Porjedźenka
Wubranka 60 lět
Potomnik Radyserba na wopyće był
Na druhe koło
Zhorjelc (SN). Druhe koło Zhorjelskeho fotoweho festiwala „Hrajnišća žiwjenja“ je zahajene. W prěnim kole su so hižo wjacori fotografojo wo přiwzaće za wobdźělenje na festiwalu požadali. Wot 26. awgusta hač do 11. septembra změja wšitcy wuzwoleni fotografojo z euroregiona Nysa a južneho euroregiona Sprjewja-Nysa-Bobr składnosć, swoje dźěła prezentować. Wo wuzwolenje postara so wotpowědna fachowa jury. Zajimowani fotografojo móža so z wumyslenymi motiwami runje tak zaběrać kaž z historiskimi abo aktualnymi.
Zhorjelski fotowy festiwal chce so wšelakorym hrajnišćam žiwjenja wěnować. Posledni termin zapodaća fotow je 13. julij. Hač do wosom motiwow móža fotografojo we wobłuku onlinoweho požadanja pod www.fotofestival.projektonline.info zapodać. Wone měli so w dalšim zmysle z temu „Hrajnišća žiwjenja“ rozestajeć. Při tym přeja sej organizatorojo předewšěm wosobinsku interpretaciju temy z wida fotografa.
Na prěnim fotowym festiwalu loni swjatki w Zhorjelcu bě składnosć, sej fota na wšelakich městnosćach wobhladać.
Wjacerěčny wječork w zmysle Smolerja
Drježdźany (AW/SN). Něhdźe 50 zajimcow dožiwi wčera w Drježdźanskej wili Augustin hódne zakónčenje 38. swjedźenja serbskeje poezije. Zhromadne zarjadowanje Zwjazka serbskich wuměłcow a Němsko-Pólskeje towaršnosće Sakskeje pod hesłom „Mosty w jachlacym wětrje – Serbja a jich přećeljo zjednoćeni w słowje a wobrazu“ wotpowědowaše wotkazanju Jana Arnošta Smolerja, kotremuž bě lětuši literarny festiwal wěnowany.
Po witanju moderatora Benedikta Dyrlicha čitachu awtor Měrćin Wjenk serbsce, poetka Emilia Deutsch pólsce a basnik Milan Hrabal čěsce Smolerjowe hrónčka. Basnik a hudźbnik Tomasz Nawka hudźeše k tomu na dudach. Zwurazni so wola, twarić mjez ludami mosty přećelstwa. Mjenowani kaž tež Christine Ruby, Dorothea Šołćina, Beno Budar a Benedikt Dyrlich přednjesechu swoje basnje a prozu w štyrjoch rěčach. Tele teksty su tež w časopisu Bawülon Ludwigsburgskeho nakładnistwa POP w němskej rěči wozjewjene.
Nowa dźěćaca kniha wušła
Z archiwana swětło
Pod hesłom „Hrubeju rukow drobne dźěło – rjemjesło na wsy“ su wčera popołdnju w Dešnjanskim domizniskim muzeju nowu wustajeńcu wote- wrěli.
Dešno (SN/CoR). „Najebać rjanu šklu, hdyž je prózdna“ – tajke a podobne serbske přisłowa je zajimowany wopytowar wčera wotkryć móhł, je-li sej wustajene wěcy dokładnje wobhladał. Nawodnica Dešnjanskeho muzeja Babette Zenkerowa bě sej někotre prajidma z literatury wupytała a je „takrjec jako překwapjenku“ w přehladce schowała. Něhdźe 60 hosći je wčera na wotewrjenje přišło. Spěwytwórc Bernd Pittkunings přednjese jim serbske a němske pěsnje wo rjemjesle.
Prusojo přińdu!
Jan Krystof Ponich
Tónkróć pod lipu w Serbskim domje hudźili
Komorny koncert pod lipu je po dwaceći wuspěšnych předstajenjach na dworje tuchwilu zawrjeneho Serbskeho muzeja dožiwił swoje wčerawše 21. pokročowanje pod lipu Serbskeho domu w Choćebuzu.
Choćebuz (WeM/SN). Wučerka Bettina Biesecke a kolegojo přihotowachu pisany program 24 šulerkow a šulerjow konserwatorija města w starobje dźesać do 18 lět. Jedna z překwapjenkow běše delnjoserbski postrow dwanaćelětneje Laury Bělojc přitomnym. Na to zawjeselichu chowancy hudźbneje šule hosći połdra hodźiny dołho na prěčnych pišćałkach, akordeonje, gitarach, harfomaj, smyčkowych a dujerskich nastrojach. Žnějachu za to zasłuženy přiklesk a dóstachu jako dźak róžu a mały dar.
W programje zaklinčachu mjezynarodne melodije, mjez nimi wjacore serbske a słowjanske. Wjacori šulerjo běchu přednjesene kompozicije z hłowy nazwučowali, zo ani notowe stejaki wid na młodych hudźbnikow njemylachu.
