Čorny Chołmc (SN/MiR). Program lětušeje domchowanki w Krabatowym młynje w Čornym Chołmcu běše kónc tydźenja zwjetša serbski. Hižo pjatk popołdnju bě skupina Popsorben něhdźe tysac ludźi před jewišćom přiwabiło. „Nam je ­jara wažne měć serbske skupiny na našich zarjadowanjach“, rjekny zamołwita za zjawnostne dźěło w młynje Susann Wuschko. „Wosebje wjeselimy so nad młodymi Serbami a jich poskitkom.“

Sobotu dopołdnja zahaji dujerski orchester z Wjelceje pisany program pod hołym njebjom. Rejwarki a rejowarjo Serbskeho folklorneho ansambla Wudwor z nazhonitej a z dorostowej skupinu kaž tež muska skupina Přezpólni w bróžni publikum překwapichu. Leandra ­Nowakec a Helena Smolic wjedźeštej ­prěni króć po programje Wudworčanow. Jan Brězan-Hejduška a Weronika Kalinučcyna so na to ze spěwanymi a zhudźbnjenymi­ baladami w bróžni wo wobkuzłacu naladu postarałoj. Na to wuprudźeše Sunshine-orchester dobru naladu.