Na swojim posedźenju 4. apryla bě załožbowa rada změnu spěchowanskeje směrnicy Załožby za serbski lud wobzamkła, kotraž nabywa nětko płaćiwosć. Štóž chce próstwu wo spěchowanje stajić, dyrbi hižo lětsa nowe terminy wotedaća wobkedźbować.

Budyšin (SN/CoR). Potencielnych partnerow a nošerjow projektow je Załožba za serbski lud hižo informowała, zo bychu so chóry, ansamble, institucije, regionalne a nadregionalne towarstwa na nowe – přechodne – terminy wotedaća spěchowanskeje próstwy nastajić móhli. Tak maja so próstwy za planowane projekty w druhej połojcy lěta 2017 hač do 30. awgusta wotedać a hač do 31. oktobra za projekty, kotrež su za prěnju połojcu lěta 2018 předwidźane. „Je cyle wažne tónle termin dodźeržeć, hewak njemóžemy próstwje wotpowědować“, podšmórny zastupjerka direktora serbskeje załožby Michaela Mošowa.

Dotal su mnozy próstwu hakle wosom tydźenjow do projekta wotedali, štož nětko hižo njemóža. „Smy lětsa hižo přechodne postajenje zaplanowali, dokelž je časowy ćišć tola chětro wulki. Chcemy wšitkim zmóžnić so za spěchowanske srědki přizjewić“, Mošowa rjekny.

Drježdźany (SN). Spočatk julija je wušła zběrka „AUS DEM WORT“ z originalnymi rysowankami molerki Gerdy Lepke w křidowym ćišću a z 13 prěni raz wozjewjenymi basnjemi Róže Domašcyneje. Je to z ruku wjazana a ćišćana kniha. Jeje wotměry su 44 x 32 x 1 cm. Nakład wopřijima 20 čisłowanych eksemplarow – kóždy wot wuměłče a basnicy signowany. Je to štwórta wuměłstwowa kniha blisko Drježdźan bydlaceje molerki. Do toho bě wona hižo publikaciju hromadźe z awtoromaj Richardom Pietraßom a Ingom Schulzom wuhotowała.

W čisle II/2017 (čo. 84) literarneho časopisa „Ostragehege“, kotryž dwójce wob lěto w Drježdźanach wuchadźa, je zapřijate krótkopowědančko Jurja Chěžki „Rubježnik“ w němskorěčnym přełožku Róže Domašcyneje. Nimo toho su tam štyri teksty basnicy wozjewjene a recensija Petera Gehrischa wo zběrce Milana Hrabala „Eine schimmernde Wabe Glimmer“, dale tež recensija Patricka Wildena wo zběrce Róže Domašcyneje „Die dörfer unter wasser sind in deinem kopf beredt“.

Budyšin/Chrósćicy (ML/SN). Wodźacy čłonojo Wendlandskeho přećelskeho a dźěłoweho­ kruha Lüchow-Dannenberg, kotřiž wudźeržuja dlěje hač 25 lět zwisk z Domowinu, přebywachu za čas XII. mjezynarodneho folklorneho festiwala we Łužicy. Woni chcedźa w blišim času swój kruh do towarstwa za zachowanje a spěchowanje tradicijow Hannoverskeho Wendlanda přetworić a Domowinje jako asociěrowany čłon přistupić.

Hosćo z wuchodneje Delnjeje Sakskeje dožiwichu mjez druhim programy w Hochozy, hdźež je so jim jara spodobało. Přewodźeni wot referenta Domowiny Wernera Sroki wopytachu woni tež Wochozy, tamnišu ewangelsku cyrkej z wopomnišćom za fararja Bogumiła Šwjelu kaž tež park błudźenkow. W Budyšinje su sej tež Serbski muzej wobhladali. Měrćin Brycka wodźeše jich po wustajeńcach. Wulke dožiwjenje hosćom bě sobotu wječor na Chróšćanskich statokach. Tam poskićene programy serbskich a wukrajnych ludowych wuměłcow jich wulce zahorichu.­ Wopyt Krabatoweho młyna w Čornym Chołmcu a čołmikowanje po Błótach jich přebytk we Łužicy skulojći.

Njedawno wotmě so mjezynarodne zetkanje Syće młodych akademikarjow- sorabistow w Budyskim Serbskim instituće. 21 referentow je tam wo swojich slědźenjach rozprawjało. Někotrych w małym serialu předstajimy.

Serbšćinu je młoda kulturna wědomostnica dr. Nicole Dołowy-Rybińska z Waršawy w Parisu nawuknyła. Hižo w doktorskim dźěle zaběraše so wona z tym, kak Serbja, Kašubojo a Bretonojo swoju rěč sylnja, kak spytaja ju rozšěrić a wožiwić. W swojej habilitaciji, kotraž je lětsa jako kniha w Pólskej wušła, je so Nicole Dołowy-Rybińska na młodych aktiwistow koncentrowała – hornjoserbskich, bretonskich, kašubskich a waliziskich. „Chcych wědźeć, kak a čehodla so woni za swoju rěč zasadźeja.“ Za to je dohromady sto rozmołwow wjedła a bě wězo tež wjacore razy we Łužicy.