Na temu „radiski wotdeleka“ w rozmołwje cyle rozdźělnje zhladowali

Wojerecy (SiR/SN). W předposlednim měsacu lěta křesćenjo wšelako na swojich zemrětych spominaja. Mjez druhim so w ramiku wosebitych nyšporow na kěrchowach rowy požohnuja, kaž minjene dny w Chrósćicach a Radworju. Smjerć a žarowanje běštej njedawno tež temje we Wojerowskej měšćanskej bibliotece.

Tam so wotbłyšćowaše, zo so bjeze wšeho zadani, wo smjerći rozmyslować a so takrjec na nju přihotować. Zarjadowanje wotměwaše so w ramiku hesła „Etika a literatura“ a nošeše trochu pro­wokantne napismo „Radiski wotdeleka – je wumrěće něšto rjaneho?“. We wote­wrjenej dźěłarničce za demokratiju pod nawodom Julije Kieschnick bě šeflěkar Wojerowskeho klinikuma Frank Dietrich z hosćom. Christian Völker-Kieschnick zarjadowanje moderěrowaše. Wjace hač třiceći zajimcow bě přichwatało, městna runje tak dosahachu.