Wo fotowoltaice na gratowni wobory wobšěrnje diskutowali

Rakecy (JK/SN). Njewšědnje dołho za tamniše poměry je wčera posedźenje Rakečanskeje gmejnskeje rady trało. To pak njezaležeše jenož na poměrnje wobšěrnym dnjowym porjedźe, ale swědčeše skerje wo chutnosći, z kotrejž so gmejnska rada ze swojimi nadawkami zaběra.

Wobšěrnje diskutowachu wo přepo­daću nadawka za instalaciju fotowoltaikoweje připrawy na třěše nowotwara ­gratownje wohnjoweje wobory w Stróži. Fachowsce derje wobhonjeny radźićel Frank Glowik dwělowaše na tym, zo planowana připrawa stoprocentowsce funguje, dokelž ma jenož pjeć procentow nakłonjena być. Wjetše nakłonjenje třěchi statika njedowola. Předwidźane nakłonjenje pak zawinuje, zo so solarne module spěšnje womazaja a tuž po měnjenju Glowika předwidźany wukon njezměja.