Najebać špatne wjedro w Hodźiju kermušu woswjećili
Hodźij (CS/SN). Měsacy dołho hižo je organizatoriski team – skupinka dźesać Hodźijčanow – gmejnsku kermušu přihotowało a potom to: Zymne temperatury a dešć cyły kónc tydźenja! Na zbožo su wulki swjedźenski stan jako alternatiwu za planowane aktiwity pod hołym njebjom wužić móhli. A wězo su njedźelu tež wulku swjatočnu Božu mšu w Hodźijskej cyrkwi woswjećili – wšako je kermuša dźeń poswjećenja cyrkwje.
Zo je so telko aktiwitow najebać špatne wjedro publikumej tola poskićić móhło, na tym ma tež wulka ličba čestnohamtskich pomocnikow a sponsorow šwarny podźěl. Tak su pomocnicy na přikład dno stana z drjewowymi třěskami posypali, zo bychu so tute mokrotu nasrěbali. Wosadni su so wo nazymsku dekoraciju na swjedźenju postarali. W sportowni prezentowaše so tójšto lokalnych towarstwow, mjez nimi tež Domowina, třěšny zwjazk serbskich towarstwow. Julian Nyča, sobudźěłaćer projekta ZARI, syće za rewitalizaciju serbšćiny w nošerstwje Domowiny, je zajimowanych wo cilach projekta informował.
