Bonn (dpa/SN). Lěćnej měsacaj junij a julij běštej w zapadnej Europje tak horcej kaž nihdy do toho. W přerězku mějachu w regionje, kotrejž tež Němska přisłuša, 21,6 stopnjow. To fachowcy EU-programa Copernicus w Bonnje zdźělichu. Z tym běše temperatura nimale 2,8 stopnjow nad přerězkom w dobje 1991 do 2020.

Zdobom skedźbnjeja zamołwići na temperaturne rozdźěle mjez zapadnej a wuchodnej Europu kaž tež Skandinawiskej, hdźež mějachu signifikantnje niše temperatury. Tež daty za Němsku na to pokazuja, zo bě na juhozapadźe republiki wo wjele ćoplišo hač na sewjerowuchodźe. Po cyłej Europje běše minjeny měsac z přerěznej temperaturu 20,5 stopnjow jenož jědnaty najćopliši julij wot spočatka měrjenja w lěće 1991.

Tež temperatury swětowych morjow su rekordny niwow docpěli. Na powjerchu morja su fachowcy w juliju přerěznje nimale 21 stopjenjow měrili – tak wysoko kaž hišće ženje. W Europje stej so wosebje Atlantiski ocean a zapadne Srjedźne morjo jara woćopliłoj.

Najwuspěšniša pólska politiska strona PiS je rozpadnyła

Waršawa (SN/LuNo). Dóńt srjedźoeuropskeje njeliberalneje politiki tuchwilu dobry njeje. Jako prěnja měješe madźarska strona Fidesz problemy. Nětko sćěhuje pólska strona PiS (Prawo a sprawnosć), kotraž bě dwaceći lět z hegemonom prawicy a kotraž je za hospodarski dźiw kraja minjene lěta zamołwita. Rozdźěl mjez stronomaj Fidesz a PiS je, zo je madźarsku stronu oligarchiske wašnje jeje čłonow w knježerstwje do krizy wjedło, mjeztym zo na pólskim boku napjatosć mjez čłonami strony krizu zawinuje. Ani komentatorojo njewědźa, hač so bywši ministerski prezident Mateusz Morawiecki – kotryž je PiS hromadźe ze 40 zapósłancami wopušćił a stronu Wuwiće Plus załožił – wo emancipaciju prócuje abo hač je so nawoda PiS Jarosław Kaczyński za wurjedźenje strony rozsudźił.

Husto sym nimo pomnika za padłych 1. swětoweje wójny w Hórkach jěła abo tež blisko swoje awto parkowała. Sym so postawy wojaka dohladała, kotraž nad mjenami tych wjesnjanow stražuje, kotřiž su w bitwach padnyli. So na stopje pomnika posydnyć, pak mi do mysli přišło njeje. Tole pak bě wotpohlad režiserki Juliane Meckert. Městno na to dopomina, zo njeje čłowjek čłowjekej přeco dobry. Runje tam pak měli mysle dojednanja a zrozumjenja schadźeć. Kak wažne je to dźensa, zo so z wobrazami rozestajamy, kotrež ničo druhe njezwobraznjeja hač ničenje čłowjeskeje inteligency. Myslimy na wojerske rozestajenja, na zhubjenje biodiwersity w pódźe, ćěkanje ludźi ze swojeje domizny a tak dale. Wšitko to su wupłody a sćěhi duchowneho skutkowanja čłowjeka – na naše njedobro a přichodnych generacijow. W Hórkach, sobotu, mějachu zajimcy chwile, jónu rozmyslować. Wosebje za mnje bě to hnujacy wokomik, jako zhonich, zo sedźach runje tam, hdźež bě Hanka Šěrcec swój čas stała. Milenka Rječcyna

Premjera w Běłohrodźe: Prěni raz je ukrainski prezident Zelenskyj Serbisku wopytał, byrnjež tamniše knježerstwo přećelske styki z Moskwu pěstuje. Wobaj krajej zwjazuja prócowanja wo zastup do EU.

Běłohród (dpa/SN). Najebać přećelsku zwjazanosć knježerstwa Serbiskeje z Ruskej je so ukrainski prezident Wolodymyr Zelenskyj na statny wopyt do Běłohroda po­dał. Ze serbiskim prezidentom Aleksandarom Vučićom je so mjez druhim wo móžnym zhromadnym dźěle kaž tež wo swojich prócowanjach wo zastup do Europ­skeje unije rozmołwjałoj. Wo koo­peraciji we wojerskim wobłuku njejsu so rozmołwjeli, wuzběhny Vučić minjenu sobotu na nowinarskej konferency. Na naprašowanje zdźěli, zo Serbiska z Ukrainu zhromadnu produkciju trutow njeplanuje. „Planujemy pak kooperaciju na tutym polu z Israelom“, přispomni Aleksandar Vučić.