Wot lěta 2002 je so na Budyskej Tuchorskej městno wuwiwało, hdźež móža so dźěći a młodostni do swěta přirodowych wědomosćow, techniki a rjemjesła zanurić. Kónc lěta je z tym kónc.

Budyšin (UM/SN). Stawizny Budyskeho Zuseuma su wusko zwjazane z Andreasom Samuelom. 65lětny inženjer a wjelelětny wučer na Schillerowym gymnaziju je so hižo stajnje za stawizny informatiki a za skutkowanje Konrada Zuseho zajimował. Za to je tež swojich šulerjow zahorił. Lěta 2002 su na šuli swójski muzej informatiki planować započeli. W februaru 2003 su jón na Tuchorskej zało­žili. „Spočatnje dźěše jenož wo to, z muzejom na Konrada Zuseho dopominać. W běhu časa pak su so přeco wjace dźěłowe zjednoćenstwa wutworili, mjez druhim za keramiku, elektroniku a mode­lo­twar. Samo ličenske mašiny, kajkež běchu za čas Zuseho wužiwali, tam nastawachu“, Samuel powěda.