Jako wojak w Litawskej
Jan Kliman přisłuša mjezynarodnej bojowniskej skupinje NATO
Rukla (StŠ/SN). „Nam wšitkim je jasne, čehodla smy tu w Litawskej. Nimo stajnych zwučowanjow a manewrow staramy so wo naše pancery a hdys a hdys zwostanje tež kusk chwile, sej kraj a wokolinu wobhladać“, Jan Kliman powěda.
Wot julija je młody Serb jako čłon panceroweje brigady 93 němskeho wójska w Litawskej stacioněrowany. Wuchodźiwši Serbski gymnazij w Budyšinje njeměješe prawy plan za sebje a swójski přichod. Tohodla dźěše do wójska, hdźež bu wonej brigadźe w Munsteru přirjadowany. Po jednym lěće so Prawočan rozsudźi, dalše lěto we wójsku wostać. Z tym bě jasne, zo na wěsty čas tež do wukraja póńdźe. „Njejsym rozsud dotal ženje wobžarował. Wězo njeběštaj mać a nan wulce zbožownaj, jako jimaj powědach, zo mje na poł lěta do Litawskeje přesadźa. Tež wonaj wěstaj wo přičinach, čehodla tu němske wójsko scyła je. Přiwšěm pak mje stajnje podpěrataj“, wón zwurazni.
Roschek za prezidentku Michałkowu
Kancler Merz je wokrjesnym předsydam CDU wobkrućił, zo budźe žonu za zastojnstwo zwjazkoweho prezidenta namjetować. Steffen Roschek, Budyski wokrjesny šef CDU, faworizuje wosobinu z Łužicy, kaž nam zdźěli.
Berlin/Budyšin (SN/mb). Friedrich Merz, zwjazkowy kancler a předsyda CDU, je dwudnjowske wuradźowanja wokrjesnych předsydow křesćanskich demokratow z wjednistwom strony a jeje frakcije w zwjazkowym sejmje wužił, zo by so hišće raz jasnje wuprajił: Němska njech dóstanje prěni raz žonu jako zwjazkowu prezidentku. A wón čuje so kompetentny, za to wosobinu namjetować. Štó pak to budźe, hišće přeradźił njeje. Steffen Roschek, předsyda Budyskeho wokrjesneho zwjazka CDU, je w rozmołwje z našim wječornikom wčera po kóncu termina w Konrada Adenauerowym domje, centrali CDU Němskeje, wosobinu mjenował, kotraž by so po jeho měnjenju derje za zastojnstwo hodźała: Marju Michałkowu.
Mjenje běrokratije w Sakskej
Drježdźany (SN). Sakski kabinet je wčera naćisk sakskeho zakonja za wotstronjenje běrokratije kaž tež modernizaciju stata schwalił a Sakskemu krajnemu sejmej dale sposrědkował. Zakoń wolóža mjez druhim zarjadniske procesy přizwolenja a dowolnosćow. Tak je na přikład próstwa na sakskim zarjedźe zasadnje přizwolena, jeli zarjadnicy w běhu třoch měsacow wo njej rozsudźili njejsu.
Lěwicarska skupina wobskoržena
Drježdźany (SN). Zastojnicy policije su wčera rano w městach we wjacorych zwjazkowych krajach, mjez druhim w Drježdźanach, Šwikawje a Lipsku, koordinowane přepytowanske akcije přećiwo lěwicarskej skupinje Kolektiw Šwikawa přewjedli a pjeć ludźi zajeli. Wutworjenja kriminelneho zjednoćenstwa dla je dohromady dwanaće wosobow wobskorženych. Sakske statne rěčnistwo mjenuje 55 skućićelstwow, za kotrež je skupina zamołwita.
Zwučuja za krizu wobswěta
Wosom studowacych Techniskeje uniwersity w Liberecu je sej dźensa ...
LEAG dóstanje spěchowanje
Starosća so wo přichod
Demokraća mjezywólby dobyli
Washington (dpa/SN). Demokraća su we wčerawšich mjezywólbach w USA we woběmaj komoromaj kongresa po dotalnych wuslědkach wjetšinu docpěli. W Domje reprezentantow z dohromady 435 sydłami su sej znajmjeńša 221 sydłow zdobyli. W druhej komorje kongresa, w senaće, maja demokraća po tuchwilnych wuslědkach 54 městnow, republikanojo jenož 42. Z někotrych zwjazkowych statow USA pak mjezywuslědki wuličenjow hłosow tuchwilu hišće njepředleža. Demokraća běchu tež w zwjazkowych statach wuspěšni, hdźež woli wjetšina wobydlerjow hewak republikanow, kaž w Texasu, Kansasu abo South Carolina.
Z wjetšinu we woběmaj komoromaj kongresa móže so strona demokratow nětko skutkownje přećiwo předewzaćam knježerstwa pod nawodom Trumpa wobarać – mjez druhim z tym, zo změny zakonjow blokuje. Trump gratulowaše dobyćerskej stronje a přizna, zo su we wólbnym boju wočiwidnje „derje dźěłali“. Jako wosobinsku poražku wón wuslědk wólbow njehódnoćeše.
Jasna njejasnosć
Wšěch swjatych w Pólskej
To a tamne (04.11.26)
Byk Achilleo a wosoł Patroclo stej mjez slědźerjemi uniwersity w Pisy zadźiwanje budźiłoj. Hačkuli móhłoj sej muskej skoćeći w swojej wokolinje bjeze wšeho partnerku swójskeje družiny wuzwolić, pěstujetej hižo dlěši čas mjezsobny lubosćinski poćah. Wo tym rozprawjeja italscy wědomostnicy w fachowym časopisu Current biology. „Matej intensiwne seksuelne interakcije a dobre wobstajne mjezsobne socialne styki“, woni podšmórnu.
Spisowaćel a moler Janosch je wčera w starobje 95 lět w swojim domje na španiskej kupje Teneriffje zemrěł. To nawoda nakładnistwa, w kotrymž su jeho knihi wuchadźeli, Bernhard Feil wčera w nowinskej zdźělence w nadawku swójby zdźěli. Janoschowe ilustrowane dźěćace knihi wo tigrje a baru drje su po wšěm swěće znate. Dohromady je wón 150 w 40 rěčach wušłych knihow spisał.
