Jenož hišće dwě hrě, potom je lětuše swětowe mišterstwo w kopańcy w USA, Kanadźe a Mexiku tež hižo zaso nimo. Sobotu wo­jujetej wubrance Francoskeje a Jendźelskeje wo třeće městno, dźeń pozdźišo wotměje so wulke finale mjez Španiskej a Argentinskej.

Njedźelu skónči so potajkim dotal najwjetše swětowe mišterstwo, na kotrymž je 48 narodnych mustwow w běhu 39 dnjow w 16 stadionach třoch krajow dohromady 104 hrow absolwowało. Startowali běchu 11. junija w swětoznatym stadionje Actekow w stolicy Mexika. Tam wotmě so prěnja hra mjez mustwomaj Mexika a Južneje Afriki. Z njeje zahaji so dosć kuriozny turněr – a to na trawniku kaž tež zboka njeho. Tak wobdźěli so na přikład prěni raz kupowy kraj Curaçao, kotryž ma jenož 155 000 wobydlerjow, jako­ najmjeńši stat na mišterstwje. Wjele je so wo nowej přidatnej přestawce w kóždym połčasu hry – „hydration break“ – diskutowało­. Běchu to woprawdźe pitne přestawki abo jenož wabjenske přetorhnjenja za někotryžkuli sćelak?

Na Lipšćanskich knižnych wikach klětu chcedźa město jeničkeho hóstneho kraja hnydom tři kraje jako tematiske ćežišćo zarjadowanja prezentować. Su to Pólska, Francoska a Němska. To je w stawiznach wikow nowum. Z rozsudom „wzdawaja so organizatorojo předstawy pozdatneje homogeneje­ narodneje literatury. Zhromadny hóstny wustup podšmórnje mjezsobny dialog, solidaritu a zhromadne dźěło. To je wažniše hač hdy prjedy“, we wčerawšej nowinskej zdźělence pisaja.

Marla Svenja Liebich, zasudźena neonacistka, kotruž běchu w susodnej Čěskej zajeli, su předwčerawšim do žónskeho jastwa w Kamjenicy dowjezli. Nawodnistwo jastwa pak je nětko rozsudźiło, zo ju do muskeho trakta přepołoža. Přećiwo tomu pak so jata wobara, wšako běše swój splah wot muskeho na žónski přepisać dał(a).

Napjaty poměr k Ukrainje horca tema w medijach a w parlamenće EU

Waršawa. Za Pólsku wulce problematiski rozsud Wolodymyra Zelenskeho ze 27. meje je hobersku žołmu kritiki w kraju zbudźił. Zo by bojowniskosć swojeho wójska, kotrež so mjeztym štyri lěta Ruskej spřećiwja, zesylnił, je ukrainski prezident wozjewił, zo spožči elitarnej wojerskej jednotce mjeno Rjekojo UPA. Z tym poćahuje so na ukrainsku zběžkarsku armeju w Druhej swětowej wójnje, wojowaca wo njewotwisnosć swo­jeho kraja. Polacy pak njejsu zabyli, zo běchu partizanske jednotki UPA w lětach 1943 do 1945 tež přećiwo pólskim wobydlerjam w pasmje wojewódstwa Wołyń (nětčiša zapadna Ukraina) zachadźeli, njezasłužejo sej na žadyn pad „rje­kowske“ wuznamjenjenje. „Z njesměrnej bestialnosću­ mordowaše UPA pólske dźěći, žony a starcow“, pisa na portalu X rozhorjeny bywši premier Leszek Miller. Tehdyše masowe morjenje žadaše sej něhdźe 100 000 smjertnych woporow njewobrónjeneje ludnosće.