Budyšin (SN/bn). Wokrjesna hudźbna šula Budyšin je składnostnje zakónčenja šulskeho lěta 2024/2025 pozitiwnu bilancu wozjewiła. Spočatk junija su sej wjacori šulerjo, mjenujcy duwo Constanze Moser (trompeta) a Anne Beykirch (klawěr) kaž tež Vinzenz Reiche (saksofon) a In Hu No (klawěr) na Zwjazkowym wubědźowanju Młodźina hudźi wuběrne druhe městna ze stajnje 22 dypkami zdobyli. Hižo wjele lět sćele hudźbna šula swojich chowancow na w lěće 1964 zahajene wurisanje, na kotrymž měrja so z najlěpšimi dorostowymi instrumentalistami z cyłeje Němskeje. „Smy njesměrnje hordźi na to, zo su naši šulerjo tež lětsa zaso tajke wusahowace hódnoćenja docpěli“, podšmórnje nawodnica kubłanišća Camilla Jende a zjima: „Gratulujemy jim kaž tež jich wučerjam wutrobnje k jich wuspěcham, kotrež mamy za dopokaz našeho wulce profesionelneho dźěła.“ Zwjazkowe wubědźowanje je po swójskim podaću sobu najbóle renoměrowana naprawa, namakać a spěchować hudźbne talenty.