Berlin. Serbska dujerska kapała Horjany k repertoirej „Zeleneho tydźenja“ w Berlinje słuša. Zawčerawšim je so bus z dujerjemi a z fanami kapały do Berlina na najwjetše wiki swěta za zežiwjenje, ratarstwo a zahrodnistwo podał. Na jewišću Sakskeje hale zahudźichu Horjenjo potom w běhu dnja trójce 45 mjeńšinow a reprezentowachu tak z ćěłom a dušu serbske pěsnički, čěske štučki, naročne morawske pólki a znate němske hity ze šěrokeho repertoira. Hižo wot prěnjeho titula knježeše wulkotna nalada, jako tam kołowokoło jewišća syła přihladowarjow pozasta a temperamentnej hudźbje připosłuchaše. Čłonojo rejowanskeje skupiny ze Židźinoho a mnoho přihladowarjo njedachu so dołho do rejki prosyć a zarejowachu mjez druhim tež „Hanamarju“. Uwe Macka, trompetar a spěwar wjedźeše suwerenje po programje a zamó stajnje zaso na lóštne a zajimawe wašnje přihladowanjow „popadnyć“. Přewšo znaty „Šumawski són“ publikum runje tak putaše, kaž hit spěwarja Maxa Raabe „Perfektny moment“.

Budyšin (SN/bn). Składnostnje stotych posmjertninow Jakuba Skale su Maćica Serbska (MS), Towarstwo Cyrila a Metoda (TCM) a katolska wosada swj. Pětra wčera wuznamneho duchowneho, publicista a narodneho prócowarja wopominali. We wobłuku nyšpora w Budyskej tachantskej cyrkwi zjimaše farar Wito Sćapan žiwjenski skutk Skale, kiž bě „čas žiwjenja­ našemu ludej a krajej słužił – k Božej česći a nam k wužitku“. Předsyda TCM Cyril Hančik poda biografiski zarys Skale, mjenujo jeho „njewšědnje pilneho, woporniweho a přećelneho čłowjeka, kiž je sej ze swojej swěrnej a wutrajnej lubosću serbskemu ludej sam trajacy pomnik stajił“. Mjez druhim wuzběhny zasłužby Skale jako japoštołski administrator nowozałoženeho biskopstwa Drježdźany-Mišno, redaktora časopisow Krajan a Katolski Posoł kaž tež jako přełožowarja Noweho zakonja do hornjoserbšćiny a nic naposledk jako předsyda TCM. „Njech su nam jeho njesebične skutki njezapomnite a z pohonom“, Hančik reziměrowaše.