Personalna rochada dale traje
Berlin (dpa/SN). Po dny trajacej njewěstosći wo nowowobsadźenju pozicije zwjazkoweho wobchadneho ministra je kancler Friedrich Merz nětko rozsudźił, zo ma dotalny parlamentariski jednaćel frakcije Unije w Zwjazkowym sejmje Steffen Bilger (wobaj CDU) zastojnstwo přewzać. To zdźěli rěčnik knježerstwa Stefan Kornelius. 47lětneho Badensko-Württembergčana pomjenuje zwjazkowy prezident Frank-Walter Steinmeier (SPD) prawdźepodobnje srjedu. Samsny dźeń pušći wón tež dotalneho ministra za wobchad Patricka Schniedera. Z tym je wažna pozicija w knježerstwje skónčnje znowa wobsadźena. Wšako bě Merz Schniederej hižo zašły štwórtk zdźělił, zo jeho hižo jako ministra měć nochce. Samsny dźeń bě kancler Merz zapósłancej zwjazkoweho sejma Fritzej Güntzlerej zastojnstwo poskićił. Tón pak nadawk njepřiwza, dokelž na swójskej kwalifikaciji dwělowaše.
Smjertny nadpad šokěruje
Awto bě na kromje CSD w Berlinje do ludźi zrazyło – skućićela su zatřělili
Berlin (dpa/SN). Po pozdatnje islamistisce motiwowanym nadpadźe poboku swjedźenja Christopher Street Day (CSD) sobotu w Berlinje su zastojnicy policije podhladneho zatřělili. To zdźěli policija. W arealu z wjacorymi zahrodkami bě so pozdatny amokowy nadběhowar zastojnikam z nožom bližił. Na to jeho specialna jednotka policije SEK zatřěli. „Najebać reanimacije wón hišće na městnje wudycha“, rjekny policija. Nětko sej wjacori ludźo žadaja, zo maja njeskutk prawje wujasnić a z prawniskimi konsekwencami pochłostać. Wosebje prašenje, čehodla bě pozdatny skućićel najebać hižo płaćiweho zasudźenja hišće swobodny, dyrbja přepytować.
Dokładnišo hladać!
Naprawy lětsa wobzamknyć
Wolfsburg (dpa/SN). Šef koncerna VW Oliver Blume chce nowe lutowanske naprawy hišće lětsa wobzamknyć. Hač do kónca lěta chce wón je z dohladowanskej radu wudźěłać, wujasni Blume w interviewje z Němskej powěsćernju dpa.
Před tydźenjomaj běchu plany za lutowanja prěni raz w dohladowanskej radźe koncerna wobjednawali. To je mjez dźěłopřijimarjemi wulku kritiku a spjećowanje wubudźiło. Lutowanja móhli přidatnje štyri twornje a hač do 50 000 městnow potrjechić. Kontrolny organ je so před tydźenjomaj prěni raz wobšěrnje z temu zaběrał, rjekny Blume. „Tam běchu jara konstruktiwne, ale tež kontrowersne diskusije. Njejsmy hišće ničo wobzamknyli“, wón rozjasni. Po rozprawach drje je gremij plany we wothłosowanju jasnje wotpokazał.
W septembrje planuja dalše tajke posedźenje, Blume připowědźi. „Sym wo tym přeswědčeny. Dokelž su lutowanske naprawy chětro wobšěrne, su hišće dalše wuradźowanja trěbne“, šef koncerna zwurazni. Wón je nadźijepołny a měni, zo so jim wšitko hač do kónca lěta poradźi: „To dyrbi lětsa być“.
Palaisowe lěćo so kóncej chila
Płaćizny móhli dale stupać
To a tamne (27.07.26)
W sewjernej Pólskej, njedaloko města Toruń, we wsy Konotopie rosće jedna z najwjetšich sakralnych statuwow w Europje. Plastika Bolosćiweje Maćerje Božeje budźe hišće wyša hač znata Jězusowa statua pola města Świebodzin. Sama swjata Marija je 40 metrow wysoka, jeje stejadło potom hišće 55,6 metrow – tak budźe to najwjetša swjata Marka w Europje. Priwatny projekt wuškrěwanskeho miliardara Romana Karkosika a jeho mandźelskeje Grażyny twarja po jich słowach „jako podźakowanje“.
We Venedigu su testowu fazu zastupneho pjenjeza do města zakónčili. Dohromady su wot spočatka lěta wjace hač pjeć milionow eurow zasłužili. Město zdźěli, zo su sej wot dohromady 650 000 wopytowarjow za jedyn dźeń w měsće dźesać eurow žadali. Za tych, kiž su sej tiket zahe dosć knihowali, bě popłatk tuńši.
Hašenje baterijow wužadanje było
Z dotal njeznatych přičin je so wutoru popołdnju skład baterijow na Schliebenowej w Budyšinje zapalił (SN rozprawjachu). W bliskosći palacych so kontejnerow bydlacy měšćenjo njesmědźachu hač do wčerawšeho popołdnja do swojich bydlenjow. W kontejnerach běchu litium-ionowe baterije, kotrež jědojte maćizny do powětra wotedawachu.
Budyšin. (SN/jp) Baterije z litium-ionow, kiž běchu so zapalili, reaguja na móličke chabłanja miliny a je w krótkim času wurunaja. Woheń w tutym rozměrje a z tutymi maćiznami w Němskej dotal wudyrił njebě. Tuž bě zasadźenje premjera za wohnjowych wobornikow a wšě wobdźělene wuchowanske mocy. Tohodla běše za nich ćežko, wotběhi prawje rjadować a dyrbjachu wusko z ekspertami za baterije hromadźe dźěłać.
Nuzowy staw wohenjow dla
Madrid (dpa/SN). Ćežkich lěsnych wohenjow dla je Španiska za wokolinu stolicy Madrida a dalši region nuzowy staw wuwołała. Nutřkowne ministerstwo je w nocy připowědźiło, zo sćele dalšich pomocnikow k wotwobaranju płomjenjow. Operatiwne komando je wojerska krizowa jednotka přewzała, kotraž je nětko direktnje při knježerstwje zarjadowana. Zdobom steji z wuwołanjom nuzoweho stawa narodneho rozměra wjace pjenjez k dispoziciji. Wohenjow dla dyrbješe wjace hač 11 500 ludźi swoje domy wopušćić.
Skućićelow krajam přepodali
Drježdźany (dpa/SN). Wot spočatka zašłeho lěta su wěstotne mocy 102 mjezynarodnje pytanych abo zasudźenych skućićelow ze Sakskeje do wukraja přepodali. Wo dalšich 63 wosobach na Drježdźanskim generalnym statnym rěčnistwje jednaja, zarjad dźensa zdźěli. Informacije poćahuja so na dobu wot 1. januara 2025 do 18. julija 2026. Skućićelow su nimale wšitkim krajam EU, tež statam kaž Norwegskej, Šwicarskej, Moldawskej, Turkowskej abo Wulkej Britaniskej přepodali.
Ludźo mało kupuja
