Namołwjeja do wubědźowanja
Budyšin (SN). Spěchowanski kruh za serbsku ludowu kulturu přewjedźe lětsa 63. wubědźowanje wo najrjeńše jutrowne jejko za dorosćenych a namołwja jich, so w bohatej ličbje na nim wobdźělić. „Chcemy tež rady wšěch tych narěčeć, kotřiž hižo dołho doma do jutrow jejka wóskuja, ale so hišće přewinyli njejsu na wubědźowanju so wobdźělić. Prošu zmužće so a zapodajće swoje najrjeńše kolekcije, stajnje 3 jejka za jednu kolekciju“, rěka w namołwje. Při debjenju jejkow měli so jeno znate serbske techniki z tradicionalnymi srědkami nałožować. Kóždy pak smě so z wjacorymi technikami na wubědźowanju wobdźělić. Dźiwać měło so na bohate tradicije w dekorje a barbje, kotrež hodźa so ze swójskimi idejemi wariěrować. Kolekcijam přidać měli wuměłcy mjeno, adresu, starobu a pomjenowanje techniki.
Wusahowacy koncert Nagela
Skora čestne myto přepodał
We Wojerowskim Lessingowym gymnaziju wotmě so sobotu mytowanski koncert regionalneho wubědźowanja „Młodźina hudźi“. Z cyłkownje 90 wobdźělnikow zarjadowanja je so 17 mytowanych předstajiło.
Wojerecy (DGe/SN). Dietmar Wolf jako předsyda saksko-łužiskeho towarstwa Młodźina hudźi je so wosebje sponsoram za pomoc dźakował. Někotrych instrumentalistow z Budyskeje a Wojerowskeje hudźbneje šule kaž tež ze Zhorjelskeho třiróžka, kotřiž běchu najwjace dypkow w swojej kategoriji docpěli, počesćichu darićeljo z wosebitym mytom. Mjez nimi bě Wojerowski wyši měšćanosta Stefan Skora (CDU), kiž přepoda wiolinistce Helen Vogel z Wojerowskeje hudźbneje šule čestne myto města. Wona smě nětko 17. apryla z Nowej Łužiskej filharmoniju 51. Wojerowske hudźbne dny wotewrěć.
Floppy dolls w Praze
Program dobry wothłós žnjał
Ćitajće w nowym rozhledźe (29.01.16)
Februarske wudaće Rozhlada započina so z rozmyslowanjom wo rěči. Klaws Thielmann so praša, hač móhł soblex.de zakład za falowacy elektroniski słownik tworić.
Do swěta so podać a jón ze swójskimaj wočomaj zeznać, za to wabi pućowanska rozprawa wo Marokku. Čitarjo Serbskich Nowin su Hanku Šołćic hižo zeznali, w Rozhledźe rysuje młoda studentka dalše nazhonjenja a dožiwjenja ze sewjeroafriskeho kraja. Měrko Šołta zaběra so z wuwićom serbskeje byrgarskeje hudźbneje kultury a z wuznamnej rólu, kotruž hraješe při tym Maćica Serbska.
Wozjewjamy baseń Dorotheje Šołćineje „Hłupa kupi tupe luby“ a baseń Měta Kjarcmarja w delnjoserbšćinje „Kuždycki rožk“.
Wustajeńca dopomina na kritiskeho wuměłca
Łaz (AK/SN). Wosebita wustajeńca „Jürgen von Woyski – wuměłc našeho regiona“ je wot srjedy tohole tydźenja we Łazowskim Domje Zejlerja a Smolerja widźeć. Załožba, kotraž je po wuměłcu pomjenowana, pokazuje w nowej přehladce wobrazy, małe plastiki a talerje rězbarja a molerja Jürgena von Woyskeho (1929–2000).
„Idiot“ hnuje a zahorja
Sławny roman Dostojewskeho na Drježdźanskim jewišću inscenowany
K wuznamnym Rusam, skutkowacym w Drježdźanach, słuša Fjodor Dostojewski, kiž bě tam w druhej połojcy 19. lětstotka wjacekróć a dlěje ze swojej druhej mandźelskej přebywał. Mjez druhim pisaše Dostojewski w sakskej stolicy dźěle romana „Demony“ a přihotowaše so w Drježdźanach na pisanje 900 stron tołsteje knihi „Idiot“.
Drježdźanska statna činohra, znata za swoje wurjadne a často chětro diskutowane inscenacije stareje a našočasneje ruskeje dramatiki (w minjenych lětdźesatkach), je spočatk lěta ze swojej najnowšej inscenaciju roman swětoznateho spisowaćela „wotklepała“ na jeho bolostne poselstwo. Te rěka: Dobry a dobroćiwy čłowjek zwrěšći na tymle swěće nahrabnosćow, česćelakomnosćow, rozwólnosćow, intrigow a boja wo móc!
Lessingowe drohotki wotkryli a předstajili
Kamjenc (SN). Za fachowcow bě to nimale kaž dźiw, jako jewješe so loni w interneće originalny Lessingowy portret, znaty dotal jenož jako čornoběłe zwobraznjenje wosebiteje wobrazoweje słužby. Mólba słuša k tak mjenowanym „awtentiskim“ podobiznam, kotrež nastachu za čas Gottholda Ephraima Lessinga (1729–1781), a pokazuje rozswětlerja a spisowaćela jako něhdźe 30lětneho. Zo je so poradźiło, drohotku z podpěru spěchowanskich srědkow samo za Kamjensku zběrku nakupić, bě dalši dźiw. We wobłuku zarjadowanskeho rjadu Lessingowe akcenty su nowonakup wobraza wčera zjawnosći předstajili.
Njebě pak to jenička překwapjenka, kotruž stej nawodnica Kamjenskeho Lessingoweho muzeja dr. Sylke Kaufmann a Birka Siwczyk z dźěłoweho kruha za spřistupnjenje Lessinga wčera prezentowałoj. Tež podobiznje staršeju Lessinga, Johanna Gottfrieda (1693– 1770) a Justiny Salome Lessing (1703– 1777), stej nětko wobstatk muzeja. Moler Heinrich Lessing (1856–1930) bě mjez druhim za zjednoćenstwo bywšich Lessingowych šulerjow wobraz za awlu Lessingoweje šule stworił.
