Běła Woda (AK/SN). Něhdźe 50 000 hosći z cyłeho swěta jědźe wob lěto z Mužakowskej lěsnej železnicu. Jeje lokomotiwy a wagony jědu w kóždej sezonje něhdźe 13 000 kilometrow. Ze swojimi čarami wokoło Běłeje Wody, Mužakowa a Kromole kaž tež z wuhladnišćom na Ćežkej horje słuša železnica k wosebitym turistiskim atrakcijam Hornjeje Łužicy. „Chcemy něhdźe dźesać milionow eurow ze srědkow strukturneje změny inwestować a předewšěm kolije a infrastrukturu železnicy ponowić“, podšmórny jednaćel Max Mütze na zašłym posedźenju Běłowodźanskeje měšćanskeje rady. Hromadźe z techniskim nawodu Heikom Lichnokom poda wón dohlad do stawiznow a přitomnosće železnicy a rozłoži jeje přichodne projekty.
W prěnim wotrězku inwestuja wot lěta 2022 hač do klětušeho něhdźe 6,84 milionow eurow. „Z toho smy hižo něhdźe 4,5 milionow eurow přetrjebali“, tak jednaćel. Pozadk je, zo je so w zašłych lětach wjele reparaturow nakopiło. Mjez druhim ponowjeja kolije na dwórnišću na Hatowej dróze w Běłej Wodźe a wuhotuja přechody z digitalnej techniku.
