„Mały Pampuch“ rěka lětuša produkcija baleta SLA. Režiserej a choreografej so radźi poměrnje jednory libreto do dosć solidneho krucha splesć. Hudźba a wuhotowanje tworitej k tomu hodźacy so ramik.

To wona potajkim je – nowa produkcija baleta Serbskeho ludoweho ansambla w aktualnej hrajnej dobje. Zo je to bajka za dźěći, je runje prawa ideja, wšako ma SLA na jewišću tež zajimy najmłódšich wobkedźbować. Zašłe lěta drje bě wosebje dźěćacy ptači kwas, kotryž balet kóžde druhe lěto wuhotuje, wjeršk za młody publikum. „Mały pampuch“ je lětsa přidatny poskitk, kotryž je za dźěći runje to prawe. Kruch z pjera Wórše Wićazoweje drje mnozy znaja a tuž njezadźiwa, zo je přihladowarstwo přeco zaso wo nim zahorjene. Wězo je młody publikum stajnje dźakowny publikum, a to wosebje, hdyž je keklija na jewišću pisana a lóštna. Tole je so režiserej Jurajej Šisce derje radźiło. Wón wě jasne choreografiske a sceniske wobrazy komponować. Při tym pak so ženje přewjele njestawa, tak zo zamóža młódši a najmłódši jednanje derje sćěhować.

Budyšin (SN/bn). Chór 1. serbskeje kulturneje brigady wuhotuje sobotu do třećeho adwenta swój tradicionalny dohodowny koncert w Budyskej Marije Marćinej cyrkwi. Program wopřijima mjez druhim wurězki z oratorija „Zyma“ Handrija Zejlerja a Korle Awgusta Kocora, „Adwentnu kantatu“ młodeho serbskeho komponista Feliksa Brojera kaž tež překwapjence. Judit Kubicec, kotraž chór diriguje­ a cyłkowny hudźbny nawod koncerta zamołwja, připowědźi přinoški w hornjo- a delnjoserbšćinje, francošćinje kaž tež „w najbóle mjezynarodnej rěči, mjenujcy instrumentalnje“.

„Mały pampuch“ rěka muzikaliska ­rejowana bajka, kotruž Serbski ludowy ansambl tuchwilu na wšelakich městnach a we wjacorych rěčach předstaja. Zašłu sobotu předstajichu kruch na ­oficialnej hornjoserbskej premjerje w Chrósćicach.

Chrósćicy (SN/MG). Krótko do hornjoserbskeje premjery „Małeho pampucha“ knježi w Chróšćanskej „Jednoće“ wulki hołk a tołk. Dźěći, kiž su z nanom, maćerju, dźědom abo wowku přichwatali, so wočiwidnje njemało na kruch wjesela. Jako so swěca hasnje, je w žurli naraz ćicho. Wšitcy hladaja napjeći na jewišćo. Hłowna akterka Božena Bjaršec pak přińdźe přez zadnje durje na žurlu. Jako kocor ­wona po rejowanej bajce wjedźe. Spěwajo a powědajo zbliži přihladowarkam a přihladowarjam rejowane jednanje. Te je spěšnje powědane: W kuchni pjeku pjekarjo wulki pampuch. Skradźu pak sej tež mały napjeku. Tutón mały pampuch pućuje zhromadnje z kocorom po swěće. Po puću sej wot tych, kotrychž zetka, rady něšto k jědźi wuproša, tak zo je naposledk runje tak wulki kaž tamny pampuch.