Berlin/Magdeburg (dpa/SN). Ličba próstwow wo financnu podpěru za agrarny diesel je minjene lěta jasnje woteběrała. Mjeztym zo bě w lěće 2021 po cyłym Zwjazku 165 975 próstwow wo podpěru dóšło, registrowaše zwjazkowe cłowne zarjadnistwo w lěće 2024 jenož hišće 136 628 próstwow, to je něhdźe 18 procentow mjenje. Ličby za hospodarske lěto 2025 hišće njepředleža. Zwjazki burow pak na to­ skedźbnjeja, zo tute wuwiće njewoznamjenja, zo subwencije za agrarny diesel hižo trěbne njejsu.

W decembrje 2023 běše wotstronjenje tuteje subwencije přez amplowu koaliciju protesty ratarjow po cyłej Němskej zbudźiło. Nowa čorno-čerwjena koalicija je ju spočatk lěta zaso zawjedła.

Berlin (dpa/SN). W času diskusijow wo personalnej změnje na čole knježerstwa je zwjazkowy kancler Friedrich Merz (CDU) swoje wobdźělenje na generalnej debaće Zjednoćenych narodow (UN) wotprajił, kotraž so přichodny tydźeń srjedu w New Yorku wotměje. „Prezenca kanclera w Berlinje je tele dny nuznje trěbna“, zwjazkowe knježerstwo w nowinskej zdźělence piše. Wólby krajneju sejmow w Mecklenburgsko-Předpomorskej a Berlinje přichodnu njedźelu stej podawkaj, kotrejž budźetej politiski přichod kanclera prawdźepodobnje sylnje wowliwować. Po wólbnym debaklu CDU we wólbach w Saksko-Anhaltskej před połdra tydźenjom ćišć na njeho dźeń a bóle přiběra, a to tež w swójskej stronje.

Na dnju předewzaćelow wikowanskeho zwjazka BGA je Merz wčera w Berlinje připowědźił, zo chce so w zwisku ze spochi stupacymi płaćiznami za ćěriwa z naprawami wo wolóženje za šoferow starać. Z kotrymi, to dotal jasne njeje.

Wjele je so zašłe lěta wo „wirtuelnym“ resp. „digitalnym Serbstwje“ debatowało. Mjeztym smy wšitcy zaso přizemili, wšako wěmy: Digitalne poćahi tam najlěpje funguja, hdźež su sej ludźo tež wšědny dźeń bliscy. A mnoho serbskich swójbow je so z Drježdźan a druhich kónčin zwonka Łužicy dawno na „serbsku zemju“ nawróćiło. Wulka wjetšina tych, kotřiž so tuchwilu na wukubłanje w dalinje hotuja, chce stajny zwisk z domiznu wudźeržować a za něšto lět zaso w serbskej Łužicy bydlić. Po móžnosći tam, hdźež ma serbskich susodow. Tohodla njeje dotalny politiski koncept, wosebite prawa za hajenje swojeje rěče z teritorijom zwjazować, zastarski. Tole bě tež wčera z temu serbskeje rady Braniborskeje. Wo přichodźe Serbstwa rozsudźa prěnjotnje naše wjesne žiwjenje. A připódla prajene: Štóž sej aktualne Serbske Nowiny za cyłu swójbu wšědnje dypkownje na kuchinskim blidźe přeje, wězo wě, hdźež ma bydlić, zo by to fungowało. Marcel Brauman

Šulerjo 11. lětnika Praskeho gymnazija „Pomjatk naroda“ běchu cyły minjeny tydźeń w Serbach po puću. Ekskursija wotmě so we wobłuku čěskeho kubłanskeho programa „Zeznaj swojeho su­soda“.

Praha/Budyšin (SN/LuNo). Praski Gymnázium Paměti národa přihotuje spočatk kóždeho šulskeho lěta za swojich šulerjow tydźensku ekskursiju zwonka města. Činja to we wobłuku programa „Zeznaj swojeho susoda“, kotryž wot lěta 2001 eksistuje. Spočatnje je so kóždy šuler z časowym swědkom wuznamneho historiskeho podawka zetkał, zo by z nim interview wjedł. Mjeztym eksistuja druhe formy ekskursije. Z podpěru čěskeho Towarstwa přećelow Serbow su chowancy naspomnjeneje šule poslednje lěta tež Łužicu wopytowali.