Žně na juhu katastrofalne
Po cyłym kraju hroža buram suchoty a horcoty dla financielne ćeže
Berlin (dpa/SN). Smalace słónco a tydźenje trajaca suchota so w někotrych dźělach Němskeje w zwisku ze žnjemi zahubnje wuskutkujetej, měnja zastupjerjo branše. Wot srjedź junija su tohodla něhdźe tři miliony tonow žita a rěpika zhubili, zdźěla Zwjazk němskich Raiffeisen-zawodow, zastupowacy 1 600 zawodow, kiž z agrarnymi tworami wikuja abo tute předźěłuja. Na juhu Němskeje je situacija wosebje napjata. Nimo toho je we wjacorych rěkach tak mało wody, zo njemóža žito po nich transportować.
Tež Zwjazk němskich burow připowědźi špatniše žně abo samo dospołny wupad žnjow. „Žně žita, wosebje pšeńcy, a rěpika drje budu pod přerězkom“, rjekny prezident burow Joachim Rukwied Redakciskej syći Němska (RND). „Nastupajo nazymske kultury je dźeń a jasnišo, zo dyrbimy so na dočasne žně nastajić“, Rukwied dale zdźěli. Straty wočakuja pola běrnow, zeleniny a cokoroweje rěpy, ale tež pola kukuricy a sojabunow. „W južnych dźělach Němskeje móhli cyłe žně wupadnyć.“
Dźěło zapućowarjow njeparujomne
Institut za němske hospodarstwo (IW) je wuličił, w kotrej měrje su wuchodne zwjazkowe kraje wot připućowanja wotwisne. W studiji warnuje IW mjez druhim před negatiwnymi wuskutkami nawróta migrantow z wuchodneje Europy do jich domizny.
Berlin (dpa/SN). W swojej nowej krótkostudiji skedźbnjeja fachowcy IW na wažnu rólu připućowarjow na dźěłowych wikach. W dobje mjez 2023 a 2025 je něhdźe 141 000 přistajenych z němskim staćanstwom wotpućowało – porno tomu stupaše ličba dźěławych bjez němskeho pasa w tutej dobje jenož wo 90 000. IW je statistiki wšitkich wuchodoněmskich krajow kaž tež Berlina wuhódnoćił.
Fachowcy wuzběhuja, zo budźe ličba dźěławych přichodne lěta dale spadować – mnohich wotchadow do renty, ale tež migrantow dla, kotřiž so do swojeje domizny nawróća. Wot lěta 2023 do 2025 je we wuchodnych krajach cyłkowna suma dźěławych němskich staćanow wo 2,5 procentow, suma wšitkich dźěławych pak jenož wo 0,8 procent spadnyła. Porno tomu je suma wšitkich dźěławych po cyłej Němskej lochce wo 0,2 procentaj stupała, zdźěli institut.
To a tamne (14.08.26)
Mandźelskeho a awto runočasnje je 90lětna w Mannheimje zhubiła. Dokelž ani muža ani awto hižo njenańdźe, prošeše staruška policiju wo pomoc. 89lětny bě swoju žonu před lěkarskej praksu wotsadźił a po tym za parkowanišćom pytał. Po 45 mjeńšinach pytanja běštaj mandźelskaj zaso zjednoćenaj. Muž bě mjenujcy sam zabył, hdźe bě awto wotstajił a so w starym měsće Mannheima zaběžał.
Štóž tuchwilu w italskich městach přebywa, tón tam přewjele njewuhlada. Wobchody, kofejownje a dalše posłužby su zawrjene. W awgusće sej Italčenjo mjenujcy tradicionalnje k morju abo do dowola wuleća. Wosebje wokoło 15. awgusta, potajkim na Marije donjebjeswzaća, italsce Ferragosto, nichtó njedźěła. Za to su pobrjohi połne ludźi, kiž tam zhromadnje ze swójbnymi swjeća.
Čehodla nimamy serbskeho Ira?
W irskej stolicy Dublinje je kónc pražnika njewočakowano sławny hudźbnik a pěsničkar Glen Hansard zemrěł. Bě to wobchadne njezbožo, je so rano zahe ze swojim motorskim zajěł. Bu jenož šěsćapołsta lět stary, po jeho smjerći zwostaštej po nim młoda žona a mały syn. Njewěm, hač bě Hansard w Serbach znaty – najskerje lědma, w Serbskich Nowinach wo nim pisali njejsmy. W zapadnym swěće pak bě znaty, a to woprawdźe jara, a to nic jenož, dokelž bu jemu před wosomnaće lětami filmowe myto Oscar za pěseń Falling Slowly z filma Once spožčene. Hansard bě wšudźom woblubowany, wón bě tajke něšto kaž milinarnja za produkciju čłowječeje energije. Wón bě sławny hudźbnik, kiž je na festiwalach rady wječor z ludźimi při wohenju sedźał a kiž je zhromadnje z nimi spěwał, kaž by sam wopytowar festiwala był. Kotra swětowa hudźbna hwězda tole čini? Za njeho pak bě to žiwy refleks, dokelž je poprawom cyłe swoje žiwjenje w Dublinje na hasach hercował a z ludźimi w kontakće być nawuknył.
Höcke za Wagenknecht
Erfurt (dpa/SN). „Podam wam ruku“, zwurazni předsyda frakcije AfD w durinskim krajnym sejmje Björn Höcke, přejo sej załožerku strony BSW Sahru Wagen-knecht jako nowu ministersku prezidentku. „Stańće so z ministerskej prezidentku Durinskeje“, praji Höcke we wideju, kotrež bě na platformje X wozjewił. W swojej powěsći poćahuje so nimo toho na wólby krajneho sejma w Saksko-Anhaltskej a napomina Wagenknecht, po tym nowy kapitl stronskich stawiznow w Němskej zahajić.
Leavitt złoži zastojnstwo
Washington (dpa/SN). Rěčnica prezidenta USA Donalda Trumpa, Karoline Leavitt, swoje zastojnstwo kónc awgusta złoži. 28lětna bě najmłódša rěčnica Běłeho doma a za jeje wótre wuprajenja znata. Zo loyalna sobudźěłaćerka prezidenta swoje dźěłowe městno wopušći, mnohich překwapja. Trump dyrbi so nětko wo naslědnika abo naslědnicu samsneho formata prócować.
Milinarnju kompletnje hasnu
Składnostnje dźensnišeje 65. róčnicy natwara Berlinskeje murje su ...
Spominaja na natwar murje
Sakska chce wěstotnu radu
Frakcija CDU/CSU skeptiska
Njeznaja abo přeńdu stawizny
Čłon AfD w zwisku z 82. róčnicu Waršawskeho zběžka Polakow wusměšował
Waršawa. Jako „Afroameričanow Europy“ a jako „wěčne wopory, kotřiž pytaja za sobuželnosću“ je čłon sakskeje AfD Fabian Keubel Polakow minjeny tydźeń w socialnych syćach wopisał. Polemisce so prašeše, hač dyrbjała jim Němska „nósniki jako reparaciju přewostajić“. Z nastorkom běše jemu wopominanske zarjadowanje składnostnje 82. róčnicy Waršawskeho zběžka. Tute bě Sławomir Mentzen, pólski politikar a předsyda prawo-libertarneje strony Nowa Nadzieja, dnja 1. awgusta při Berlinskich Braniborskich wrotach organizował. „Za čas Waršawskeho zběžka su Němcy tysacy dźěći morili“ abo „Nochcemy nihdy zabyć“ na plakatach wobdźělnikow mjez druhim steješe.
