Ćichi pjatk kemši hić
Wien (B/SN). Awstriski ewangelski biskop Michael Bünker namołwja wěriwych w swojim kraju, ćichi pjatk we wulkej ličbje kemši hić. Pozadk toho je rozsud awstriskeho knježerstwa, wotstronić ćichi pjatk za ewangelsku mjeńšinu wěriwych w Awstriskej jako swjaty dźeń a jón jako wosobinski swjaty dźeń swjećić. Nětko dyrbja ewangelscy křesćenjo pola swojeho dźěłodawarja za to wosebity dowol přizjewić, hdyž chcedźa ćichi pjatk dale swobodne měć. „Za nas ewangelskich wěriwych je ćichi pjatk wosebje wažny“, pisa biskop cyrkwje Augsburgskeho wuznaća w zjawnym lisće. „Mnohe křiže w zjawnym rumje pokazuja, kak zakorjenjeny ćichi pjatk w našej kulturje je.“
Muzej ma so zaso mošeja stać
Wotwažuja zhromadnosće
Tutzing/Magdeburg (B/SN). Nawodźa ewangelskeje a katolskeje cyrkwje Němskeje su zhromadne pozicije we wobchadźe z ćěkancami wuzběhnyli. W diskusiji „Mandźelstwo za wšitkich“ su pak po słowach katolskeho Magdeburgskeho biskopa Gerharda Feigi etiske pozicije rozdźělne. Tohodla je wažne tež dale w rozmołwje wostać, rjekny předsyda ekumeniskeje komisije katolskeje biskopske- je konferency na kóncu posedźenja w ewangelskej akademiji Tutzing. Społnomócnjeny ewangelsko-lutherskeje cyrkwje za ekumenu Karl Hinrich Manzke wuzběhny, zo při wšěch rozdźělnych nahladach žaneje přičiny njeje z jednym hłosom njerěčeć. Mjeztym zo w mnohich ewangelskich krajnych cyrkwjach hižo homoseksualne pory žohnuja a jich mandźelski zwjazk kaž mjez mužom a žónskej mjeztym runostajeja, katolska cyrkej žohnowanje jenakosplažnych porikow nadal wotpokazuje.
Pomhaja w Ugandźe
Bamž a imam dobraj přećelej
Kairo (B/SN). Historiske zetkanje mjez bamžom Franciskusom a wulkoimamom Ahmadom Al-Tayyebom w Kairu je zawěrno měznik w mjezsobnych rozmołwach, kotrež wunjesechu dokument „Wo čłowjeskim bratrowstwje“. Tak jasnje kaž wulkoimam a bamž jako nawodaj najwjetšeju wěrow swěta za swobodu nabožiny a prawa žónskich wabitaj, tak jasnje zasudźataj wonaj kóždužkuli namóc a ekstremizm w mjenje Boha, ale tež sekularizm a njemoraliski indiwidualizm. Zjednoćene emiraty su zetkanje Franciskusa a Al-Tayyeba pjenježnje podpěrali. Za bamžowsku Božu mšu přewostajichu sportowy stadion. Z dotal najwjetšej křesćanskej Božej mšu na arabskej zemi su křesćenjo w islamskim swěće wulke připóznaće žnjeli.
List kardinalej Marxej
Křiž – symbol swětła?
Budyšin (B/SN). Wuměłski projekt chcedźa Budyscy křesćenjo w póstnym a jutrownym času zwoprawdźić, zo bychu ze swojimi sobubratrami do rozmołwy přišli. Hłowne ćežišćo při tym rěka: Što dawa mojemu žiwjenju swětło? Što mje hnuje? Realizacija projekta ma swój spočatk w zhromadnej iniciatiwje katolskeje a ewangelskeje wosady, kotrejž wobě w mjezsobnosći cyrkej swj. Pětra w Budyšinje wužiwatej. Na ekumeniskej nutrnosći z ewangelskim krajnym biskopom Carstenom Rentzingom a biskopom Heinrichom Timmereversom su wuměłski projekt wotewrěli. Hač do jutrow steja nimale wšědnje zarjadowanja na programje: wot wodźenjow přez přednoški za dźěći, modlitwy wo měr, duchownu hudźbu hač k seminaram a dźiwadłowym kursam. Na mnohich terminach wuměłc Ludger Hinse sam sobu skutkuje.
Sankcije zběhnjene
Sakska z druheje strony
Drježdźany (B/SN). Kaž hižo lěta do toho bě Drježdźansko-Mišnjanske biskopstwo ze swójskim stejnišćom na kóždolětnych kwasnych wikach w sakskich wulkoměstach zastupjene. „Kwasne wiki skića nam móžnosć, so jako cyrkej w towaršnosći pokazać, pytać nowe puće k čłowjekam a z nimi rěčeć“, wuswětla sobudźěłaćerka biskopstwa a poradźowanje za mandźelstwa, swójby a žiwjenja Claudia Leide. „Je to puć, kotryž z wulkim wjeselom a dźakownosću kročimy.“
Dieceza Drježdźany-Mišno ma z tajkim stejnišćom zaměr, zo wopytowarjo do rozmołwy přińdu z ludźimi, „kotrychž hewak jenož w telewiziji widźiš abo w radiju słyšiš“, potwjerdźa biskop Heinrich Timmerevers. „A dźe tež wo to, Saksku z druheje strony pokazać.“
Tež njekřćeni witani
Berlin (B/SN). Berlinski arcybiskop Heiner Koch přeproša tež njekřćene poriki, zo bychu so žohnować dali. „Pójće cyle jednorje do cyrkwje a zaswěćće sej zhromadnje swěčku, abo dajće so na Božej mši žohnować.“ Štóž wuprosy sej žohnowanje za swoju lubosć, přiznawa, zo njemóže na přikład dźeń Walentina tajke žohnowanje wuskutkować, měni arcybiskop Koch.
Dźeń swětoweje młodźiny
San José/Panama-město (B/SN). 23 młodostni z biskopstwa Magdeburg a jich přewodźerjo wobdźělichu so na lětušim Dnju swětoweje młodźiny w Panamje. Do zetkanja z bamžom a 200 000 młodostnymi poby skupina w susodnej Kosta Rice, hdźež zeznajomi so z ludźimi a dožiwi tamnišu wulkotnu přirodu. W katedrali Cartago zetkachu Magdeburgčenjo sta młodych putnikow z mnohich krajow swěta. Tež 25 putnikow z biskopstwa Drježdźany-Mišno spomina rady na hospodliwosć w zdźěla jara chudych swójbach. Woni njezabudu dožiwjenja wěry, kotrež wšitke hranicy narodow přesahuja. Wosebje lubili su so wobdźělnikam Bože mšě z hudźbu a rytmiskim spěwanjom. Přichodny Dźeń swětoweje młodźiny budźe za tři lěta w Portugalskej.
Dalekubłanje w Israelu
Před synodu protestowali
Drježdźany (B/SN). Zastupjerjo zwjazka „Zurück auf Los“ su składnostnje wosebiteho posedźenja sakskeje krajneje synody w Drježdźanach protestowali. Iniciatiwa kritizuje wobzamknjenu strukturnu reformu, po kotrejž maja so cyrkwinske wosady do wjetšich cyłkow zjednoćić. „Planowane hromadupołoženje wosadow je zwjetša nanuzowane a zbudźa njeměr“, wuzběhny iniciator protesta, cyrkwinski předstejićer Friedhelm Zühlke z Auerswalde. Čłonojo zwjazka so boja, zo so indiwidualny wobraz a tradicija wosady tak pominjetej.
Křesćenjo dale přesćěhani
Kak so na wotpočink podać
Jawornik (B/SN) Pod hesłom „Witajće na wotpočink“ móža najnowši rentnarjo a ći, kotřiž to bórze budu, zhromadny kónc tydźenja wot pjatka, 29., hač do njedźele, 31. měrca, w Jaworničanskim Domje swj. Wjacława přežiwić. „Što to rěka, dźěłowy žiwjenski čas za sobu wostajić? Što na mnje čaka? Kak to wupada, zo će nětko wjace njetrjebaja? A kak je to z tym derjeměćom?“, pisa referentka Gabriele Kretschmer, nawodnica „zajimaweho kónca tydźenja“. Přizjewjenja pod www.bistum-goerlitz.de
Wuznamny misionar sewjera
Kak žiwjenje ludźi škitać
Berlin (B/SN). Wot 4. do 11. meje wotměje so lětuši ekumeniski Tydźeń za žiwjenje. Jeho hesło rěka „Žiwjenje škitać. Ludźi přewodźeć. Suicidam zadźěwać“. Rozłožić chcedźa tam móžnosće poradźowanja wobeju cyrkwjow, kak hodźi so sebjemordarstwu zadźěwać. Hladajo na to, zo registruja w Němskej kóžde lěto 10 000 sebjemordarstwow a mnohe pospyty, ma zarjadowanje pokazać na přičiny depresijow, smjertnych přećow, ale tež puće prewencije a skutkowniše zastaranje na suicid wohroženych ludźi.
Maja najćešu bibliju swěta
Kooperacija při wučbje
Drježdźany (B/SN). Krajna cyrkej Sakskeje a biskopstwo Drježdźany-Mišno chcetej při šulskej nabožinskej wučbje wušo hromadźe dźěłać. Tohodla ma so najpozdźišo wot šulskeho lěta 2020/2021 konfesionelno-kooperatiwna nabožinska wučba poskićić, praji ewangelski krajny biskop Carsten Rentzing w Drježdźanach. Hromadźe z katolskim biskopom Heinrichom Timmereversom předstaji Rentzing prěni raz pozicisku papjeru „Konfesionelna kooperacija w nabožinskej wučbje w Swobodnym staće Sakskej“. Wučbna maćizna leži w zhromadnej zamołwitosći, při kotrejž njejedna pak so wo ekumenisku nabožinsku wučbu, podšmórnyštaj wobaj biskopaj. Konfesionelne rozdźěle maja so jasnje wuzběhnyć. Tak nastanje nimo ewangelskeje a katolskeje nabožiny třeća forma nabožinskeje wučby.
Ćežke časy za křesćanow
