Swjedźenski ćah k 800. róčnicy Kamjenca wjeršk jubileja był

Kamjenc (MČu/SN). Pisany swjedźenski ćah z tysacami přihladowarjow bě wčera dalši wjeršk 800. róčnicy Kamjenca. W něhdźe połdra kilometra dołhim ćahu ćehnješe 2 500 wobdźělnikow nimo syłow zahorjenych ludźi a zwobrazni we wjace hač 100 wobrazach stawizny kaž tež přitomnosć města. Ćah zahaji so ze zaćahom chorhojoweje skupiny, kiž sćěhowaše wyšeho měšćanostu Rolanda Dantza (njestronjan), kotryž njeseše staflowy kij „800 lět Kamjenc“. Tutón bě jako symbol zhromadnosće a zwjazanosće wot 18. meje 2025 po 18 gmejnach regiona pućował. Nimo wyšeho měšćanosty a zastupjerjow měšćanskeje rady ćehnješe tež kćenjowa kralowna Lucie I. po měsće.