Njeswačidło (JK/SN). Oktoberske wobzamknjenje Njeswačanskeje gmejnskeje rady nastupajo hospodarski plan gmejny za lěće 2024 a 2025 su radźićeljo wčera zaso cofnyli. Přičina za to bě, zo je Budyski krajnoradny zarjad naćisk etata wotpokazał. Po jeho měnjenju njebě sadźba za postajenje zakładneho dawka kaž tež přemysłoweho dawka w etaće prawje planowana. Nimo toho zaruča chětro ­napjata financna hospodarska situacija gmejny spjelnjenje winowatostnych a dobrowólnych nadawkow jenož z jara wysokim kasowym kreditom. Rezerwow za njewočakowane naležnosće z tym žanych njeje. Pod tutymi wuměnjenjemi njemóžeše gmejnska rada nowemu na­ćiskej wustawkow za hospodarski plan přihłosować. Jenož dwaj radźićelej hło­sowaštaj za nowy naćisk a dźewjećo přećiwo njemu. Tak nima gmejna za lětsa a klětu tuchwilu žadyn hospodarski plan a zarjadnistwo gmejny njemóže po zakonju ani prawje dźěłać. Wjesnjanosta Gerd Schuster (CDU) bě wot wuslědka wothłosowanja chětro překwapjeny, ale akceptowaše rozsud.

Wulke twarske plany za pěstowarnju, hort a sportownju w Hamorje

Hamor (AK/SN). Hamorska gmejna prócuje so wo nowotwar komunalneje integratiwneje pěstowarnje „Bummi“, horta a sportownje. Wšitke tři maja na terenje šule nastać. Hromadźe ze zakładnej a wyšej šulu chcedźa tak kubłanski campus natwarić. Tole je předwčerawšim gmejnska rada Hamora rozsudźiła. Po prěnim trochowanju ma cyły projekt 17 milionow eurow płaćić. „Zwoprawdźić hodźi so to jeno ze spěchowanskimi srědkami“, podšmórny wjesnjanosta Hendryk Balko (Hamorske wolerske zjednoćenstwo). „Tuchwilu je ćežko dóstać spěchowanje za pěstowarnje abo za sport. Tohodla chcemy so wo spěcho­wanje we wobłuku strukturneje změny prócować“, tak wjesnjanosta.

Radwor (VaŽ/SN). Radworska dobrowólna wohnjowa wobora je minjenu sobotu swój rybarski swjedźeń – ewent, kotryž je hižo wjace hač 60 lět dołho pěstowana tradicija – woswjećiła. Kóžde lěto w nowembru zeńdu so aktiwni a něhdyši ­wobornicy-kameradźa z partnerkami na zhromadny wječork a mjezsobnu bjesadu kaž tež wuměnu nazhonjenjow. ­Dohromady ma Radworska wohnjowa ­wobora tuchwilu 31 aktiwnych čłonow. Nimale wšitcy běchu sobotu přišli a su sej słódny meni z třomi jědźemi zesłodźeć dali. Po prěnjej jědźi, serbskej kwasnej poliwce, podawaše kuchar Marko Sćapan łužiskeho praženeho karpa z běrnami, čerwjenym kałom a butru – a to wšo w bio-kwaliće. Sćěhowaše słódny dessert z jogurta, twaroha a čerwjeneje rěpy.

Bjezposrědnje pódla wohnjoweje wobory je hat, w kotrymž su w Radworju něhdy ryby plahowali. Před něhdźe 60 lětami wułójichu sej wohnjowi wobornicy tam prěni raz karpy za swój nazymski swjedźeń. To pak hižo 20 lět dołho nje­činja. Mjeztym sej karpy pola rybarjow w Rakecach wotewzaja. Swjedźeń wułójenja pak jako tradiciju dale pěstuja.