Hač do soboty traje 28. Łužiska rallye při Bjerwałdskim jězoru
Hamor (AK/SN). Mjeztym 28. raz přewjedu wot dźensnišeho hač do soboty mjezynarodnu Łužisku rallye ADMV. Na njej startuje 90 skupin z 13 krajow, mjez druhim z Pólskeje, Čěskeje, Madźarskeje, Turkowskeje a samo z Nowoseelandskeje. Nimo nazhonitych pilotow startuje tež tójšto młodych jězdźerjow, praji Bastian Hartmann, nowinski rěčnik Rallyejoweho a wodosportoweho kluba Łužica. Wón z 500 čestnohamtskimi pomocnikami podawk organizuje. Łužiska rallye je najwažniša rallye na šćerku po wšej Europje. Na cyłkownej čarje 155 kilometrow je dźesać pruwowanjow.
