Z ansamblom Consonare na Tuchorskim pohrjebnišću spěwali

Budyšin (CS/SN). Bě to hižo třeće wječorne spěwanje, na kotrež je instrumentalny kruh Consonare ewangelskeje wosady swj. Pětra wutoru na Tuchorske pohrjebnišćo přeprosył. Něchtóžkuli by při tym hižo wo małej tradiciji rěčał. Dokelž bě so dopołdniši dešć zminył, móžachu wonka hudźić. A něhdźe 70 wopytowarjow njeda so wot nawodnicy ansambla Evelyn Fiebiger dołho prosyć.

Zahoriće ludźo sobu spěwachu, a to znate melodije runje tak kaž mjenje znate. Tež kanony derje zmištrowachu, samo tajke ze serbskim tekstom, na přikład „Ach wostań pola nas, so wječor přibližuje a dźeń je so hižo nachilił“. Tohorunja serbsce spěwachu z pomocu tekstoweho łopjena „Dobry wječor maćerka“. Evelyn Fiebiger skedźbni wopytowarjow na to, zo stejitej poslednjej štučce spěwa na narownym kamjenju serbskeho komponista Jana Rawpa, kotryž bě swoju žonu, organistku Lubinu Holanec-Rawpowu hižo w młodych lětach zhubił. Nimo toho je Fiebiger na Tuchorskim pohrjebnišću tři narowne kamjenje z notami našła.