Wo roztorhanym swěće

srjeda, 27. meje 2015 spisane wot:

Lipsk (B/SN). Ze swojej hru „Anders, als du glaubst“ wo židach, muslimach, křesćanach a wo roztorhanym swěće předstaji so 29. meje w 19.30 hodź. Berlinska skupina Companie w Lipšćanskej Lutherowej cyrkwi. Přinošk k dialogej nabožinow měri so wosebje na młodostnych. Po předstajenju chcedźa so zastupjerjo wšelakich wěrywuznaćow kaž tež politikarjo z publikumom rozmołwjeć.

Přećiwo eksportej bróni

Bremen (B/SN). Składnostnje 70. róčnicy kónca wójny je cyrkwinski społnomócnjeny za prašenja měra Renke Brahms namołwjał, spjećować so eksportej bróni a wojerskemu rozrisanju konfliktow. „Wšitke nazhonjenja runje minjenych sto lět stawiznow nam pokazuja, zo namóc přećiwnu namóc wuskutkuje“, warnowaše społnomócnjeny za prašenja měra Ewangelskeje cyrkwje w Němskej na wopomnjenskej Božej słužbje w Bremenje. „Namóc a wójna eskalěrujetej we wěčnym čertowym kruhu, hdyž so brónje do wšeho swěta předawaja a so při rozdźělenju hižo kontrolować njehodźa.“ Tež tam, hdźež so z najlěpšim wotpohladom škit ludźi zaruča, su wuspěchi jeno skromne, rjekny nawjedowacy teologa z Bremena.

Pomha konflikty wottwarjeć

wutora, 19. meje 2015 spisane wot:

Vatikan (B/SN). Vatikan chce swoju rólu jako posrědkowar w mjezynarodnych konfliktach wutwarić. Vatikanski wonkowny minister arcybiskop Paul Gallagher rjekny, zo rozmysluja wo zarjado­wanju wotrjada za mjezynarodnu mediaciju. Katolska cyrkej ze swojej syću diplomatiskich kontaktow njese tu wulku zamołwitosć, rjekny Gallagher.

Politikarjo za socialnu pomoc

Kandidaća pomjenowani

wutora, 12. meje 2015 spisane wot:

Drježdźany (B/SN). K wólbam noweho ewangelskeho krajneho biskopa w Sakskej nastupja štyrjo kandidaća. Cyrkwinske wjednistwo a synoda nominowaštej jednu žónsku a třoch muži. Naslědnika krajneho biskopa Jochena Bohla, kiž poda so kónc awgusta na wotpočink, na wosebitej synodźe kónc meje wuzwola. Kandiduja Drježdźanska fararka Margrit Klatte (47), wyši krajny cyrkwinski rada Dietrich Bauer (55) a farar Carsten Rentzing (47) z Markneukirchena. Nimo toho namjetowaše synoda krajneho fararja za młodźinu Tobiasa Bilza (50), kiž bě so za to powabił.

„Katolski wid na Luthera“

Islam so dale rozšěrja

wutora, 05. meje 2015 spisane wot:

Washington (B/SN). Islam móhł křesćanstwo na swěće w přichodnych lětdźesatkach jako najwjetša nabožinska zhromadnosć wotměnić. W lěće 2050 móhło runje telko muslimow na zemi być kaž křesćanow, rěka w prognozy instituta Pew Research Center z USA. Wokoło lěta 2070 změjemy po wšěm zdaću wjace muslimow hač křesćanow. Přičina tohole wuwića je mjez druhim ta, zo maja muslimojo přerěznje wjace dźěći. W Europje budu muslimojo za 35 lět něhdźe dźesać procentow cyłeje ludnosće wučinjeć. Přiwšěm měli při tajkich dołho­dobnych prognozach skedźbliwi być, wobmjezuje so institut při předstajenju swojeje studije. Přirodne katastrofy, wójny a dalše njepředwidźomne podawki móhli demografiski trend tež změnić.

Namóc w Brazilskej přiběra

Rio de Janeiro (B/SN). Namócne konflikty wo wodu a pódu w Brazilskej dale přiběraja. Ličba pospytanych mordarstwow na wsach je so loni na zakładźe konfliktow a zajimow porno lětu 2013 poštworiła, kaž biskopska komisija za wjesne dušepastyrstwo rozprawja. Ličba namócnosćow a mordarstwow na wsach přiběra.

Chce napjatosće wottwarić

Marx wostanje prezident

wutora, 28. apryla 2015 spisane wot:

Brüssel (B/SN). Kardinal Reinhard Marx wostanje dalše tři lěta prezident biskopskeje komisije Europskeje unije Comece. Arcybiskop Mnichowa-Freisinga je zdobom předsyda Němskeje biskopskeje konferency a europski sobustaw ko­misije kardinalow za reformu romskeje kurije.

IS zamołwita za genocid

Genf (B/SN). Teroristiska milica Islamski stat (IS) je po rešeršach UNO zamołwita za ludomordarstwo a za wójnske złóst­nistwa. Systematiske nadpady na nabožinsku mjeńšinu jezidow hodźi so zastopnjować jako genocid. IS měješe wotpohlad, jezidow jako skupinu zničić, kaž w rozprawje UNO rěka.

Kritika Obamy na křesćanach

Dowěra woteběra a přiběra

wutora, 21. apryla 2015 spisane wot:

Stuttgart (B/SN). Nahladnosć někotrych powołanjow, kotrež mějachu po tradiciji wěstu dowěru, je w minjenych dźesać lětach­ zdźěla poćerpjeła. Tak Němcy mjeztym pilotam, taksijowym šoferam, fararjam a žurnalistam mjenje dowěrjeja, rěka w studiji Trusted Brands měsačneho magacina „Reader’s Digest“, kotruž su w Stuttgarće předstajili. Wulku nahladnosć maja porno tomu medicinski personal, wohnjowi wobornicy a policija, kaž z přepytowanja wuchadźa.

Ćichi pjatk žane wobrězanje

Münster (B/SN). Po rozsudźe prawiznika njesmě so ćichi pjatk hižo žane wobrě­zanje wotměwać. Wyše zarjadniske sudnistwo Münster wobkrući tak rozsud města Kölna, kotrež bě přenajenje hosćenca ćichi pjatk za wobrězowanski swjedźeń zakazał.

Nimale wšitke cyrkwje zničene

Znjezboženje „amok“ było

wutora, 14. apryla 2015 spisane wot:

Berlin (B/SN). Starobiskop a socialny etikar Wolfgang Huber warnuje – hladajo za pytanjom přičin za znjezboženje airbusa w francoskich Alpach – před generalnym podhladom napřećo depresiwnym čłowjekam. Mordarske jednanje kaž wotpohladane njezbožo lětadła scyła njeje typiske za depresiwnych, rjekny Huber we wusyłanju ARD „Günter Jauch“ k rozprawam medijow, po kotrychž bě kopilot depresije dla pod lěkarskim dohladom. Něhdyši předsyda rady EKD nima tež za prawe, mjenować wukonjenje tohole njezboža jako tak mjenowany rozšěrjeny suicid, kaž je to při njeskutkach w swójbnym wobłuku z wašnjom. Za Hubera je lětadłowe njezbožo skerje amok.

Rozšěrja centrum epilepsije

Heße nowy němski biskop

srjeda, 08. apryla 2015 spisane wot:

Hamburg (B/SN). 48lětny Kölnjan Stefan Heße je nowy arcybiskop Hamburga. Dotal­ny prelat bu 14. měrca wot biskopa Osnabrückskeje diecezy Franza Josefa Body jako biskop zapokazany. Konsekratoraj běštaj kardinal Rainer Maria Woelki z Kölna a swjećacy biskop Norbert Werbs ze Schwerina.

Stefan Heße je nětko najmłódši biskop cyłeje Němskeje. Po stu­diju a měšniskej swjećiznje bě wón štyri lěta z kapłanom w hórniskim regionje Bergheim a přewza po tym wšelake nadawki w arcybiskopstwje Köln.

Swjate lěto miłosće wuwołane

nawěšk

nowostki LND