Mjez sobu so podpěrać a sylnić
Drježdźany (B/SN). Z modlitwu a mjezsobnym sylnjenjom hodźi so zmotanosć w tychle ćežkich časach přewinyć. Naša zhromadnosć je nětko wosebje wažna, namołwi krajny biskop ewangelsko-lutherskeje cyrkwje Sakskeje Tobias Bilz hłownohamtskich a čestnohamtskich cyrkwinskich sobudźěłaćerjow, za čas koronapandemije njespušćić zmužitosć. „Z Božej pomocu dobywamy nowe perspektiwy. Koronapandemija nas k tomu namołwja, so dopominać na žórła našeho duchowneho žiwjenja a je wužiwać“, piše biskop Bilz w lisće sobudźěłaćerjam w cyrkwi. „K tomu słušeja modlitwa, krutosć, čitanje biblije, wšelake wosobinske formy nyšpora a małe formaty Božich słužbow. Wone su wažna kótwica, hdyž so wšitko do prašenja staja.“
Za azyl Pakistanjana
Wopory namocy wopominał
Mossul (B/SN). Bamž Franciskus bě na wopyće w Iraku tež w awtonomnej kónčinje Kurdistanje. W Mossulu, něhdyšim hłownym sydle teroristiskeje milicy Islamski stat, wopominaše wón wopory wójny a namocy. K woporam njeskutkow słušeja muslimojo, křesćenjo a jezidojo. Na kóncu modleše so bamž z přitomnymi wosebity wopomnjenski paćer. Chaldejsko-katolski arcybiskop Najib Mikhael Moussa je so swjatemu wótcej za wopyt wutrobnje dźakował. „Naš kraj trjeba profetiski hłós, zo by tu ćerpjacym ludźom pomhał“, wón podšmórny.
Móža synagogu twarić
Podstupim (B/SN). Jako poslednja němska krajna stolica dóstanje Podstupim zaso synagogu. Po lětadołhim tam-a-sem chcedźa ju lětsa nazymu twarić započeć, kaž to kultusowa ministerka Braniborskeje Manja Schüle (SPD) zhromadnje z prezidentom Centralneje rady židow w Němskej Josefom Schusterom připowědźi. Kraj natwari za 13,7 milionow eurow na Hrodowej synagogu a wosadny centrum. Fachowje přewodźa projekt Centralna městnosć dobroćelstwa židow w Němskej. Twarske dźěła maja po planje w lěće 2024 zakónčene być.
Katedrala znowa wotewrjena
1 700 lět swjećimy njedźelu
Rom (B/SN). Kejžor Konstantin Wulki je 3. měrca 321 přikazał, zo maja sudnicy, zawody a měšćanske wobydlerstwo njedźelu wotpočnyć. Jenož wjesni wobydlerjo smědźachu wusywać, žnjeć a skót zastarać. Tón pisomny dokument je hač do dźensnišeho zachowany. Wědomostnicy tukaja, zo bě so kejžorej židowske rjadowanje tydźenja ze sedmym dnjom jako sabat zalubiło. Sedmy dźeń bu po přikazu kejžora Konstantina Bohu słónca wěnowany.
Wustupy z cyrkwje hroža
Berlin (B/SN). „Dokelž so reformy w katolskej cyrkwi dlija, hrozy strach, zo so cyrkej šćěpi.“ Tole zwěsća historikarka a profesorka na Berlinskej Humboldtowej uniwersiće Birgit Aschmann. Jako čłonka Centralneho komiteja katolikow a synodalneho puća wona tež hibanje „Maria 2.0“ stajnje zaso pozbudźa, dale wo runoprawosć žonow wojować. „To wožiwja debaty mjez doprědkarskimi a konserwatiwnymi kruhami, mjez biskopami a lajkami.“ Přećiwnicy měšniskeje swjećizny za žónske dźě skedźbnjeja zas a zaso na pastyrski list „Ordinatio Sacerdotalis“ z lěta 1994, kotryž bě tehdyši bamž Jan Pawoł II spisał.
Ludnosć surowy hłód trada
Polacy za wotstup biskopow
Waršawa (B/SN). Po tym zo je studija tydźensce wuchadźaceho powěsćoweho magacina Wprost dalše skandale pedofilnosće wotkryła, so 58,7 procentow Polakow za wotstup wšěch biskopow wupraja, 33,9 proc. ludźi je přećiwo tomu. Naprašowanje přewjedł bě Institut United Surveys. 87 procentow 30- do 39lětnych mjez naprašowanymi bě sej žadało, zo měli wšicy biskopja kraja wotstupić. Protesty přećiwo zamjelčenju seksualneho znjewužiwanja w pólskej cyrkwi přiběraja.
Pomoc k wumrěću njeposkićić
Jubilejne lěto za židow
Düsseldorf (B/SN) W Němskej mamy mjeztym 1 700 lět židowske žiwjenje. Najstarše tudyše pisomne žórło pochadźa z lěta 321 wot kejžora Konstantina. Předsyda nošerskeho towarstwa jubilejneho lěta Matthias Schreiber wupraji so w interviewje z katholisch.de k židowskim korjenjam křesćanstwa, k antisemitizmej w Němskej a k zamołwitosći křesćanskich cyrkwjow napřećo židowskim sobučłowjekam. Schreiber je ewangelski farar a dźěła dźensa jako cyrkwinski a nabožinski społnomócnjeny w statnej kencliji w Düsseldorfje.
Na „dróhu smjerće“ njezabyć
Bonn (B/SN). Zastupjerjo katolskeho kubłanskeho skutka su na swětowym dnju židowstwa a křesćanstwa wopory nacionalsocializma wopominali a k stražliwosći a čłowjeskosći namołwjeli. Tak napominaše bamž Franciskus we wosebitym poselstwje, zo njeměłoj so tajka hida a namóc kaž w času holocausta hižo wospjetować. „Wobhladajće sej, kak běchu tehdy započeli dróhu smjerće, ničenja a brutality twarić.“ Křesćenjo měli sej přeco znowa wuwědomjeć, zo je so Jězus jako žid narodźił a jako žid na křižu wudychał.
Róžowa póndźela w Kölnje
Köln (B/SN). Dokelž póstniske ćahi lětsa wupadnu, přewjedźechu přećah dźensa w miniaturnej formje a klanki w póstniskich kostimach přez město rejowachu! Wot lěta 1802 zahorjatej legendarnej a typiskej klance na kijach Tünnes a Schäl Kölnskich wobydlerjow. Při tym rěčitej wonej w Kölnskim dialekće. Ze sydom do wósom kilometrow dołhim póstniskim přećahom z něhdźe 10 000 wobdźělnikami bě w zašłych lětach Kölnjanski ćah najwjetši w cyłej Němskej. Lětsa stejachu we wulkej hali jenož 16 miniaturnych póstniskich wozow. Róžowa póndźela je wusko z katolskej cyrkwju zwjazana. Swjedźeń wotměje so stajnje póndźelu do popjelneje srjedy. Wot 11. do 19. lětstotka počesćichu bamžojo njedźelu do róžoweje póndźele zasłužbne wosobiny ze złotej róžu. Dokelž wotměwaše so hłowna zhromadźizna karnewalskich towaršnosćow přeco póndźelu po tutej njedźeli, pomjenowachu ju norojo róžowu póndźelu.
Bamž planuje jězbu do Iraka
Vatikan (B/SN). Bamž Franciskus chce najebać wobmyslenja do Iraka lećeć. „Tež hdyž budźe mje wjetšina Irakčanow pandemije dla jenož w telewiziji sćěhować móc, móža woni začuwać, zo je bamž mjez nimi“, rjekny pontifeks w rozmołwje ze žurnalistami we Vatikanje. Hižo Jan Pawoł II. bě so w lěće 2000 nadźijał, zo móže Irak wopytać. Politiskich napjatosćow dla pak jězbu njenastupi. Franciskus nochce tamnišich ludźi znowa přesłapić. „Hdyž ćerpja, jich tróštujemy“, wón wuzběhny. We wobłuku wopyta wot 5. do 8. měrca chce so swjaty wótc na mjezynabožnym modlenju z křesćanami, muslimami, židami a dalšimi wobdźělić.
Zběraja pjenjezy za Etiopisku
Erfurt (B/SN). Wołanje za pomoc kardinala Souraphiela, arcybiskopa Addis Abeby, a Petrosa Bergi, kiž socialne projekty na městnje rjaduje, zbudźi darjensku akciju Erfurtskeho biskopstwa. W slumach a předměstach Addis Abeby, stolicy Etiopiskeje, maja so wutworić wuměnjenja za myće rukow. Darowanska akcija započa so w adwenće a dale traje. Dotal su 3 800 eurow nazběrali.
Židźa nětko wěsćiši
Bamž chwali žurnalistow
Vatikan (B/SN). Nimo chwalby wupraja so bamž tež k strachej pohubjeńšaceje so kwality přinoškow ze stron žurnalistow. „Hdyž žurnalisća sej hižo swoje póduše njewotběhaja a so wjace z ludźimi njezetkawaja a jenož jedyn wot druheho kopěruja“, je to strašne wuwiće. Na cyrkwinskim swětowym dnju za komunikaciske srědki 24. januara chwaleše Franciskus njebojaznych a zmužitych žurnalistow, kotřiž so za demokratiju, za słabych a přesćěhanych zasadźeja.
Zakazać jadrowe brónje
Bonn (B/SN). Jako „wulku kročel doprědka do swěta bjez atomowych bróni“ je zamołwity za měr Ewangelskeje cyrkwje w Němskej Renke Brahms, zrěčenje UNO wo zakazu jadrowych bróni mjenował. „Mjez křesćanami z cyłeho swěta knježi přezjednosć, zo maja so wšitke atomowe brónje zničić. Woni su kruće přeswědčeni, zo njehodźa so atomowe brónje hižo wusprawnić.“ Dojednanje su lěta 2017 cyłkownje 53 krajow swěta pola UNO w New Yorku podpisali. Pjeć oficialnych atomowych mocow USA, Ruska, China, Francoska a Wulka Britaniska pak je dale wotpokazuja. Tež Němska njeje zrěčenju hišće přihłosowała.
Ćěkancy su podobizny Boha
Biskop rěči k njekřesćanam
Zhorjelc (B/SN). Biskop Wolfgang Ipolt ze Zhorjelca je so w nowolětnym postrowje na njekřesćanow swojeho biskopstwa wobroćił. „Přeju wam wšěm, zo so přeco zaso mjez sobu natykujeće z nadźiju, zo w kóždejžkuli njewěstosći tež paniskemu strachej spřećiwiće.“ Biskop Ipolt zakónči swój postrow ze słowami: „Jenož tak do noweho lěta so kopolić, abo samo ze strachom a starosćemi so do njeho podać njeje naš zaměr. Zwěrju sej z wami za zhromadnym směrom pytać.“
Namołwja k solidariće
Drježdźany (B/SN). Prezident Sakskeho krajneho sejma Matthias Rößler (CDU) wšitkich ludźi namołwja, za čas koronapandemije w solidariće njepopušćić. „Tež w lěće 2021 dźe wo ‚my‘, nic wo ‚ja‘, nic wo indiwidualnosć“, rjekny CDU-politikar w swojej nowolětnej narěči krajnemu sejmej. Dźe wo „lubosć k blišemu, wo mjezsobnu kedźbnosć na dobro towaršnosće, wo křesćanske hódnoty. Koronapandemija je katastrofa, kotraž so cyle pomału wotměwa. Njemóžeš wšitko na stat, na profesionelnych pomocnikow suwać“, rjekny ewangelsko-lutherski křesćan. „Wo koronadiktaturje rěčeć je njezamołwite.“
Přewod mrějacych zaručić
Skónčnje zakonsce rjadowane
Vatikan (B/SN). Bamž Franciskus je zakonsce noworjadował, zo smědźa žony oficialnje zastojnstwo lektorki abo pomocnicy při wudźělenju swjateho woprawjenja wukonjeć. Tež ministrantki smědźa nětko oficialnje k wołtarjej słužić. Ze změnu cyrkwinskeho prawa „Spiritus Domini“ kanon 230 § 1 cyrkwinskeho zakonja je po cyłym swěće wužiwana praksa skónčnje prawnisce rjadowana.
Pomhaja po cyłym swěće
Lipsk (B/SN). Skutk Gustava Adolfa (GAW) spěchuje lětsa cyłkownje 132 projektow w 50 wukrajnych partnerskich cyrkwjach z cyłkownje 1,6 milionami eurow. Hromadźe z direktnym partnerstwom regionalnych skupin GAW su pjenjezy składowali. Mjez projektami su 39 w Europje. Prezidentka GAW, prelatka Gabriele Wulz, wujasni, zo nochce pomocny skutk być jenož towarstwo „za twar cyrkwjow“, ale tež sotry a bratrow po wěrje podpěrać, jich wěru zachować a skrućić. GAW, załoženy 1832 w Lipsku, podpěruje protestantisku cyrkej w diasporje. Skutk dopomina na lutherskeho šwedskeho krala Gustava Adolfa II. (1594–1632).
Spěchuja chude dźěći
