Budyšin (SN). W susodnej Čěskej su minjeny pjatk na wopory poraženja Praskeho nalěća spominali. Dnja 21. awgusta 1968 wobsadźichu wojacy Waršawskeho pakta w běhu někotrych hodźin wšitke strategisce wažne institucije a městnosće kraja. Inwazija podusy reformowe hibanje pod nawodom Alexandera Dubčeka, kotryž chcyše w Čěskosłowakskej „socializm z čłowječim wobličom“ wutworić.

Berlin (dpa/SN). Šef koncerna VW Oliver Blume je wčera w interviewje z nowinu Bild am Sonntag naspomnił, zo zawrjenje zawodow w Emdenje, Šwikawje, Hannoverje a Neckarsulmje dotal hišće wobzamknyli njejsu, zo pak jich tuchwilna situacija přichoda kmana njeje. „Hladajo na 2030te lěta zawody hižo wubědźowanja­kmane njejsu“, wón přispomni. Blume žadaše­ sej wot wšitkich sobudźěłaćerjow hladajo na wulku krizu cyłeje branše awtotwarcow­ mjezsobnu podpěru. „Přichodne tydźenje budu rozsudne. Chcemy najwjetši transformaciski plan w stawiznach koncerna zahajić“, wón wuzběhny.

Wot dźensnišeho hač do kónca awgusta chce předsydstwo koncerna zawodne zhromadźizny na dohromady dźewjeć němskich stejnišćach wopytać a mnohe prašenja dźěławych nastupajo lutowanske naprawy koncerna na městnje wotmołwić. Zazběh swojeje tury je za předsydstwo jutře we Wolfsburgu. Srjedu po­dadźa so do Emdena a Šwikawy. Posledni wopyt maja dnja 31. awgusta w Hannoverskim zawodźe.

Pjeć hospodarskich ministrow EU žadaja sej přidatny dawk za naddobytk

Berlin/Mnichow (dpa/SN). W lisće na irske prezidentstwo rady EU je sej zwjazkowy financny minister Lars Klingbeil (SPD) hromadźe z pjeć europskimi kolegami přidatne dawki za njesměrne dobytki mineralnowolijowych koncernow žadał. Wójny w Iranje, ale tež wupad transportnych zwiskow niłkeje wody we wulkich­ rěkach dla su płaćizny za ćěriwa tak wysoke, kaž lětdźesatki dołho hižo wjac nic. „Po cyłym swěće rosće njespokojnosć nad dale a stupacymi ži­wjenskimi kóštami“, skedźbnjeja woni w pismje na irskeho financneho minis­tra Simona Harrisa. Dotalne statne naprawy njedosahaja za trajne zniženje abo stabilizowanje płaćizny za předewzaća a wobydlerjow, podšmórnu financni ministrojo z Portugala, Španiskeje, Awstriskeje, Italskeje, Pólskeje a Němskeje. Tohodla je zhromadne postupowanje na europskej runinje trěbne, zo bychu profiterojo krizy situaciju za wulke dźěle ludnosće w EU polěpšili.

Minjeny kónc tydźenja swjećachu na Smochčanskim­ kubłanišću Serbsku nóc. Sobotny dešćik njelubješe spočatnje přijomny wječor. Tola něhdźe 500 při­hladowarjow wjedro njewottrašeše. Hinak hač pjatk předstajichu program kaž planowane a běše to cyłkownje poradźeny wječor. Mjeztym su to 25. nocy na Smochčanskim kubłanišću. Minjene lěta pak stejachu stajnje hinaše kultury w srjedźišću. Zo nětko skónčnje po štwórć lětstotku Serbski ludowy ansambl prěni raz „Serbske nocy“ wuhotuje, je chwalobne, ale tež prašomne. W tradicionelnej serbskej narodnej drasće so nimo moderatorki a baleta tež nichtó na jewišću njeprezentowaše. Přiwšěm zwosta cyłkownje pozitiwny zaćišć. Dešćik nikoho njewuhna a lětuša Serbska nóc bě porno poslednim lětam poradźeny kulturelny program z chórom, baletom a orchestrom Serbskeho ludo­weho ansambla, kaž tež z rejowanskej skupinu Łužičanku a Łužičanskej rapsodiju. Celina Knopec