W Domowinskej skupinje Pančicy-Kukow ma tež w přichodźe wotměnjawe žiwjenje knježić. Za to su wčera na hłownej a wólbnej zhromadźiznje nowe předsydstwo wuzwolili.

Pančicy-Kukow (SN/MWj). Z trójnej sławu a darom ze serbskim napisom dźakowachu so čłonojo Domowinskeje skupiny Pančicy-Kukow wčera na hłownej a wólbnej zhromadźiznje w farskej wikariji Pětrej Korjeńkej za jeho skutkowanje jako předsyda. Po dźesać lětach je wón tule funkciju złožił. Dale dźakowachu so Marjanje Koklic za wjelelětne dźěło w předsydstwje a Bernadźe Wowčerkowej za to, zo je 23 lět Serbskemu rozhłosej njedźelne zbožopřeća posrědkowała.