Towarstwo Verein(t) für Wittichenau prezentuje póndźelu, 18. ...
Zahaja tydźeń komorneje hudźby
Hornjołužiski komornohudźbny swjedźeń je wot lěta 2020 z krutym wobstatkom kulturneho kalendra a słuša mjeztym k etablěrowanym koncertnym rjadam regiona. Lětsa čaka dohromady dźewjeć zarjadowanjow z cyłkownje něhdźe 100 hudźbnikami na přećelow w małej formje zanjesenych zynkow.
Zhorjelc (SN/bn). Zazběh festiwala twori koncert renoměrowanych Drježdźanskich kapałnych solistow jutře, pjatk, w Bartskej cyrkwi. Pod nawodom Helmuta Brannyja a ze solistku Serafinu Jaffé na harfje zaklinča twórby mjez druhim Wolfganga Amadeusa Mozarta, Antonija Vivaldija a Georga Phillipa Telemanna. Zajutřišim slěduje w parku Hrodźišćanskeho hrodu darmotny a w kooperaciji z projektom Wuměłstwowy bus zwoprawdźeny koncert za swójby. Pod hołym njebjom předstaja bigband Klangfarben a chowancy štyrjoch hornjołužiskich hudźbnych šulow dujersku hudźbu.
Jěducy z wuměłstwom k wuměłstwu
Projekt Wuměłstwowy bus spřistupnja lětsa mjeztym jědnaty króć kulturu jěducy po Hornjej Łužicy. Tónraz wopřijima čara stacije na juhowuchodźe a wuchodźe regiona; serbski podźěl programa runja so poskitkam minjeneju lět.
Zhorjelc (SN/bn). Wuchadźišćo hłowneje linije je hród Zinzendorfa w Bartomjecach (Berthelsdorf). W hodźinskim rytmusu pojědźe bus sobotu, 16. awgusta, dohromady 16 a slědowacu njedźelu 15 króć wottam přez Ochranow, Lubij a Rychbach k Hrodźišćanskemu hrodej. Na jednotliwych stacijach čakaja na přikład wodźenja, dźěłarnički a kulinariske chłóšćenki na zajimcow. W Bartromjecach a Lubiju spřistupnjeja wosebite wustajeńcy mjez druhim z twórbami Dietmara Wapplera. Michaele Spank abo Strawaldeho. Na hrodźe Zinzendorfa prezentuja nimo toho dokumentarny film „Schutt – Scherben – Aufbau“ wo saněrowanju twarskeho ansambla na ležownosći.
Sep prapremjerow, nowe formaty a abonementy w SLA
Serbski ludowy ansambl hotuje so na hrajnu dobu 2025/2026. We wobłuku nowinarskeje rozmołwy předstajichu wčera w Röhrschedtowej bašće wjerški hrajneho plana a informowachu wo stawje nastupajo personal kaž tež wo nadal napjatym połoženju hladajo na financy.
Pasion: Probuja pod hołym njebjom
Šanson, soul a pop w třoch rěčach
Wo knihach a kniharni (08.08.25)
Na blidźe w Smolerjec kniharni leža knižne nowinki tutoho lěća. Chcu Wam tu abo tamnu nowinku doporučić.
Handrij Nowak předpołoži w publikaciji „Bjarnat Nowak. Štó da sym? Bernhard Noack. Wer in ich?“ dopomnjenki swojeho nana. Chcemy w Smolerjec kniharni štwórtk, 21. awgusta, w 19 hodź. na lětuše 100. posmjertne narodniny Bjarnata Nowaka spominać.
W Kamjenskim Muzeju zapadneje Łužicy prezentuje so tuchwilu wosebita wustajeńca „800 lět přiwěra a magija“. Katalog k njej je poměrnje wobšěrny. Mjez awtorkami a awtorami su tež serbscy: dr. Susanne Hozyna ze Serbskeho instituta a Andrea Pawlikowa a Alexander Pólk ze Serbskeho muzeja.
Štóž chce so po literarnej šćežce na puć do Delnjeje Šleskeje podać, móže to z knihu Roswithy Schieb „Niederschlesien. Literarischer Reiseführer“ činić. Mjez wjele druhimi spisowaćelemi je tam serbska awtorka Marja Młynkowa ze swojim romanom „Dny w dalinje“ naspomnjena.
Emocionalna inscenacija portretuje Łužicu w změnje
Grodk (mjk/NC). Premjera inscenacije „Mója wěc jo AKO ju lapjom – Meine Sache ist WIE ich sie fange“ tworješe minjeny pjatk zazběh noweho štyrilětneho rjadu kulturnych zarjadowanjow we Łužicy, kotrež maja „kulturnej mnohotnosći widźomnosć spožčeć, přisłušnosć skrućić a strukturnu změnu nic jenož technisce, ale tež wuměłsce a emocionalnje posrědkować a z tym zapřimliwe činić“. Nošer projekta je powšitkownowužitna towaršnosć Lausitziade, partnerojo su mjez druhim Nowe jewišćo Zły Komorow, Grodkowske Sprjewine kino a kampanja Krasse Lausitz.
Wjesołe zynki, chutne temy
Festiwal elektroniskeje hudźby z towaršnostno-politiskim podźělom
Miłoćicy (SN/bn). Festiwal Meta Solis je minjeny kónc tydźenja něhdźe 400 wopytowarjow k Miłočanskej skale přiwabił. Mjeztym sedmy raz wot towarstwa ze samsnym mjenom wuhotowane zarjadowanje pod hołym njebjom zahajichu Uta Šwejdźic kaž tež André a Michał Měrćink ze „za techno-festiwal skerje njewšědnej“ performance, w kotrejž předstajichu wuslědk dźěłarnički „Swobodne spěwanje w raju Krabata“ předchadźaceho festiwala Witaj. Z dohromady šěsć minimalistiskimi spěwami wotbłyšćowaše projektowy chór, kotryž bu w běhu prezentacije přiběrajcy wot publikuma podpěrany, wuswobodźenje drje najznaćišeje figury serbskeje mytologije z putow Čorneho młynka. Zakład tworješe powědančko Hendricha Jordana „Koklaŕski“, kotrež zhudźbnichu z powědarskeje perspektiwy kantorki Maruše. Wustup wudospołnichu widejowe projekcije, kiž běchu z pomocu kumštneje inteligency zhotowjene a zestajane. Performance bu awdiowizuelneje nahrawana a ma so přichodnje online spřistupnić.
