Franciskus – swědomje swěta
Aachen (B/SN). Bamž Franciskus swojej cyrkwi do swědomja rěči, ale tež Europje a swětej. Za to dósta wón njedawno Karlowe myto. Štó to hižo móže? Swětej do swědomja rěčeć, porokować, warnować runje tak kaž zmužitosć dawać? Awtorita Franciskusa ma swój zakład we wosobinskej ponižnosći. K tomu přińdźe jeho zmužitosć, wěcy direktnje a jasnje mjenować. Tež jeho gesty maja w přiběracym medialnym času wulki wuznam. A Franciskus tole wobknježi: hłuboki pokłon při modlitwje, myće nohow jatym w romskim jastwje, wobjimanje zbrašeneho muža na Pětrowym naměsće, prěnje pućowanje k ćěkancam na kupje Lampedusa. Před Běły dom we Washingtonje je wón z małym awtom přijěł, z kupy Lesbos je ćěkancow sobu domoj wzał atd. Mjez njewěriwymi je wón runje tak woblubowany kaž mjez wěriwymi.
Film wo swjatym Benje
Swoju rólu njenadhódnoćić
Vatikan (B/SN). Bamž Franciskus je měšnikam a dostojnikam cyrkwje porokował, zo swoju rólu lajkam napřećo nadhódnoćeja. „Klerikalizm zabywa, zo słušatej widźomnosć a sakramentalnosć cyrkwje wšemu ludej Božemu, a nic jeno někotrym wuzwolenym“, rěka w njedawno wozjewjenym lisće swjateho wótca. Duchowni su runja wšitkim tamnym přez křćeńcu najprjedy jónu lajkojo.
Pruwuja wukubłanje měšnikow
Wien (B/SN). Centralna Vatikanska kongregacija za klerus dźěła na nowych směrnicach za wukubłanje měšnikow. Přičina za to su změny dušepastyrskich metodow w cyrkwi. Wjetšu wahu změjetej nětko kulturny kontekst kaž tež prewencija znjewužiwanja, podšmórny sekretar kongregacije, arcybiskop Jorge Carlos Wong.
Duchowneju wuswobodźić
Zjězd katolikow – přećel klimy
Lipsk (B/SN). Stoty zjězd katolikow kónc meje w Lipsku ma wobswět a klimu jenož minimalnje poćežować. Wšitke emisije, zawinowane přez zarjadowanja, budu registrowane, rjekny jednaćel zjězda katolikow Martin Stauch. Za kóždu přetrjebanu papjeru, kóždy liter wody abo bencina płaći so na kóncu wurunanje, štož budźe po słowach Staucha něhdźe 23 000 eurow wučinjeć. Pjenjezy maja so wužiwać za pomocny projekt w Indiskej.
Křesćanske hódnoty
Schneeberg (B/SN). Za dźěći wokoło Schwarzenberga hač do Zwickauwa wobsteji wot lěta 2000 ewangelska zakładna šula w Schneebergu. Šěsć lět pozdźišo je tamniše šulske towarstwo hišće wyšu šulu wotewrěło. Wothłós je jara dobry, zdźěli farar Frank Meinel z nošerskeho zwjazka za šule. „Wobě stej mjeztym kruty dźěl kubłanskeje krajiny w zapadnych Rudnych horinach. Dohromady 460 šulerjow w Schneebergu wuwučuje 40 pedagogow. Šulske žiwjenje ma swój zakład w posrědkowanju křesćanskich hódnotow, socialneje kompetency, škita přirody a indiwiduelneho spěchowanja. Wosebitosć je wučbny předmjet diakonija.
Policisća dušinje přećeženi
Naiwna Europa
Zürich (B/SN). Islam ma wot swojeho załoženja před 1 300 lětami zaměr, křesćanow ze Srjedźneho wuchoda wuhnać. Tele měnjenje zastupuje syrisko-ortodoksny biskop za Šwicarsku a Awstrisku Dionysos Isa Gürbüz w dźeniku Tages Anzeiger, wuchadźacym w Zürichu. Po jeho słowach bě so genocid na křesćanach hižo w 7. lětstotku skradźu započał. Tež w přichodnych lětach budźe na Srjedźnym wuchodźe knježić „duch terora“. Nimo toho je naiwne do toho wěrić, zo so muslimscy ćěkancy Europje přiměrja a zo su z křesćanami w měrje hromadźe žiwi. Ja do toho wěrju, zo ličba tu zasydlacych so muslimow dale přiběra a zo budu křesćenjo potom tež tu přesćěhani. „Štož so dźensa na Bliskim wuchodźe stawa, stanje so tež tu w Europje.“ Gürbüz nochce k hidźe namołwjeć, 1 300 lět přesćěhanja pak jeho wuča, zo njesměš muslimam wěrić.
Chorownja před insolwencu
Zjězd Christival z piknikom
Karlsruhe (B/SN). Zetkanje z wjace hač 14 000 wobdźělnikami planuja cyrkwje w Karlsruhe. Składnostnje młodźinskeho zjězda Christival 2016 wot 4. do 8. meje chce dźěłowe zjednoćenstwo křesćanskich cyrkwjow (ACK) 7. meje wuhotować wječorny piknik za Christival a za jeje wobdźělnikow a hosći na Karlsruheskej hrodowej zahrodźe. To rjekny tamniši ewangelski dekan Thomas Schalla. Młodźinske zetkanje steji pod hesłom „Jězus wujednawa“. Zjězd, za kotryž je so hižo wjace hač 13 000 młodostnych nad 14 lětami přizjewiło, ma „wobdźělnikam zmóžnić, zo rěča wo prašenjach wěry a žiwjenja ze swojeje perspektiwy a wuwiwaja nowe formy křesćanskeho młodźinskeho dźěła“. Posledni Christival wotmě so lěta 2008 w Bremenje.
Bamž pućuje do Kawkaza
Vatikan (B/SN). Wot 24. do 26. junija wopyta bamž Armensku, wot 30. septembra do 2. oktobra Azerbajdźan a Georgisku. Jězbu do Armenskeje zwjazuje, chcyjo nochcyjo ze spominanjom na přesćěhowanje Armenjanow přez Osmaniske mócnarstwo před 100 lětami.
Přećiwo neutraliće cyrkwjow
