Někotre přećelstwa su tak wosebite, zo hranicy krajow a rěčow z lochkosću přewinu. Powědaja wo dowěrje, zhromadnych dyrdomdejach a zbožu, někoho poboku měć, z kotrymž stanje so swět pisaniši a wjeselši. Přećelstwo, kotrež hižo štyri lětdźesatki wutroby dźěći po cyłym swěće zdobywa, je te mjez wašničkojtym starym Petterssonom a jeho runje tak šibawym kaž luboznym kocorom Findusom. Jeju stawiznički z pjera šwedskeho awtora Svena Nordqvista słušeja k najrjeńšim moderneje dźěćaceje literatury.