Narodźi so 14. junija 1874 jako syn wučerja w Chwaćicach. 1898 bě hłowny starši 24. schadźowanki. Po studiju w Lipsku poda so do wyšeje šulskeje słužby, 1903 dósta přistajenje na nowozałoženym wučerskim seminarje w rudnohórskim Stollbergu. Z 45 lětami pytaše zaso wuši zwisk ze serbskim žiwjenjom a rowjenkami. Na zeńdźenju Maćicy Serbskeje 1922 překwapi z nowym zhladowanjom na serbske kulturne stawizny – na Ochranowske hibanje a ludowych basnikow. Wjele lět hižo studowaše časopisy 18. a 19. lětstotka a měješe nětko wotmysł, spisać načasne serbske literarne stawizny. 1923 dowěri jemu Maćica redakciju protyki „Předźenak“. Wuwi ju k ludowej čitance z regionalnym charakterom a wopokaza so při tym jako dobry spisowaćel. Na próstwu Arnošta Muki přewza 1926 tež hišće redakciju „Łužicy“ a po tym Maćičneho časopisa. W nimaj wozjewi studije, kotrež buchu z wažnym přinoškom za 1. dźěl „Stawiznow serbskeho pismowstwa“ (R. Jenč, 1954). W 1930tych lětach přihotowaše studiju „Handrij Zejler als Fabeldichter“, kotruž 1950 k monografiji „Handrij Zejler a jeho doba“ rozšěri. Hdyž kniha 1955 wuńdźe, to hižo njedožiwi. Zemrě 28. nowembra 1952 w Stollbergu. Franc Šěn

Wosebita wustajeńca portretuje wuměłca Otta Sandera Tischbeina

„OST w Kamjencu – Ćišćane a molerstwo na papjerje a płatnje“ rěka nowa wustajeńca w Słodownicy w Kamjencu, kotruž wuhotowa tamniši Lessingowy muzej zhromadnje z Centrumom za recepciju Lessinga na česć 75. narodnin grafikarja a molerja Otta Sandera Tischbeina. Otto Sander, kiž narodźi so 1949, potajkim w lěće załoženja wobeju němskeju statow, je we wšitkich wjetšich wustajeńcach Němskeje demokratiskeje republiki a dźensa po cyłej Němskej zastupjeny. Jeho duchapołne wobrazy, kotrež noša wosebity akronym – OST –, su połne fantazije kaž tež humora a přiwšěm chutne roze­stajenja ze žiwjenskej realitu. Znaći, kiž jeho lěćne dźěłarnički wopytuja, tole tež wo jeho wosobinje powědaja. Tak stupi so wón na přikład na wotewrjenju wustajeńcy w Kamjencu w swojim molerskim kitlu a kłobuku na hečku a deklarowaše powitanski tekst z papjerjaneje rólki, ju pomału rozwiwajo.

Budyšin (SN/bn). Němsko-Serbske ludowe dźiwadło je w nachilacej so, jubilejnej hrajnej dobje 2023/2024 dohromady něhdźe 7 000 wopytowarjow na swojich zarjadowanjach ze serbskim aspektom zličiło. Najwuspěšniša inscenacija bě prapremjernje na hłownym jewišću předstajena hra „Na tamnym boku měsačka – Hercy“, kotruž je sej něhdźe 1 700 zajimcow wobhladało – nowy rekord to za časo po přewróće lěta 1989. Dwurěčny kruch „Schierzens Hanka“ přiwabi dotal nimale 2 000 přihladowarjow. Na pjeć předstajenjach delnjoserbskeje produkcije „Smjerś po štuckach“ zličichu něhdźe 300 wopytowarjow.

Ze zakónčenjom sezony rozžohnuja so wjacori sobudźěłaćerjo NSLDź z jewišćom. Tak „podatej so dramaturgowka a zastupjerka intendanta za serbske dźiwadło Madleńka Šołćic kaž tež zamołwita za serbski marketing Anna Měrćinowa do noweho dźěłoweho wobłuka“. Hrajerka a nawodnica Dźěćaceho dźiwadła Petra-Marija Bulankec-Wencelowa a wuhotowar jewišćow Mirosław Nowotny hotujetaj so na wuměnk, chcetaj pak instituciji jako hosćej swěrnaj wostać. Serbsku dramaturgiju zamołwja wot přichodneje hrajneje doby Hanka Jenčec.

Nic prěni raz bě znaty dźiwadźelnik Roman Knižka, narodźeny w Budyšinje, z hosćom wopomnišća sprjewineho města. A kóždy raz zamóže publikum znowa putać. „Ich wand’re durch Theresienstadt“ rěka program, kotryž wón tónraz, přewodźany wot dujerskeho kwinteta Opus 45, předstaji. Su to hłownje dopomnjenki dźěći, kotrež hrózbu kaceta Theresienstadt do- a přežiwichu. Přez subtilne předstajenje dźiwadźelnika nastawaja wobrazy před wočomaj wopytowarjow, kotřiž w bjezdychnej ćišinje po­dawki předźěłaja. Druhdy dosaha jenička njedokónčena sada, zo by připosłucharjam to njewuprajomne dale myslić dał. Z wočimi dźěći, kotrež dyrbja ćěła „zrumować“ a dožiwić, kak dalši transport do Auschwitza wotjědźe, sposrědkuje so publikumej wobraz wo kaceće, kajkiž woprawdźe bě – wšako bě so tónle často jako „lěhwo na pokazku“ („Vorzeigeeinrichtung“) předstajił. Nacije złahodnjachu tamniše podawki a wutworichu samo komisiji Mjezynarodneho čerwjeneho křiža pječa njestrašny wudawany swět.