Kamjenc (SN). Na wosebitu knižnu premjeru přihotuje so tele dny Kamjenska Klóšterska cyrkej swj. Hany. W dźensnišim sakralnym muzeju předstaja jutře wječor w 19 hodź. „Saksku klóštersku knihu“.

Před njecyłym połdra lětdźesatkom su dźěło na Sakskej klóšterskej knize zahajili a spočatk lěta zjawnje prezentowali. Za tři zwjazki wopřijace wudaće z Lipšćan­skeho uniwersitneho nakładnistwa trjebachu tójšto chwile, doniž je njedokónčichu. Wšako ma twórba nětko jako standard za wšitke srjedźowěkowske klóštry a wustawy po cyłym teritoriju swobodneho stata Sakska słužić. Zapřijeli su wuwzaćnje klóštraj w pólskim Lubanju. Z tym tematizuja wšitke města ­Hornjołužiskeho zwjazka šesćiměstow w tutej twórbje. ­Kamjencej wěnuja awtorojo dwaj wot­rězkaj. Wonej předstajitej wot Kamjenskich knjezow załoženy ­klóšter Marijina hwězda w Pančicach-Kukowje runje tak kaž klóšter swjateje Hany w Kamjencu na dźens­nišim Šulskim naměsće. Tónle přinošk je hłownje mě­šćanski archiwar Thomas Binder na­dźěłał.