Lěwica rozsudźi wo rozmołwach
Forum akcenty sadźił a na bohatosć Łužicy pokazał
Mužakow (SN/bn). Mjeztym štwórty Łužiski kulturny forum je so minjenu wutoru w Mužakowskim hrodźe wotměł. Zarjadowanje krajow Braniborska a Sakska měrješe so na akterow a akterki z wuměłstwa, kultury, kreatiwneho hospodarstwa, kulturneho zarjadnistwa a kulturneje politiki we Łužicy a měješe tomu słužić, „zaměry Kulturneho plana Łužica sćěhować“, w zdźělence Koordinowanišća za wuwiće kultury we Łužicy rěka. Ćežišćo lětsa bě, nawjazujo na diskusije zašłych kulturnych forumow „wěnować so wosebitym kwalitam Łužicy a jeje bohatej, mnohostronskej kulturnej krajinje“ a diskutować wo tym, „kak hodźeli so tudyše potenciale dale wuwiwać a z kotrymi idejemi, formatami a srědkami móhli region slědowacym generacijam naslědnje zawostajeć“.
Bywšu situaciju mjeńšin rozjimali
Zabrze (SN). „Mjeńšiny za železnym zawěškom. Balast abo žórło identity?“ běše tema mjezynarodneje konferency w pólskim měsće Zabrze we wójwodstwje Šleska, na kotrejž je so srjedu a štwórtk něhdźe dwanatk wědomostnicow a wědomostnikow z Pólskeje, Němskeje, Čěskeje a Madźarskeje wobdźělił. W srjedźišću steješe rozdźělna politika komunistiskich statow napřećo swojim narodnym mjeńšinam w dobje zymneje wójny. Referenća rozjimachu mjez druhim tehdyšu situaciju pólskeju mjeńšinow Kašubow a Łemkow abo mjeńšiny Němcow w Rumunskej, Madźarskej a něhdyšej Juhosłowjanskej.
Za Serbski institut, kotryž konferencu zhromadnje ze slědźenskim centrumom němskeje mjeńšiny w Opolu zarjadowaše, wobdźělištaj so stawiznarjej dr. Edmund Pjech a dr. Friedrich Pollack. Pod hesłom „Mjez spěchowanjom a kontrolu – wosebite pady“ přednošowaše dr. Edmund Pjech wo mjeńšinowej politice NDR napřećo Serbam. Dr. Friedrich Pollack moderěrowaše jednu z fachowych podijowych diskusijow konferency.
To a tamne (25.09.26)
Na rasistiske nadpady před 35 lětami spominali
Wojerecy (AK/SN). „Nazyma 1991 – Wojerecy njezabudu – dopominamy so“ je na pomniku we Wojerowskim Centralnym parku napisane. Tam su so wčera wobydlerjo a zastupjerjo města zešli, zo bychu na wopory nadpadow Wojerowčanow na přebytki wukrajnych dźěłaćerjow a požadarjow wo azyl před 35 lětami spominali. Při tym bě so 32 ludźi z wukraja zdźěla ćežko zraniło.
Wojerowski wyši měšćanosta Torsten Ruban-Zeh (SPD) předčita mjez druhim postrowne słowa bywšeho dźěłaćerja Davida Macouwa z Mosambika, kotryž bě ataki wosobinsce sobu dožiwił.
Na tragiske podawki mjez 17. a 23. septembrom 1991 nochcedźa Wojerowčenjo zabyć. To zwuraznjeja z wjacorymi projektami na wšelakich městnach w měsće. Jedyn z nich je wustajeńca z titulom „See my story. Copyright by Madgermanes“ we Łužiskim centeru, kotraž předstaja wosudy něhdźe 20 000 mosambikskich dźěłaćerjow w času mjez 1979 a 1990 w NDR. Dohromady dwanaće fotografiskich a šěsć widejowych portretow tutych dźěłaćerjow wopytowar tam nadeńdźe.
Žadaja sej wospjet nowe regule
Berlin (dpa/SN). Skupina zapósłancow zwjazkoweho sejma prócuje so wospjet wo změnu prawidłow darjenja organow. Konkretnje žadaja sej w namjeće tak mjenowane prawidło znapřećiwjenja. To woznamjenja za dorosćenych: Kóždy je po swojej smjerći awtomatisce darićel organow, hdyž njeje tomu eksplicitnje znapřećiwił. W parlamenće pak je tež napřećiwneho namjeta. Politikarki a politikarjo so hižo třeći raz wo změnu prócuja. 2020 běchu ze swojim namjetom zwrěšćili a loni njebě sejm hižo wo namjeće wothłosował, dokelž běchu wólby do sejma zašo hač poprawom planowane.
Mjenje smjertnych woporow
Wiesbaden (dpa/SN). 1,26 milionow wobchadnych njezbožow je so w prěnim połlěće tohole lěta stało. Tole je 2,6 procentow wjace hač samsny čas loni, zdźěla zwjazkowy zarjad za statistiku na zakładźe dotalnych datow. Za to pak je mjenje ludźi swoje žiwjenje při njezbožach přisadźiło: Dohromady bě jich lětsa 1233 a z tym 122 mjenje hač w prěnich šěsć měsacach 2025. Tež zranjenych bě štyri procenty mjenje, mjenujcy 172 000. Jenož z e-scooterami bě wjac smjertnych woporow.
