Budyšin (SN/bn). Składnostnje 125. narodninow Měrćina Nowaka-Njechorńskeho je župa „Jan Arnošt Smoler“ wčera wopominanske zarjadowanje w Budyskim Serbskim domje wuhotowało. Něhdźe 25 zajimcow powitawši předstaji županka Leńka Thomasowa jubilara jako „jednu z najwuznamnišich serbskich wosobinow 20. lětstotka“ a „załožerja serbskeho molerstwa. Kóždemu dźěsću běchu – znajmjeńša hač do politiskeho přewróta w lěće 1989 – jeho wobrazy, kniha ‚Mišter Krabat‘ a ilustrowane bajki kaž ‚Baćon a žaby‘ znate.“ Lipowe łopješko, kotrež sta so ze signaturu Nowaka, je dźensa takrjec ze synonymom serbskeho wuměłstwa. Sam wšak njeby so wón ani moler ani spisowaćel mjenował, ale po słowach Thomasoweje skerje „pisacy moler abo molowacy pisarski“. Charakteristisce běchu jeho „skromnosć, humor a wuběrna serbšćina“.