Chrósćicy (SN/CoR). Tajka čiła drje tradicionalna literarna kermuša Ludoweho nakładnistwa Domowiny w minjenych lětach njebě kaž wčerawša 23. w Chrósćicach. A to zaležeše předewšěm na wulkim podźělu młodych připosłucharjow, kotřiž su hibićiwje, druhdy samo po wšěch štyrjoch łažo, k lochkej atmosferje na tamnišej derje pjelnjenej Krawčikec žurli přinošowali. Po temperamentnym zahajenju přez Annu-Mariju Brankačkec a Měrka Brankačka z hudźbnej skupinu NSLDź Floppy dolls witaše jednaćelka LND Marka Maćijowa wšě generacije přesahowacy publikum na swójbne popoł­dnjo, w kotrehož srjedźišću stejachu tři knihi za čitanski dorost.

Trójce je Ludowe nakładnistwo Domowina hižo dotal tradicionalnu wječornu literarnu kermušu njedźelu popołdnju přewjedło. A nowy koncept, zwjazany z kofejpićom a kuskom tykanca, publikum rady přijima. Wčera su hišće raz něšto nowe wuspytali, a tež to wuspěšnje. Dźěćace knihi stejachu w srjedźišću, a we wulkej ličbje (wězo ze swójbnymi) přichwatana cilowa skupina spožči zarjadowanju wosebity čiły charakter. Bě to zdobom domjaca hra za Chróšćanow Moniku Gerdesowu jako awtorku a jeje rjeka Franca Čornaka, a wězo słušeše serbska nowostka wo jeho dyrdomdejach na wandrow­stwje k najpožadanišim knižneho blida LND. „Dźěći wědźa, što chcedźa“, měnješe Manja Bujnowska z nakładnistwa. Čitanskemu dorostej so přiwobroćić je na kóždy pad dobra ideja – a literarnu kermušu přeco znowa aktualnej potrjebje přiměrić, tež. Cordula Ratajczakowa