Němske podnurjaki za Kanadu
Halifax/Ankara (dpa/SN). Krótko do wjerška NATO w turkowskej stolicy Ankarje je Kanada němskemu předewzaću TKMS nadawk za dodawanje dohromady 12 podnurjakow přepodała. Tole zdźěli kanadski premierminister Mark Carney wčera w měsće Halifax krótko do swojeho wotlěta do Ankary medijam.
Za firmu TKMS ze stejnišćomaj w Kielu a Wismarje je to dotal najwjetši nadawk w swojich stawiznach. Zwjazk kaž tež norwegski stat běštej na wuwiću podnurjaka typa 212CD sobu wobdźělenej. Łódźe su wažny dźěl wojerskeje aliancy mjez Kanadu, Němskej a Norwegskej. Tež zwjazkowy kancler Friedrich Merz (CDU) je spožčenje nadawka jako wažny strategiski rozsud na dobro tuteje aliancy witał.
Skazane podnurjaki chce kanadske wójsko nanajpozdźišo w lěće 2035 zasadźić. Nawoda TKMS Oliver Burkhard je připowědźił, zo twarja podnurjak wuwzaćnje w Němskej. We Wismarskej łódźnicy ma za to hač do 1 500 nowych dźěłowych městnow nastać. Dohromady ma předewzaće 9 100 sobudźěłaćerjow.
Na kritiku z wuchoda reagowali
Reiche chce naćisk zakonja spěchowanja płunowych milinarnjow změnić
Berlin (dpa/SN). Masiwne protesty energijowych předewzaćow a zwjazkowych krajow přećiwo naćiskej zakonja za spěchowanje płunowych předewzaćow běchu wuspěšne. Zwjazkowa ministerka za hospodarstwo Katherina Reiche (CDU) chce nastupajo t. mj. južny bonus za zwjazkowe kraje na juhu republiki nětko wotpowědne změny na dobro krajow na sewjeru a wuchodźe Němskeje přewjesć. Na to pokazuje wotpowědny namjet čorno-čerwjeneje koalicije za změnu naćiska, kotryž Němskej nowinarskej agenturje (dpa) předleži.
Po dotalnych planach hospodarskeje ministerki měještej dwě třećinje wupisanych kapacitow za płunowe milinarnje projekty w južnej milinowej syći podpěrować, potajkim w zwjazkowych krajach Badensko-Württembergskej, Bayerskej, Hessenskej, Sewjerorynsko-Westfalskej, Porynsko-Pfalcowskej a Posaarskej. Po nowym namjeće ma tuta regula hakle płaćić, po tym zo je třećina přiražkow do sewjernych a wuchodnych zwjazkowych krajow šła.
Minister temu misnył
Faworitaj přichodne koło turněra docpěłoj
To a tamne (07.07.26)
Robert Habeck, něhdyši wicekancler a zwjazkowy hospodarski minister, ma po połdra lěće nowy powołanski nadawk. Spočatk awgusta nastupi wón jako poradźowar pola danskeje inwestmentoweje towaršnosće Urban Partners, kotraž skutkuje na polu wuwiwanja městow. Habeck ma předewzaću z hłownym sydłom w Kopenhagenje pomhać, swoje wobchodniske aktiwity na polu socialneho bydlenjotwara rozšěrjeć.
Dožiwjenska wjeska znateho němskeho předewzaća Karls Tourismus w sakskim Döbelnje ma nowu atrakciju za młody a starši publikum. Njedźelu je tam předewzaće, kotrež je nic naposledk tež swojich słódnych truskalcow dla znate, seklowu čaru (Achterbahn) za swójby wotewrěło. Wona je tak konstruowana, zo wozyčki přespěšnje po njej njesmala.
Swojorazne pišćele w katedrali
Praha (B/SN). W srjedźowěkowskej katedrali swjateho Wita na Praskich Hradčanach su nowe pišćele ze 121 registrami a 5 755 pišćelemi a pišćałkami poswjećili. Arcybiskop Stanislav Přibyl wuzběhny, zo ma katedrala nětko nowy hłós, „kiž njebudźe ze słowami rěčeć, ale k wutrobam ludźi“. Pišćeletwarc Gerhard Grenzing z Barcelony so wjeseli, zo wuměłstwowa twórba hudźbje, liturgiji a architekturje katedrale słuži. Wuměłc Peter Olah je jednotliwe pišćałki a pišćele ze 180 čěskimi kristalemi wobdał.
AfD cyrkwi napřećo njepřećelska
Köln (B/S). Magdeburgski biskop Gerhard Feige postorkuje so na njepřećelskosći strony AfD napřećo cyrkwi w Saksko-Anhaltskej. Wón w rozhłosu Deutschlandradio zwěsći: „Hižo w NDR sym dožiwił, zo je stat cyrkej wusměšował. Ale tajke intensiwne wusměšowanje, swary a wukonjenje ćišća kaž nětko su nowu kwalitu docpěli.“ Biskop doda: „Smy dźakowni, zo smy ze židowskimi sobuwobydlerjemi, z muslimskimi a druhimi nabožinami kaž tež z wukrajnymi křesćanami derje zhromadnje žiwi.“
Islamizm w Němskej
Zhromadny wojerski manewer
Peking (dpa/SN). Wójsko Chiny přewjedźe wot dźensnišeho hromadźe z ruskimi wójnskimi łódźemi w pacifiskim oceanje blisko sewjero-chinskeho pobrjóžneho města Qingdao wojerski manewer. Po informacijach wojerskich zamołwitych Chiny je při tym wojerski nurjak chinskeho wójska tež strategisku raketu wottřělił. Zamołwići wuzběhnu, zo so wuspěšny test přećiwo konkretnemu krajej měrił njeje.
Dalše kročele trěbne
Berlin (dpa/SN). Předsyda SPD Lars Klingbeil měni, zo su tež po dojednanju koalicije na reformowy paket dalše kročele trěbne. Dojednanja CDU, CSU a SPD „njejsu scyła přičina, zo so spokojnje wotpočujemy. Smy dotal jenož mały čwak dołheho procesa zmištrowali, nic wjace a nic mjenje“, wuzběhny wón we wusyłanju „Lěćny interview“ sćelaka ARD. Klingbeil warnowaše, zo paket reformow w jednanjach zwjazkoweho sejma přejara roztřěskaja.
Polěpša naćisk reformy
