Nosaćicy (WL/SN). 180 wobydlerjow ličaca wjeska Nosaćicy (Nostitz), kotraž městu Wósporkej přisłuša, je wot minjeneho kónca tydźenja wo zajimawosć bohatša. Tam steji nětko wopomnjenska tafla za fararja a wědomostnika Hadama Bohuchwała Šěracha. Z wjele prócu je so čłon wjesneje rady Andreas Seibt hromadźe z wjesnym domizniskim towarstwom za taflu angažował. Njedawno su ju w přitomnosći mnohich wobydlerjow a hosći wotkryli.

W swojej lawdaciji wobswětlowaše Andreas Seibt žiwjenski skutk Šěracha, kotryž je so bytostnje za wuwiće serbskeje rěče a moderneje wědomosće wo pčołkach zasadźował. „Z prawom mjenujemy Šěracha załožerja moderneho pčołarstwa w Europje“, Seibt wuzběhny. „A tale wuznamna wosobina pochadźa z Nosaćic, hdźež je so 5. septembra 1724 narodźił.“