Bamž do Šwedskeje

Dienstag, 09. Februar 2016 geschrieben von:

Vatikan (B/SN). Bamž Franciskus poda so 31. oktobra do Šwedskeje. Tam chce wón z nawodami Lutheroweho swětoweho zwjazka w Lundźe nawjedować ekumeniske wopominanske zarjadowanje k 500. róčnicy reformacije.

Myće nohow tež za žónske

Vatikan (B/SN). Bamž Franciskus změni za swětowu cyrkej oficialnje ritual myća nohow zeleny štwórtk. W přichodźe smědźa so tež žónskim a nic jenož mužam noze na Božej mši myć. Franciskus sam je hižo žónskim noze mył, bamžojo před nim běchu k tomu po tradiciji dwanaće měšnikow wuzwolili.

Putin přeprošuje Židow

Moskwa (B/SN). Ruski prezident Wladimir Putin je Židam w Europje poskićił, do Ruskeje wupućować. Nawodnistwo Europskeho židowskeho kongresa bě na rozmołwje w Krjemlu rozprawjało, zo je strach mjez europskimi Židami wulki před teroristami a radikalnymi prawicarskimi mocami. Ze Sowjetskeho zwjazka su Židźa emigrowali, nětko móžeja so woni zaso do Ruskeje nawróćić, dokelž je Putin fazu antisemitizma zakónčił.

Křesćenjo přimaja so bróni

Angažuja so za Boha a swět

Dienstag, 02. Februar 2016 geschrieben von:

Berlin (B/SN). W Němskej mamy po trochowanju Zwjazka němske załožby wjace hač 30 000 cyrkwinskich załožbow wšelakich prawniskich formow. Pod hesłom „Angažowane za Boha a swět“ wuda zwjazk knihu. Wona dawa wobšěrny dohlad do mnohotnosće cyrkwinskich załožbow, kotrež towaršnosć wobohaćeja.

Kak z ćěkancami wobchadźeć

Genf (B/SN). Zwjazkowy nutřkowny minister Thomas de Maizière (CDU) je warnował před towaršnostnymi konfliktami hladajo na ćěkancow. „Migracija ma tež swoju ćěmnu stronu“, rjekny de Maizière na konferency Ekumeniskeje rady cyrkwjow a UNO w Genfje. Knježerstwa měli strachi a starosće ludnosće chutnje brać. To nowe a cuze móhło tež křesćanow wohrozyć. Cyrkwjam Europy přicpěwa so nastupajo wobchad z ćěkancami wažna róla, rjekny de Maizière. Jako „rjap ciwilneje towaršnosće“ su to husto cyrkwinske wosady, kotrež pomhaja. Mnozy křesćenjo su čas a pjenjezy nałožili, zo bychu migrantow witali. Ze stron politiki, ciwilneje towaršnosće a priwatneho hospodarstwa pak ma so wjace činić.

Sta milionow migrantow

Bójska miłosć pomha

Dienstag, 26. Januar 2016 geschrieben von:

Vatikan (B/SN). Bamž Franciskus je ćěkancow na Pětrowym naměsće we Vatikanje postrowił. Wón apelowaše, při wšěch ćežach a wobstejnosćach zmužitosć njespušćić. „Njedajće sej wzać nadźiju do Boha a žiwjensku radosć, prudźacej z nazhonjenja Bójskeje miłosće.“

Křesćenjo přesćěhani

Kelkheim (B/SN). Po podaćach křesćanskeho pomocneho skutka Open doors je tuchwilu po cyłym swěće něhdźe 100 milionow křesćanow swojeje wěry dla přesćěhanych, rjekny nawoda skutka, Markus Rode na předstajenju Indeksa přesćěhanja na swěće w lěće 2016 w Kelkheimje. Statistika pokazuje na 50 krajow, w kotrychž su křesćenjo w swojej nabožinskej swobodźe najbóle wobmjezowani. Wona tež na to skedźbnja, zo je so ličba morjenych křesćanow wěry dla wot lěta 2013 nimale podwojiła. W 35 z podatych 50 krajow je islamski ekstremizm „hłowne ćěridło“ přesćěhanja. Po Indeksu swětoweho přesćěhanja steji na prěnim městnje komunistiska Sewjerna Koreja. Druhe městno zaběra Irak, třeće Eritrea.

Słuži „Mein Kampf“ jasnosći?

Dóstanu twarske přiražki

Dienstag, 19. Januar 2016 geschrieben von:

Drježdźany/Paderborn (B/SN). Přiražki 225 000 eurow za twar a saněrowanje chce Bonifacijowy skutk katolikow Němskeje lětsa w biskopstwje Drježdźany-Mišno wudać. Spěchowane budu třěcha z koporoweho blacha Drježdźanskeje cyrkwje Jězusoweje wutroby kaž tež nowotwaraj pěstowarnje Lipšćanskeje Carity w Reudnitzu-Thonbergu a při nowej propstowskej cyrkwi wosrjedź Lipska.

Bamž reformy dale wjedźe

Vatikan (B/SN). Bamž Franciskus žada sej kónc skandalow we Vatikanje. Romska kurija je „powołana z přikładom być“. Swjaty wótc wuzběhny swoju wolu, zo chce njedostatki we Vatikanje wotstronić a reformowy kurs dale wjesć.

Wućek do wuměłstwa

Drježdźany/Lipsk (B/SN). Drježdźanske wuměłstwowe zběrki planuja lětsa projekt pod hesłom „Cuzy“ w Lipšćanskim Grassijowym muzeju za ludowědu. Wuměłcy, wědomostnicy kaž tež ćěkancy su přeprošeni, wuwiwać prezentacije k nětčišim politiskim temam. Nimo toho přihotuje Grassijowy muzej wustajeńcu na temu „Ćěkańca“.

Historiska kročel cyrkwjow

Za přesćěhanych so modlili

Dienstag, 12. Januar 2016 geschrieben von:

Rom (B/SN). Syriska steješe w srjedźišću katolskeho „dnja modlenja za přesćěhanych křesćanow“ 26. decembra. Druhi dźeń hód su na wšěch Božich mšach wosebje spominali na bratrow a sotry wěry, kiž su po cyłym swěće wopory wumjezowanja a potłóčowanja. To zdźěli katolska Němska biskopska konferenca w Bonnje. 26. decembra je tež swjedźeń swjateho Šćěpana, prěnjeho martrarja křesćanstwa. Dźeń modlenja je dźěl lěta 2003 załoženeje iniciatiwy „Solidarita z přesćěhanymi a wobćežowanymi křesćanami w našim času“, z kotrejž skedźbnjeja biskopja kóžde lěto zjawnosć na diskriminaciju a přesćěhanje křesćanow po cyłym swěće.

Studijne městna za ćěkancow

Drježdźany (B/SN). Ewangelska wysoka šula Drježdźany skići wot lěća 2016 wosebite studijne městna ćěkancam w azylowym statusu. Dźesać městnow je za bachelorski studij socialne dźěło a elementarna pedagogika, wozjewi wysoka šula. Wona chce wukubłać fachowcow, „kotřiž skutkuja pozdźišo jako posrědkowarjo mjez kulturami a móža so na wysokim fachowym niwowje zanurić do integraciskeho skutkowanja“.

Wopory čakaja na wotrunanje

Ličba cyrkwjow přiběra

Dienstag, 05. Januar 2016 geschrieben von:

Berlin (B/SN). Na Kubje ličba cyrkwjow přiběra. Tole rjekny generalna sekretarka tamnišeje cyrkwinskeje rady Dámaris González Naranjo na zarjadowanju ewangelskeho pomocneho skutka „Chlěb za swět“ w Berlinje. Kubaske cyr­kwje drje nimaja eksaktne daty wo swojich sobustawach, González Naranjo pak z toho wuchadźa, zo přisłušnicy nabožnych zhromadźenstwow na Kubje mjeztym wjetšinu ludnosće wučinjeja. Kaž w druhich krajach Łaćonskeje Ameriki konstatuja tam rozšěrjenje swjatkownych cyrkwjow. Nimo toho nowe, fundamentalistiske a konserwatiwne nabožinske hibanja, sobuskutkowanje žónskich w cyrkwjach abo mjezynabožinski dialog wotpokazuja.

Ruska škita nabožinske spisy

Jednotu křesćanow spěchować

Dienstag, 29. Dezember 2015 geschrieben von:

Schwäbisch Gmünd (B/SN). „Ekumena martrarjow“ je najbóle přeswědčiwe swědčenje ewangelija. Tole zwurazni prezident Bamžowskeje rady k spěchowanju jednoty křesćanow, kardinal Kurt Koch, na kongresu „Přesćěhanje křesćanow dźensa“ w Schwäbisch Gmündźe. 650 ekspertow so tam wobdźěli. Po słowach Kocha „su martrarjo najwuznamniši dopokaz, zo hodźi so šćěpjenje přewinyć. Jich krej je tež symjo dospołneje ekumeniskeje jednoty křesćanow.“ A kardinal doda, zo njerozeznawaja přesćěharjo křesćanow mjez lutherskimi, druhimi ewangelskimi wěriwymi a katolikami.

Ličbu ćěkancow wobmjezować

Diakonija ćěkancow wita

Dienstag, 22. Dezember 2015 geschrieben von:

Drježdźany (B/SN). Prezident Němskeje diakonije Ulrich Lilie je połny nadźije zwuraznił, zo zwjazkowa republika wužadanja připućowacych ćěkancow dla zmištruje. „Smy jedyn z najbohatšich krajow swěta. Z toho wurosće winowatosć dźělenja“, rjekny wón tydźenja w Drježdźanach. Lilie bě do toho wopytał přebywarnju za ćěkancow-dźěći bjez staršich w Rodewischu a Drježdźansku poradźowarnju migrantow Cabana. Tam je hódnoćił angažement za ćěkancow a je čestnohamtskim pomocnikam rjap sylnił. „To je hodźina ciwilneje towaršnosće“, rjekny tam prezident. We wobchadźe z ćěkancami, a požadarjemi azyla měli předewšěm zarjadnistwa swoje zastojnske myslenje wotpołožić.

Namołwa k rjećazej swětła

Lipsk (B/SN). Tež klětu chce Lipsk jasnu poziciju přećiwo cuzemu a antiazylowemu nastajenju zabrać. Zwjazk zastupjerjow z politiki, towarstwow a cyrkwjow přeproša 11. januara 2016 k symboliskemu rjećazej swětła, kaž zdźěli to něhdyši farar Tomašoweje cyrkwje Christian Wolff. Wobdźělnicy měli so zasadźeć za čłowjekahódne přijeće ćěkancow a za zhromadne žiwjenje bjez namocy.

Zasłužbowy křiž spožčił

Dienstag, 15. Dezember 2015 geschrieben von:

Drježdźany (B/SN). Za wusahowacy angažement spožči ministerski prezident Sakskeje Stanisław Tilich (CDU) tydźenja dwanaće ludźom Zwjazkowy zasłužbowy křiž. „Woni z tym, štož činja, wosebje mosty mjez ludźimi twarja. Jich angažement twori zhromadnosć, kotruž naša towaršnosć trjeba“, rjekny Tilich na přepodaću wuznamjenjenja w Drježdźanach. Počesćeny bu tež Michael Kühn z Zwickauwa za swój lětdźesatki trajacy angažement za zachowanje tamnišeje Marijineje cyrkwje. Dalše wuznamjenjenje dósta teologa Hubertus Comak, kiž nawjeduje wot lěta 1999 Caritas w Zhorjelskej diecezy a so wosebje za ludźi z demencu zasadźuje.

Ćěkancam w nuzy pomhać

Drježdźany/ Lipsk/Magdeburg/Jena (B/SN). Katolske zwjazki studentow w Drježdźanach, Lipsku, Magdeburgu a Jenje su swojich sobustawow namołwjeli, křesćanskim ćěkancam pomhać, so w Němskej integrować. Studenća a něhdyši studenća planuja kmótřistwa, zo móhli po­trjechenych z najwažnišim zastarać, jich na zarjady a při pytanju dźěła přewodźeć, jich němčinu wučić a jim scyła styki wudźeržujo něšto nadźije spožčić.

Bedford-Strohm dale předsyda

Dienstag, 08. Dezember 2015 geschrieben von:

Bremen (B/SN). Bayerskeho krajneho biskopa Heinricha Bedforda-Strohma su na synodźe Ewangelskeje cyrkwje w Němskej jako předsydu jeje rady wobkrućili. Předsyda Němskeje biskopskeje konferency, kardinal Reinhard Marx, gratulowaše jemu ze słowami: „Bóle hač hdy do toho budźe trjeba, zo cyrkwje zhromadnje swoju poziciju w zjawnosći zastupuja.“ Hladajo na to, zo mataj wobaj swoje biskopske sydło w Mnichowje, Marx doda, zo „so z ekumenu krótkich pućow“ pokročuje.

Ćěkancow k hodam přeprosyć

Bad Blankenburg (B/SN). Němska ewangelska alianca křesćanow namołwja, sej ćěkancow k hodam do swójbow přeprosyć. Pod hesłom „Witajće hody k nam“ je hłowne předsydstwo ewangelikalneho třěšneho zwjazka přihotowało infołopjena a film wo Jězusu. Tole ma křesćanow a ćěkancow pozbudźić „k rozmołwje a wuměnje myslow w přećelnej a hospodliwej atmosferje. W rozmołwje z muslimskimi ćěkancami „njetrjebamy swoju křesćansku wěru zamjelčeć“, rjekny­ generalny sekretar Ewangelskeje aliancy Hartmut Steeb.

Biskop Neymeyr kritizuje CDU

Anzeige