Lipsk (SN). Zapósłanc Sakskeho krajneho sejma Marko Šiman (CDU) je so wčera na swjatočnym přijeću generalneho konsulata USA w Lipsku wobdźělił. Přičina toho bě 250. róčnica njewotwisnosće Zjednoćenych statow Ameriki kaž tež 200lětne wobstaće ameriskeje diplomatiskeje reprezentancy USA w Lipsku a srjedźnej Němskej. W lěće 1826 załoženy generalny konsulat USA w Lipsku bě prěnje diplomatiske zastupnistwo Zjednoćenych statow w kralestwje Sakska. Pozdźišo přidružichu so dalše zastupnistwa konsulata w Drježdźanach, w hospodarskimaj regionomaj Vogtlandźe a Rudnych horinach kaž tež w Žitawje w Hornjej Łužicy. Lipsk měješe tehdy hižo wulki wuznam hladajo na wiki w Europje. Zastupnistwa spěchowachu wikowanje a přewodźachu hospodarske poćahi mjez Zjednoćenymi statami a Sakskej.

Marko Šiman je prawidłownje hósć na zarjadowanjach generalneho konsulata a podpěruje zetkawanske a šulerske projekty. „Wobstajny angažement zastupnistwa za saksko-ameriske přećelstwo zasłuža sej wulke připóznaće“, Šiman zwurazni.

Dublin/Brüssel (dpa/SN). Irska přewozmje dźensa předsydstwo rady Europskeje unije. Po regulach EU so tute kóžde poł lěta měnja. Irscy europscy zastupjerjo přewozmu hač do kónca lěta mjez druhim nawjedowanje zeńdźenjow ministrow a maja nadawk, w padźe rozdźělnych měnjenjow mjez čłonskimi statami unije posrědkować.

Cło EU nětko tež na tunje twory

Brüssel (dpa/SN). Štóž tunje twory z krajow zwonka Europskeje unije skaza, ma wotnětka za nje cło płaćić. Dotal běchu produkty z hódnotu pod 150 eurami wot cła wuwzate. EU wobliči na produkty samsneje skupiny tworow pawšalnje tři eura. Na přikład zapłaćiš za wjacore skazane T-shirty dohromady tři eura a za hrajku w samsnej posyłce dalše tři eura.

Podźěl zeleneje energije stupa