Kak žiwjenje ludźi škitać
Berlin (B/SN). Wot 4. do 11. meje wotměje so lětuši ekumeniski Tydźeń za žiwjenje. Jeho hesło rěka „Žiwjenje škitać. Ludźi přewodźeć. Suicidam zadźěwać“. Rozłožić chcedźa tam móžnosće poradźowanja wobeju cyrkwjow, kak hodźi so sebjemordarstwu zadźěwać. Hladajo na to, zo registruja w Němskej kóžde lěto 10 000 sebjemordarstwow a mnohe pospyty, ma zarjadowanje pokazać na přičiny depresijow, smjertnych přećow, ale tež puće prewencije a skutkowniše zastaranje na suicid wohroženych ludźi.
Maja najćešu bibliju swěta
Kooperacija při wučbje
Drježdźany (B/SN). Krajna cyrkej Sakskeje a biskopstwo Drježdźany-Mišno chcetej při šulskej nabožinskej wučbje wušo hromadźe dźěłać. Tohodla ma so najpozdźišo wot šulskeho lěta 2020/2021 konfesionelno-kooperatiwna nabožinska wučba poskićić, praji ewangelski krajny biskop Carsten Rentzing w Drježdźanach. Hromadźe z katolskim biskopom Heinrichom Timmereversom předstaji Rentzing prěni raz pozicisku papjeru „Konfesionelna kooperacija w nabožinskej wučbje w Swobodnym staće Sakskej“. Wučbna maćizna leži w zhromadnej zamołwitosći, při kotrejž njejedna pak so wo ekumenisku nabožinsku wučbu, podšmórnyštaj wobaj biskopaj. Konfesionelne rozdźěle maja so jasnje wuzběhnyć. Tak nastanje nimo ewangelskeje a katolskeje nabožiny třeća forma nabožinskeje wučby.
Ćežke časy za křesćanow
Bamž US-biskopow namołwjał
Vatikan (B/SN). Bamž Franciskus je so w lisće wobroćił na biskopow USA, kiž su so hladajo na skandal znjewužiwanja wróćo sćahnyli na tydźeń modlenja. Wón jich namołwja ke kročelam přećiwo „kulturje znjewužiwanja“ a jich warnuje před šćěpjenjom a wućeknjenjom jich zamołwitosće. Franciskus bě sej tute eksercicije wuraznje přał.
Mišter Eckhart za dźěći
Čłowječe kosće našli
Rom (B/SN). Namakane čłowječe kosće na teritoriju Vatikana staraja so wo spekulacije. Před 35 lětami bě so tehdy 15lětna Emanuela Orlando zhubiła. Wot dźowki přistajeneho Vatikana njeje wot toho časa ani slěda. Tuž je wokoło tohole pada wjele tukanjow, kaž anonymne telefonaty, mafija a komploty wuchodneje tajneje słužby přećiwo bamžej Janej Pawołej II. Hač so při namakanych kosćach wo Emanuelu Orlando jedna, njeje dotal jasne.
Zakituje wučbu nabožiny
Berlin (B/SN). Berlinski arcybiskop Heiner Koch je konfesionelnu nabožinsku wučbu zakitował. Předmjet pomha šulerjam, namakać „swójske stejišćo“ k swojej nabožinje, rjekny Koch w telewiziji ZDF. Konfesionelna wučba je lěpša hač nabožinskowučbny předmjet a je wuměnjenje za mjezsobnosć z druhimi nabožiami.
Zmužitosć k měrnosći měć
Cyrkej njewotwisna
Kijew (B/SN). Katolscy biskopja Ukrainy witachu załoženje wot Moskwy njewotwisneje „prawosławneje cyrkwje Ukrainy“. Předsyda romsko-katolskeje biskopskeje konferency, biskop Bronisław Bernacki, gratulowaše nawodźe noweje cyrkwje, metropolitej Epiphaniusej: „Nadźijam so płódneho zhromadneho skutkowanja.“ Měnjenja europskich zastupjerjow cyrkwjow a politikarjow su rozdźělne – wot witanja hač k wotpokazanju statusa njewotwisneje ortodoksneje Ukrainy. Něhdźe 70 procentow wot 45 milionow wobydlerjow Ukrainy so k prawosławnej cyrkwi wuznawa.
Zwada wo swjate woprawjenje
Mnichow (B/SN). Předsyda katolskeje Němskeje biskopskeje konferency kardinal Reinhard Marx mjenuje zwadu wo dowolnosć ewangelskim mandźelskim, swjate woprawjenje přijeć, „fiasko“. Mnozy ludźo su kritisce reagowali „na tajke dźiwadło, kotrež su biskopja hrali“, Reinhard Marx měni. Nětko maja biskopja jednotliwje rozsudźeć, hač ewangelskim mandźelskim dowola, k swjatemu woprawjenju hić.
„Cyrkej ma tež ćěmne strony“
Za lěpšu politisku kulturu
Düsseldorf/Mišno (B/SN). Bywši zwjazkowy minister za nutřkowne naležnosće Thomas de Maizière warnuje před tym, z přehnatymi a hrubymi rozestajenjemi politisku kulturu w Němskej wobškodźić. Přistojne mjezsobne wobchadźenje so pozhubja, rjekny de Maizière w Brüsselu wuchadźacej nowinje Rheinische Post. „Mamy w politiskej debaće lědma hišće rozdźěla mjez piano a fortissimo. Zwjetša je to jenož hišće fortissimo“, wobžaruje politikar CDU a čłon financneho wuběrka zwjazkoweho sejma.
Kak dołho hody swjećić?
Wołtar hač k jutram ponowja
Róžant (B/SN). K jutram budźe wołtar Róžeńčanskeje putniskeje cyrkwje wot fachowcow wobšěrnje restawrowany. Tež wjace hač 400lětny original postawy maćerje Božeje je hač na krónu hižo wobnowjeny. Sotra Tadeja Zelnakec z klóštra Marijineje hwězdy w Pančicach-Kukowje z toho wuchadźa, zo drjewjanu postawu swj. Marije prěni raz restawruja. „Po zdaću je wšitko na njej hišće originalne, barba z njeje pak so hladajcy pušća“, praji cistercienska. Zamołwite rjadnicy za putnisku cyrkej nadźijeja so jałmožnow. Po njedawnym hodownym koncerće je chór Lipa za ponowjenje postawy maćerje Božeje hižo nahladnu sumu pjenjez z kolekty při drujach přewostajił. Nimo Wechselburgskeje je Róžeńčanska najwuznamniša putniska cyrkej w biskopstwje.
Počesća mandźelskeju Kreyssig
Hody wšudźe hinak
Paris (B/SN) Euronews rozprawjeja, kak su křesćenjo po cyłym swěće hody 2018 swjećili. W Sydneyju swjećachu Awstralčenjo z mnoho hosćimi při Sydney Bondi Beach. Policija měješe wjele dźěła z alkoholizowanymi domoródnymi runje tak kaž z cuzymi. W najwjetšim měsće Pakistana, w Karatschi, je mała křesćanska wosada w Božej nocy pod krutym wěstotnym dohladom skromnje kemše swjećiła. W Peru swjeća hody w kóždej kónčinje z druhimi nałožkami. Wječor zakónča z wulkim wohnjostrojom po hodownej Božej mši. W Južnej Koreji bydli wjele křesćanow. Tu hody njeswjeća w swójbje, ale wšitcy zetkaja so w cyrkwi. Na spočatku předstaja hodownu hru a přizamknje so Boža mša. Po tym wostanu wšitcy w cyrkwi a zhromadnje jědźa. Wjele młodostnych hnydom w cyrkwi přenocuje. Wječor ćahaja ludźo wjesele po hasach a spěwaja hodowne spěwy.
Chwali „Puće Knjeza“
„Milad Majid“ w Syriskej
Damaskus (B/SN). Křesćenjo w Syriskej strowja so hody z „Milad Majid“, štož woznamjenja: Wjesołe hody. Swjeća tam hody podobnje kaž w Němskej. 25. decembra je tam najebać njeměr a wójnu swjaty dźeń, hačrunjež su tam jenož někak dźesać procentow ludnosće křesćenjo. Stawizny křesćanstwa w Syriskej sahaja hač do Antiochije, dźensnišeho města Antakya. Tam su so japoštoljo prěni raz křesćenjo mjenowali. Młody šuler Siwar praji wo hodźoch na Facebooku: „Knježi wójna a dožiwjamy wjele zła. Smy wjace doma hač w šuli. Stajimy hodowny štom a darimy sej maličkosće. Kóžda swójba je někoho zhubiła. Wažne nam je, zo hromadźe dźeržimy.“
Poruča orientacisku pomoc
Putnicy žadanja přednjesli
Berlin (B/SN). Po 1 600 kilometrach puća za lěpšu klimu su putnicy w zwjazkowym hospodarskim ministerstwje w Berlinje lisćinu žadanjow statnemu sekretarej Ulrichej Nussbaumej přepodali. Wón je so z putnikami intensiwnje rozmołwjał a pokaza so wotewrjeny nastupajo temu klimowa sprawnosć, měnjo: „Mje njetrjebaće přeswědčić.“ W septembru bě so klimowy putniski puć, organizowany wot wobeju wulkeju cyrkwjow, w Bonnje zahajił. Wot toho časa bě po wotrězkach 1 500 putnikow po puću. Dale wjedźeše puć přez Pólsku do Katowic, hdźež wotmě so hač do 14. decembra swětowa klimowa konferenca.
Prěni raz žónska na čole
Berlin (B/SN). Zwjazkowa zhromadźizna Pomocneho skutka kolpingow w Kölnje je Ursulu Groden-Kranich za nowu předsydku 1850 załoženeho katolskeho zwjazka wuzwoliła. Zapósłanča CDU je wučena bankownica. Jeje centralne temy w zwjazkowej politice su europska a swójbna kaž tež kulturna a medijowa politika. 53lětna nastupi zastojnstwo po Thomas Dörflingeru, kiž njebě po 14 lětach hižo jako předsyda kandidował. Pomocny skutk kolpingow w Němskej ma 230 000 sobustawow.
Pater Rupert Mayer
