Wojerecy (KD/SN). Na wšěch 145 instrumentalistow a spěwarjow z Budyskeho a Zhorjelskeho wokrjesa wobdźěli so jutře a njedźelu na mjeztym 35. wubědźowanju „Młodźina hudźi“. Wone so we Wojerowskej hudźbnej šuli a w tamnišim Lessingowym gymnaziju wotměje. Dobyćerjo pojědu na krajne wubědźowanje do Šwikawy (Zwickau). Swój wosebity koncert změja dobyćerjo 31. januara w awli Wojerowskeho Lessingoweho gymnazija. Zastup za wšitke zarjadowanja we wobłuku „Młodźina hudźi“ je darmotny.

Mjez wobdźělnikami zajutřišim w awli gymnazija budźe fagotowy kwartet hudźbneho wučerja Kaija Bretschneidera. Dwě holcy a dwaj hólcaj wuknu na swojim instrumenće mjeztym połtřeća hač do štyrjoch lět. Bydla w Jitru, Wulkich Zdźarach a Kulowje a so na swojej zakładnej šuli na wučbje serbšćiny wobdźěleja. „Zahudźimy na wubědźowanju dwě pěsni. Jedna je ‚Dobry wječor maćerka‘“, powěda Anna Kaiserec. Na tutu melodiju wosomlětna tež w Židźinskej dźěćacej rejwanskej skupinje rejuje.