Berlin (dpa/SN). Zwjazkowy minister za nutřkowne naležnosće Alexander Dobrindt (CSU) je po smjertnym nadpadźe na studenta w Trieru potwjerdźił, zo so dale za to zasadźuje, chłostajomnych do Afghanistana wotsunyć. Towaršnosć ma prosće prawo na to, wón podšmórny. Minjenu srjedu je Afghaničan 22lětneho studenta w Trieru blisko uniwersity zakłół. Z njeznatych přičin je znajmjeńša dwójce z kuchinskim nožom do studenta kałnył.

Po smjertnym nadpadźe je zwjazkowy kancler Friedrich Merz (CDU) na swójbu wopora zazwonił. „To bě emocionalna rozmołwa“, nan morjeneho Thomas Dick zwurazni. Předewšěm mać swójby je za stronu CDU skutkowała. Staršej wojujetaj nětko za to, zo so tajki njeskutk nihdy njewospjetuje. Tole staj tež Merzej sposrědkowałoj.

Po informacijach porynsko-pfalcowskeho nutřkowneho ministerstwa bydli podhladny hižo dlěje hač dźesać lět w Němskej. Wón bě jako dźěćo bjez přewoda sem přišoł. Próstwu wo azyl drje su zarjady w lěće 2017 wotpokazali, přiwšěm pak zwěsćichu, zo njemóže so z kraja wupokazać.

Mje je přeco hižo estetisce myliło, hdyž dyrbjach na dróze ludźom přihladować, kotřiž swój fastfood do so tykaja (najebać to, zo sym to druhdy tež činił). Nochcemy to radšo zakazać? Singapur pokazuje, što je wšo móžno. Tam njesměš žwjenkačk ani w zaku měć, wšako móhł jón ewentualnje na ławku w parku zlěpić. Tež při wobmjezowanju kurjenja pod hołym njebjom mamy hišće wulke rezerwy. Čehodla njepłaći pakćik cigaretkow dawno sto eurow? W Berlinje sej Zeleni a druzy wagony za žony w U- a S-ćahach žadaja, to tola tež we wšelakich muslimiskich krajach funguje. A zo so hólcy w lěću na open-air-koncerće T-shirt sleku, je mjeztym w Němskej dale a husćišo zakazane. Za čas młodosće sym sej druhdy hodźiny čakanja w nocy na dwórnišćach z nopaškom čerwjeneho wina wolóžił – mjeztym wobhladuje so tajke něšto jako asocialne resp. ma so zasadnje zakazać. Někotři maja to wšo za postup ciwilizacije. Mam za legitimne, na tym dwělować. Marcel Brauman

Magdeburg/Berlin (dpa/SN). Štóž je po puću a pyta online za hosćencom abo hotelom, orientuje so husto po recensijach na Google Maps a po tym, z kelko hwězdami buchu domy tam hódnoćene. Pola někotrych hosćencow a hotelow Google hižo dlěje na to skedźbnja, zo buchu hódnoćenja w zašłych lětach wotstronjene. Z tutym pokiwom chce so Google wo wjac transparency hladajo na posudki w syći starać.

Z testa Němskeje powěsćernje (dpa) mjez wjace hač 3 700 hosćencami a hotelemi wuchadźa, zo su posudki na mnohich stronach wotstronjene. Zdobom přepytowanje wotbłyšćuje, zo jewi so pokiw na wotstronjenje we wjetšich městach husćišo hač w mjeńšich sydlišćach. W Lipsku měješe něhdźe 20 procentow profilow tajki pokiw. W Drježdźanach, Halle a Magdeburgu bě to stajnje něhdźe 15 proc. a w Erfurće něhdźe 13 proc. profilow, kotrež je dpa přepytowała. W Berlinje, Kölnje a Frankfurće běše samo něhdźe kóždy třeći zawod potrjecheny. Porno tomu wučinješe podźěl w mjeńšich městach ně­hdźe dźesać procentow a we Wittenbergu a Stendalu jenož pjeć procentow.

Dźensa dokónči Ralbičanski farar, kanonik Šćěpan Delan, swoje 70. žiwjenske lěto. Po rańšim postrowje pěstowarskich dźěći jemu duchowni sobubratřa w připołdnišich hodźinach k jubilejej gratulowachu. Na pózdnim popołdnju swjeći farar Delan ze swojej wosadu, w kotrejž mjeztym nimale­ jědnaće lět skutkuje. Do toho běše wón 18 lět w Radworju z fararjom. Wot 2011 přisłuša Drježdźanskemu tachantskemu kapitlej­ swjateho Pětra, wot 2024 je zdobom­ čestny kanonik w Litoměřickim katedralnym­ kapitlu swjateho Šćěpana. Foto: Konstantin Hrjehor