Z kupy Kreta rozprawja naša korespondentka Vanessa Žurec

Agios Pavlos/Kreta (VaŽ/SN). Po wulkich lěsnych wohenjach w Španiskej, Francoskej a Turkowskej wojuja nětko tež w Grjekskej přećiwo spěšnje so rozpřestrěwacym zahubnym płomjenjam. Wosebje potrjechene su dowolowe kupy Kreta a Paros kaž tež region zapadnje hłowneho města Athen.

Ekstremna horcota, dołha doba suchoty a sylne horce wětry, kotrež domoródni „Meltemi“ mjenuja, přisporjeja spěšnemu rozpřestrěwanju a znowawudyrjenju wohenjow. Po wčerawšich informacijach zamołwitych zarjadow je woheń hižo wjace hač 12 000 hektarow pódy zničił. We wsach Agia Galini, Nea Krya Vrysi a dalšich gmejnach na Kreće su něhdźe 6 000 dowolnikow ewaku­owali. Wosebje tragiske je: Hižo tři wohnjowi wobornicy staj tam při hašenskich dźěłach swoje žiwjenje při­sadźiłoj. Dalše tragiske njezbožo sta so wčera, njedźelu, zapadnje Athena w regionje Psatha. Tam staj hašenskej helikopteraj w powětře koliděrowałoj, při čimž dwaj pilotaj zemrěštaj.

Kak dźensniši dźeń wšo ze wšěm zwisuje, móžeš na jeničkej atomowej milinarni Madźarskeje wobkedźbować: Wona drje dotal nimale połojcu trěbneje miliny w kraju produkuje, tola strategiski přinošk za zastaranje z energiju je hižo dramatisce spadował a nětko dyrbja milinarnju najprjedy raz dospołnje hasnyć – dokelž ma Dunaj přemało wody za chłódźenje. To drje awtomatisce njewoznamjenja, zo běše nahłe wotpinanje poslednich atomowych milinarnjow w Němskej paralelnje ze zakónčenjom zmilinjenja brunicy, zmysłapołne. Tola přewulka wotwisnosć wot jednoho techniskeho systema, wšojedne wot kotreho, je riskantna. Hdyž bychmy sej swoju energiju nimale cyłkownje ze słónca a wětřika wudobywali, móhła so infrastruktura za zastaranje towaršnosće z energiju tež sypnyć – drje nic w horcym lěću, ale w ćichej, ćmowej zmyje. Bjez praweho miksa njeńdźe. A atomowa energija njeby tež w Němskej wšo wumóžacy wupuć była. Marcel Brauman

Ceuta (SN/LuNo). Minjeny štwórtk a pjatk je do španiskeje eksklawy w měsće Ceuta na sewjeru Afriki wokoło 50 000 marokkoskich ćěkancow z morja přišło (dźesatki ludźi su so při tym zatepili). Bě to njewšědna žołma migrantow.

W měsće je 85 000 wobydlerjow žiwych. To rěka, zo nimaja kapacitu, tajku masu zrazom přiwzać. Medije su tohodla wjele wobrazow z połnymi hasami cyłemu swětej pokazali. Europscy politikarjo su na to Španisku kritizowali a wo kóncu Schengenskeho ruma rěčeli. Za někotrych běše cyła akcija po zdaću koordinowana. Migranća z Afriki ćěkaja wšak wšědnje do Španiskeje přez Kanariske kupy. Tónraz pak sej policija a wojacy wot přichadźacych najprjedy raz dokumenty žadali njejsu. Hakle pjatk, hdyž su so ćěkancy zaso domoj wróćeli, chcychu je widźeć. W měsće je stajnje 3 000 wojakow stacioněrowanych, dokelž maja mjezu EU škitać.

Dwójnikaj Billa a Toma Kaulitza, 36­lětneju hudźbnikow znateje němskeje pop-skupiny Tokio Hotel, móža fanojo nětko jako postawje z wóska w Berlinskim Kabineće wóskowych figurow Madame Tussauds wobdźiwać. Najebać dźiwne začuće, zo móžeš sej sebje samoho z kóždeje strony wobhladać, staj bratraj z wuslědkom jara spokojom. To zwurazništaj na wčerawšim oficialnym wotkryću.