 15 eurow. Zastaranje płaći kóždy sam. Přizjewjenja přijimuja hač do 10. nowembra w Chróšćanskim regionalnym běrowje Domowiny pod telefonowym čisłom 035796 96254 abo e-mejlnje pod .
Dróha S 106 połnje zawrjena
Budyšin. Wot dźensnišeho wuporjedźeja bankety na dróze S 106 mjez Minakałom a Kamjenej. Tohodla je statna dróha hač do njedźele, 9. nowembra, połnje zawrjena. W tutym času su zamołwići wobjězdku zarjadowali: wot Kamjeneje na směr Wulka Dubrawa, wot Wulkeje Dubrawy na směr Klukš a wottam dale do Minakała. Wobjězdka płaći runje tak za napřećiwny směr. Busowe zastanišća mjez Minakałom a Kamjenej so za čas zawrjenja dale posłužuja.
Jednotliwe městna hišće maja
Z dźěćimi domchowanku swjećili
Policija (03.11.25)
Ćežke njezbožo
Wojerecy. 23lětny bě so sobotu ze swojim awtom na Kulowskej we Wojerecach njeznatemu zwěrjeću wuwinył. Při tym sprawa dróhi do štoma zrazy. Dokelž bě tak spěšnje po puću, suny so do dweju awtow na druhim boku dróhi a jej wobškodźi. Wodźer awta so při njezbožu ćežko zrani. Dohromady je wón wěcnu škodu 35 500 eurow naparał.
Z awtom do domskeho zrazył
Malešecy. Dokelž bě 38lětny ze swojim awtom w Malešecach do směra na Brězynu smalił, zrazy wón přez płót do sćěny domskeho. Škoda wučinja 35 000 eurow.
Budyšin zjednoćenstwu přistupił
Budyšin (SN). Tuchwilu eksistuje w Němskej wjace hač 50 tak mjenowanych nuzowych zwjazkow, w kotrychž so regionalne archiwy, biblioteki a muzeje zhromadnje na nuzowe situacije přihotuja. Woni wuměnjeja prawidłownje swoje nazhonjenja w zwisku z prewenciju tutych a w konkretnym padźe podpěruja so wzajomnje z personalom a materialom.
W lěće 2013 je biblioteka Wyšeje šule Žitawa/Zhorjelc Nuzowy zwjazk Hornja Łužica iniciěrowała, kotremuž přisłuša dźensa dohromady 16 zarjadnišćow w Budyšinje, Biskopicach, Zhorjelcu, Ochranowje, Kamjencu, Königshainje, Lubiju a Žitawje. Město Budyšin běše so najprjedy rozsudźiło, zo zwjazkej njepřistupi, dokelž njeběše tehdy w swójskich zarjadnišćach hišće dosć škitnych naprawow wudźěłało. To su zamołwići w poslednich lětach w kooperaciji z Budyskej wohnjowej woboru konsekwentnje změnili a tak zakład za čłonstwo w Nuzowym zwjazku Hornja Łužica połožili.
Spomóžne dochody w Hamorje
Radźićeljo financnu podpěru třoch zarjadnišćow w gmejnje wobzamknyli
Hamor (AK/SN). Komuna Hamor chce klětuše dochody ze zdobywanja miliny we fotowoltaikowych připrawach na teritoriju gmejny zmysłapołnje a zaměrnje zasadźić. K tomu su so gmejnscy radźićeljo na swojim oktoberskim posedźenju wuznali. Jednohłósnje wobzamknychu woni wužiwanje tutych dochodow w prěnim rjedźe za podpěru kupjele w Rychwałdźe, kotruž wobhospodarja tamniši wjesny klub Rychwałd z.t., za podpěru Łužiskeho parka błudźenkow we Wochozach kaž tež za šulerski prózdninski dom w Rychwałdźe. Naposledk mjenowanej zarjadnišći wobhospodarjeja wotpowědnej spěchowanskej towarstwje. Ewentualne njedosahace lětne dochody móže gmejna na tute wašnje wurunać, wo tym běchu sej radźićeljo přezjedni.
Stawiznu cyle zbliska sobu dožiwili
Chrósćicy (lmc/SN). Što činiš na šěrym, dešćojtym njedźelnišim popołdnju? Za Chróšćanow běše wotmołwa jasna: Wopyt předstajenja Němsko-Serbskeho ludoweho dźiwadła (NSLDź) „Won do swěta“. Po wuspěšnej prapremjerje w Radworju běše wčera tež wjacezaměrowa hala w Chrósćicach hač na poslednje městno pjelnjena. Za něhdźe 200 přihladowarjow su stólčki přistajić dyrbjeli.
Wosebje jónkrótne na inscenaciji režiserki Esther Undisz běše direktne zapřijeće přihladowarjow do stawizny wupućowanja stow łužiskich Serbow do ameriskeho Texasa. Tak předčitachu wopytowarjo na přikład lisćiny wupućowarjow za tydźenje trajacu mórsku jězbu na płachtaku Ben Nevis w lěće 1854. Z tym nasta jara realne začuće, jako by sam dźěl tuteje stawizny był.
Něhdźe 60 ludźi běše wčera popołdnju do Wjesneje hospody w ...
Krótkopowěsće (03.11.25)
Skóržba gmejny wotpokazana
Ústí nad Labem. Krajne sudnistwo w Ústí nad Labem je wotpokazało skóržbu gmejny Přestavlky, žadacu sej zběhnjenje přihotowaneje wysokospěšnostneje čary mjez Prahu a Drježdźanami. Natwar trasy słuša k wobchadnym prioritam čěskeho knježerstwa. Sudnistwo je w zwisku z projektom wysokospěšnostneho koridora hižo wjacore skóržby sewjeročěskich gmejnow wotpokazało.
Prěni Serb w Iraku
Erbil. Serbski wutrajnosportowc Stefan Möller ze Šunowa bě so minjeny pjatk jako prěni Serb w Iraku w měsće Erbil na mjezynarodnym běhanskim zarjadowanju wobdźělił. Šunowčan doběža jako 11. wot štyrista (3:6 h) na marathonowej distancy 42,195 kilometrow do cila.
DFB pokal wulosowany
Dortmund. Rekordny dobyćer FC Bayern Mnichow trjechi we wosmifinalu DFB-pokala na Union Berlin. Borussia Dortmund hraje doma přećiwo Bayer Leverkusenej. Zakitowar titula VfB Stuttgart dyrbi přećiwo druhemu ligistej VfL Bochumej nastupić. We wuchodnym duelu hrajetej spočatk decembra RB Lipsk a 1. FC Magdeburg.
