Přehladka fotow Rolfa Dvoraceka w Muzeju Budyšin wotewrjena

Budyšin (CS/SN). Wustajeńcu z fotografijemi Rolfa Dvoraceka su minjenu sobotu w Budyskim měšćanskim muzeju wotewrěli. Fotowy reporter bě w aprylu swoje 90. narodniny swjećił. Kabinetna přehladka pokaza nimale 60 fotografiske twórby. Te bě Rolf Dvoracek ze staty­sacow negatiwow wupytał, kotrež je ­we wjele lětach swojeho powołanskeho žiwje­nja wobswětlił. Cyle wědomje ­koncentrowaše so při tym na motiwy ­zwonka reportažowych fotografijow. Čorno-běłe wobrazy pokazaja zwjetša napohlady jeho ródneho města Budyšina, krajinowe wobrazy z wokoliny a portrety. Mjez nimi su tež wobrazaj Jurja Brězana a Měrćina Nowaka Njechorńskeho. Wobrazy nastachu w času wot 1960 do 1980.

Wyši měšćanosta Karsten Vogt rjekny, zo su tele wobrazy stawizniske pom­niki. Tež jako je Budyske stare město dźeń a bóle rozpadało, je Dvoracek ­stajnje rjanosće města widźał a je za­popadnył.