Pančicy-Kukow (SN/MWj). Nic kaž w minjenych lětach na Kukowskim hrodźišću, ale w komunikaciskej arenje na ležownosći bywšeho hosćenca wosrjedź wsy wotměje so njedźelu, 23. awgusta, wot 14 hodź. swjedźeń za dźěći a swójby, kotryž wuhotuje tamniša Domowinska skupina. Ju podpěruje wjesny młodźinski klub, kiž stara so wo napoje a pražene kołbaski. We wobłuku swjedźenja prezentuje Pančičansko-Kukowska dobrowólna wohnjowa wobora swoju historisku sykawu, a to prěni raz w nowych historiskich­ drastach. Wopytowarjo dožiwja, kak sykawa funguje a smědźa so tež sami při jeje posłužowanju pospytać móc. Dale wotwjeduje Michał Cyž ze Studija Lucija zajimcow na dyrdomdej do wirtuelnych swětow. Nimo toho budu so dźěći móc šminkować dać a dožiwja, kak z powětrowych balonow najwšelakoriše figury nastanu. Wjeršk a zakónčenje wuhotuje dźěćacy chór Lipki, kiž předstaji wurězki ze swojeho aktualneho programa. Domowinska skupina poskićuje kofej, samopječeny tykanc a šmałcowe pomazki.