To a tamne (13.07.26)
K wjećbje přećiwo zapadnym politikarjam namołwjała je w Iranje woblubowana nowina Hamshahri. Wona je kolažu pod hesłom „Lisćina tych, kotřiž čakaja na wjećbu iranskeho ludu“ z jich portretami wozjewiła. Mjez druhim widźiš na tutej tež zwjazkoweho kanclera Friedricha Merza (CDU) a francoskeho prezidenta Emmanuela Macrona. Na prěnim městnje staj prezident USA Donald Trump a israelski prezident Benjamin Netanjahu zwobraznjenaj.
Argentinski kopar Antonio Rattín, kotrehož dla běše swětowy koparski zwjazk FIFA žołte a čerwjene karty zawjedł, je w minjenym tydźenju w starobje 89 lět zemrěł. W swětowych mišterstwach 1966 w Jendźelskej nochcyše wón trawnik wopušćić, kaž běše jemu sudnik to přikazał. Jenož policisća, kotrychž běchu na pomoc wołali, su Argentinjana na kóncu přeswědčili, zo njech na sudnika posłucha.
Bafög hakle klětu zwyša
Berlin (dpa/SN). Koalicija knježerstwa je so na to dojednała, zwyšenje Baföga přesunyć. Po nowym dojednanju dóstanu studenća hakle wot klětušeho lěćneho semestra wjace pjenjez – nic, kaž planowane, wot lětušeho zymskeho semestra. W prěnim kroku zwyša pawšalu za bydlenje wot 380 na 440 eurow wob měsac. Po tym chcedźa t. mj. zakładnu potrjebu Baföga krok po kroku na niwow zwjazkoweho zakładneho zawěsćenja zwyšić. To je tuchwilu 563 eurow.
Burnham nowy britiski premier?
London (dpa/SN). Britiska strona Labour je něhdyšeho měšćanostu Manchestera Andyja Burnhama jako kandidata za předsydu strony schwaliła. Po wuzwolenju jako stronski předsyda ma Burnham tež zastojnstwo britiskeho premierministra přewzać. Keir Starmer běše zastojnstwo předsydy strony kaž tež premierministra srjedź junija špatnych wólbnych wuslědkow w komunalnych wólbach dla złožił.
Steinmeier přećahnył
Po nimale tydźeń trajacych žarowanskich swjatočnosćach w cyłym ...
Wjace pjenjezza staršich
Přichod zawodow VW dale njejasny
Změnu kursa zahajili
Sakska předpisy za škit skotu před wjelkom přiměriła
Drježdźany (SN). Drobny skót ma so w Sakskej lěpje před nadpadami wjelkow škitać. Zamołwite ministerstwo za wobswět a ratarstwo (SMUL) je tuž škitne naprawy kaž tež zakonske wuměnjenja za třělenje wjelkow aktualizowało. Statny minister za wobswět a ratarstwo Georg-Ludwig von Breitenbuch (CDU) wujasnja: „W prašenju, kak mamy z wjelkom wobchadźeć, je Zwjazk trěbnu změnu kursa zahajił. Tutu w Sakskej konsekwentnje zwoprawdźamy.“
Po měnjenju ministra su nowe rjadowanja za škit stadłow prawniski ramik, kotryž skruća škit skotu na pastwach. Plahowarjo, hońtwjerjo a zarjady maja z tym wjace jasnosće. Konkretnej naprawje za škit před wjelkom stej 1,05 metrow wysoki elektrifikowany mobilny płót z napjećom minimalnje 4000 woltow po cyłej dołhosći kaž tež 1,80 metrow wysoki kruty płót ze škitom před podryćom abo přelězenjom ze samsnym napjećom. Kraj Sakska plahowarjow skotu w tutym zwisku podpěruje.
20. róčnicu stacije woswjećili
Štó winika namaka?
Marokko přećiwo faworitej Francoskej bjez šansy
Dwójny swětowy mišter a faworit Francoska je wčera wječor přećiwo Marokkej štwórćfinalne koło swětoweho mišterstwa zahajił. Kaž wočakowane mějachu Francozojo hru pod kontrolu. Mnohe třělwy Kyliana Mbappéja, Ousmana Dembeléja abo Desiré Douéja na wrota pak marokkoscy zakitowarjo kaž tež wrotar Bono přeco zaso wotpopadnychu. Wosebje wrotar pokaza sylny wukon w mustwje Marokka. W 25. min. bu francoski kapitan Mbappé w šěsnatce foulowany, tola jědnatku, kotruž sam třěli, 35lětny Bono dźeržeše. Z 0:0 mustwje prěnju połojcu zakónčištej.
