Nalěćo hižo raz dožiwić móhli
Falowacy ludźo firmy starosća
Frankfurt/ n. M. (dpa/SN). Pobrachowace fachowe mocy zawinuja w mnohich srjedźostawskich zawodach tójšto problemow – někotři starosća so samo wo eksistencu. Nimale 60 procentow srjedźostawskich předewzaćow wočakuje po naprašowanju spěchowanskeje banki KfW w přichodnych pjeć lětach ćeže při wobsadźenju swobodnych městnow. Třećina (33 procentow) měni, zo je jeje eksistenca falowacych dźěłowych mocow dla dołhodobnje wohrožena. „Wosebje małe zawody tónle starosć zwuraznjeja“, piše KfW w swojim posudku.
Předewzaća chcedźa na połoženje ze swójskimi aktiwitami reagować. Něhdźe 80 procentow firmow so prócuje, swoju atraktiwitu jako dźěłodawar polěpšić. 67 procentow chce mzdy zwyšić, 59 procentow planuje fleksibelne dźěłowe časy a městnosće. 53 procentow firmow mysli na dalekubłanske poskitki za swojich přistajenych.
Porno tomu planuje z runje 22 procentami jenož jara mało předewzaćelow rozšěrjenje poskitka hladanja dźěći. Wukrajne dźěłowe mocy nawabić chce 25 procentow předewzaćow.
To a tamne (12.03.25)
W spěšniku dźěćo porodźiła je žona w Francoskej. Při njewočakowanym porodźe pomhaštaj jej lěkarjej, kotrajž běštaj tohorunja z ćahom po puću. Holčka Kléa so strowa narodźi. Poprawom wočakowachu dźěćo hakle přichodny tydźeń. Poroda dla zadźeržany spěšnik hakle dwě hodźinje pozdźišo hač planowane do Parisa dojědźe.
Wjace hač 150 000 razow je mjezynarodna swětnišćowa stacija ISS zemju wobkružiła. Minjenych 26 lět je stacija 6,4 miliardy kilometrow lećała, ruska powěsćernja Tass zdźěla. Na swětnišćowej staciji ISS dźěłaja Ruska, USA, Kanada, Japanska a europska swětnišćowa agentura ESA hromadźe. Wědomostny wulkoprojekt najebać wójnu Ruskeje přećiwo Ukrainje dale pokročuja. Stacija leći 400 kilometrow nad zemju.
Ver.di připowědźa dalše stawki
Berlin (dpa/SN). Po dosć skutkownych warnowanskich stawkach na wulkich lětanišćach Němskeje měri so dźěłarnistwo ver.di nětko na dalše wobłuki zjawneje słužby. Přichodne dny su přistajeni zjawneje słužby wot wotpadkowych zawodow hač k rěčnym zarjadnistwam k stawkam namołwjeni. Mjez přistajenymi knježi „maksimalne rozhorjenje“, zo njejsu dźěłodawarjo přeco hišće žadyn poskitk předpołožili, dźěłarnistwo rjekny.
Bamž po puću polěpšenja
Rom (dpa/SN). Po wjace hač třoch tydźenjach w chorowni njeje bamž Francisku po posudku lěkarjow hižo w smjertnym straše. Tole wuchadźa z lěkarskeje rozprawy, kotruž su wčera wječor wozjewili. 88lětny pak dyrbi zahorjenja płucow dla dale w chorowni Gemelli wostać. Lěkarjo pak su cyłkownje spokojom. „Polěpšenja minjenych dnjow su so dale skrućili.“ Bamž na zasadźene lěki pozitiwnje reaguje, chorownja zdźěla.
Kurdojo w Syriskej připóznaći
Ze sylzami we wočomaj dźerži Starlette Thomas kusk betona w ...
Rubio optimistiski
Nadpad trutow na Moskwu
Planuja měrowu jednotku w Ukrainje
Paris (dpa/SN). Šefojo generalnych stabow podpěraćelskich krajow Ukrainy wuradźuja dźensa w Parisu wo měrowej jednotce, kiž by móžny přiměr w Ukrainje zaručiła. Francoski prezident Emmanuel Macron organizuje zetkanje, na kotrymž generalny inspektor zwjazkoweje wobory Carsten Breuer Němsku zastupuje. Tež Wulka Britaniska a Pólska so na zetkanju wobdźělitej. Dospołna lisćina wobdźělnikow njeje znata. Hižo zwoprědka běchu zdźělili, zo zjawnosć wo wuslědkach njeinformuja.
Zakład wuradźowanjow su wot Francoskeje a Wulkeje Britaniskeje nastorčene plany měroweje jednotki, kotrež móhli dźěl wěstotnych garantijow być, kiž sej Ukraina žada. W tym zwisku rěča tež wo wojerskich srědkach za ukrainske wójsko a wo składach brónjow w europskich krajach k zastaranju wojakow.
Ruska wojakow NATO w Ukrainje wotpokazuje. Wonkowny minister Sergej Lawrow je Francosku namołwjał, zo njesměła na to zabyć, kak je so nadpad Napoleona 1812 na Rusku skónčił.
Zeleni so planam wobaraja
Financny paket noweje koalicije wohroženy – prócowanja wo rozmołwy
Berlin (dpa/SN). Zeleni nochcedźa planowanemu, miliardy eurow wopřijacemu financnemu paketej na dobro zakitowanja a infrastruktury w aktualnej formje přihłosować. Předsydka frakcije Zelenych w zwjazkowym sejmje Katharina Dröge rjekny wčera w Berlinje, zo chce wona frakciji zhromadnje z městopředsydku frakcije Brittu Haßelmann namjetować, plany wotpokazać.
Dröge na to pokaza, zo su Zeleni za zasadnu reformu mjezy zadołženja, zo njemóhła Němska jenož swoju wěstotu zaručić, ale zo by tež srědki za na přichod wusměrjenu infrastrukturu a moderne hospodarstwo měła. Zeleni pak wotpokazuja, wólbne dary mjez wolerjemi rozdźěleć. „Wolfgang Schäuble by so w rowje wobroćił, by-li wón widźał, kak chce CDU mjezu zadołženja změnić, zo móhła dawkowe dobroty financować“, rjekny předsydka Zelenych Franziska Brantner nowinarjam.
