W Ketlicach pola Lubija zemrě 19. róžownika 1904 prěni wulki hudźbny mišter Serbow, wučer, kantor a dirigent Korla Awgust Kocor. Wón bu na tamnišim kěrchowje při jeho južnej muri pódla swojich přiwuznych pochowany a měješe najprjedy jenož němskorěčnu narownu taflu. Kónc dwacetych lět 20. lětstotka bu serbska tafla připrawjena a narowny pomnik wjacekróć wu­dospołnjeny, mjez druhim najdostojnišo k III. festiwalej serbskeje kultury 1972. Na tafli narowneho pomnika čitamy kaž hižo nimale sto lět „Korla Awgust Kocor 1822–1904 Serbow hudźbnik“ a wuhladamy jeho portret.

Zhorjelc/Budyšin (SN/MiR). Lětuši 21. Nysowy filmowy festiwal (NFF) je so minjenu sobotu we Wulkich Hendrichecach blisko Zhorjelca zakónčił. Ze zašłeje wutory bu na tři kraje ze sobu zwjazowacym swjedźenju něhdźe 90 hrajnych, dokumentarnych a krótkofilmow w Němskej, Pólskej a Čěskej pokazanych.

Smochćicy (SN/bn). Kubłanišćo swj. Bena a Serbski ludowy ansambl wuhotujetej Smochčanski hudźbny swjedźeń pod hołym njebjom lětsa pod hesłom „Słowakskej nocy“. Nawoda kubłanišća Sebastian Kieslich podšmórny na wčerawšej nowinarskej rozmołwje, zo „słuša swjedźeń ze stajnje 800 do 900 wopytowarjemi k wjerškam zarjadowanjow, kajkež tule wotměwamy. Hač na termin – zažnych lětnich prózdnin dla lětsa hižo 14. a 15. junija – organizujemy jón na zwučene wašnje. Nimo kulturneho programa poskićimy tuž znowa hodźace so kulinariske speciality. Tak smědźa so hosćo na bryndzové halušky a fazuľovu polievku (běrnjace knedlički z twarožkom a połćom resp. bunjaca poliwka – přispomnjenje redakcije) wjeselić.“ Dale přeproša Kieslich na „swjedźeń slědowacu njedźelu za swójby, z kotrejž woswjećimy zdobom swj. Bena“.