Nic jenož na wsach, ale tež w městach maja mnozy doma skót. Něchtóžkuli nimo toho drobny skót plahuje. Wšitcy so wo strowotu swojich lubuškow ­prócuja. K tomu ­přinošować chce naša serija z pokiwami z weterinarneje ­mediciny. (57)

Někotryžkuli znaje serbske prajidmo: Štóž chce lěćo měć, dyrbi šmicy znjesć. Kóždy z nas znaje swjerbjace blaki na koži, kotrež po cycanju kreje přez kuntwory nastanu.

Tež domjacy skót njeje před tym škitany. Najhórje pak su konje potrjechene, kotrež pod tak mjenowanym lěćnym ekcemom ćerpja.

Ekcem je fachowy wuraz za skupinu wšelakich schorjenjow kože, kotrež móža so po cyłym ćěle jewić. Husto rěči so tež wo zahorjenju kože, kotrež pokazuje so we wšelakich formach, kaž na př. čerwjenjenju kože, wutworjenju pucherkow (Pusteln), trupow (Krusten) abo šupiznow.

Často přewodźuje proces změnow kože tež sylne swjerbjenje.