Horce dwuboje, wjele foulow a prawje něšto lós – to bě prěni połčas druheho połfinala lětušeje WM. Wobě mustwje drje podaštej so derje do hry, tola Jendźelska měješe lěpše šansy. Přestawka zakónči wojowany prěni přechod, kotryž pod mnohimi njefairnymi akcijemi ćerpješe.

Swětłomječ, kotryž běchu za rjad filmow „Star Wars“ wužiwali, su w Los Angelesu njedawno za 3,75 milionow dolarow (3,3 milionow eurow) přesadźowali. Tole zdźěli awkciski dom Heritage Auctions. Komu drohi rekwizit nětko słuša, nochcychu zamołwići rjec. Mječ bě dźiwadźelnik Mark Hamill w filmje „Imperij nadběh wotrazy“ (1980) w swojej róli jako Luke Skywalker wužiwał.

Wojakow wójska USA chcedźa přichodnje po 30tych narodninach na hódnoty testosterona přepruwować. Tole zdźěli zakitowanski minister Pete Hegseth na platformje X. Komuž móža přemało testosterona dopokazać, tomu chcedźa namjetować, so lěkować dać. Předpisać pak to nikomu nochcedźa. Z přepytowanjom chcedźa kmanosće wojakow optiměrować, wšako je wjace testosterona pječa přičina lěpšich wukonow.

Drježdźany (dpa/SN). Nuzowi pomocnicy w Sakskej su šěsć nowych jězdźidłow dóstali, zo bychu kmańšo na katastrofy reagować móhli. Wone su po najwyšich standartach wuhotowane a specielnje koncipowane, zo bychu na městnje awtarknje dźěłać móhli, nutřkowne mi­nisterstwo zdźěla. Jězdźiła přepoda swobodny stat wokrjesam Lipsk, Šwikawa, Srjedźna Sakska, Budyšin, Zhorjelc a Rudne Horiny.

Meloni zwrěšćiła

Rom (dpa/SN). Prawicarska ministerska prezidentka Italskeje Giorgia Meloni je ze swojimi planami za reformu wólbneho prawa w parlamenće zwrěšćiła. Komora zapósłancow w Romje je jeje namjet snadnje wotpokazała. Přećiwo zakonskemu naćiskej knježerstwoweje strony Fratelli d’Italia (bratřa Italskeje) hłosowaše 188 zapósłancow, za njón 187. Opozicija žada sej hladajo na wuslědk hnydomne nowowólby, regularnje bychu Italčenjo klětu nowe ludowe zastupnistwo postajili.

Snadniši rozrost