Bolostnej wuslědkaj za CDU
Wólbne wobdźělenje w Berlinje a Mecklenburgsko-Předpomorskej wulke
Berlin/Zwěrin (dpa/SN). Za stronu CDU běše wčerawši wólbny dźeń krajneju parlamentow w Mecklenburgsko-Předpomorskej a Berlinje dalši super-gau: Prěni raz w swojich stawiznach njeje strona do krajneho parlamenta zaćahnyła a w Berlinje přěhraje wona wólby přećiwo Lěwicy. Ćišć na hižo chabłaceho kanclera a nawodu CDU Friedricha Merza z tym dale stupa. Tola hnydom po zawrěću wólbnych lokalow wčera zwurazni wón před kamerami, zo nochce wotstupić. W Mecklenburgsko-Předpomorskej je AfD po dotalnym wuličenju z 38,2 procentami hłosow dobyła a podwoji z tym swój wuslědk poslednich wólbow. Strona SPD je najebać angažowaneho wólbneho boja swojeje načolneje kandidatki a ministerskeje prezidentki kraja Manuele Schwesig štyri procenty zhubiła a docpě wčera 35,5 procentow. Lěwica slěduje z 6,5 procentami na třećim městnje. Zeleni su z 5,7 proc. pjećprocentowsku mjezu překročili a zaćahnu do parlamenta. CDU porno tomu je z 4,9 procentami won. Tež BSW njeje ze 4,8 procentami do parlamenta zaćahnyła.
Wólbne zadźerženje křesćanow
Magdeburg (B/SN) Bychu-li so jenož hłosy křesćanskich wolerjow ličili, by AfD we wólbach w Saksko-Anhaltskej wjele słabšo wotrěznyła. Analyza slědźerskeje skupiny w Mannheimje je zwěsćiła, zo je 47 procentow ludźi bjez přisłušnosće k nabožinje AfD woliło, 33 proc. ewangelskich a 32 proc. katolskich wěriwych. 26 procentow křesćanow woleše CDU. 9 300 ludźi je po wotedaću hłosa na pisomne naprašowanje slědźerskeje skupiny wotmołwiło.
Cyrkej na stronje Židow
Bonn (B/SN) Předsyda Němskeje biskopskeje konferency Heiner Wilmer je židowskemu nowolětnemu swjedźenjej Rosch Haschana žohnowanje sposrědkował. „Stejimy na wašej stronje“ pisa wón w lisće prezidentej Centralneje rady Židow w Němskej, Józefej Schusterej. Runje w tutym času je wažne, zo „swoju křesćansko-židowsku zwjazanosć pokazamy. Solidarita njeměła prózdne słowo wostać“.
Mać chudych
FUEN steji za serbskim šulstwom
70. lětny kongres Federalistiskeje unije europskich narodow (FUEN) su sobotu w Helsinkach zakónčili. Zhromadźizna delegatkow a delegatow schwali wjacore rezolucije. Nimo toho wěnowachu so tež financam, rozprawam a Europeadźe 2028.
Helsinki/Helsingfors (SN/MG). Zhromadźizna delegatkow a delegatow Federalistiskeje unije europskich narodow (FUEN) je sobotu jednohłósnje načisk rezolucije Domowiny schwaliła. W teksće žada sej třěšny zwjazk wosebity wobkedźbowanje sakskich a braniborskich naležnosćow hladajo na serbske šule a serbskich wučerjow. Dohromady šěsć žadanjow je Domowina sformulowała. Tak žadaja sej mjez druhim „krótko- a srjedźodobne strategije k zdobyću, wukubłanju a wjazanju serbskich wučerjow.“ Tema rezolucije budźe prawdźepodobnje tež jutře zajimawa. W Drježdźanach schadźuje so mjenujcy sakska serbska rada ze sakskim kultusowym ministrom Conradom Clemensom (CDU) a wuradźuje wo serbskim šulstwje.
IG Metall chce stawkować
Wolfsburg/Šwikawa (dpa/SN). W zwisku z planowanym zawrjenjom twornjow předewzaća VW je dźěłarnistwo IG Metall sobudźěłaćerjow a dodawarjow na něhdźe 200 městnosćach po cyłej Němskej dźensa namołwjało stawkować. Pod hesłom „Přichod město krótšenja – zhromadnosć je naša najwjetša marka“ planuja najwšelakoriše akcije, mjez druhim manifestacije, demonstraciske pochody a zawodne zhromadźizny. Dźěłarnistwo liči po swójskich informacijach z dohromady 100 000 wobdźělnikami.
Přećiwo wotehnaću protestowali
Bratislava (dpa/SN). Tysacy ludźi je njedźelu w słowakskej stolicy Bratislavje přećiwo zakonskej móžnosći wotehnaća demonstrowało. Po informacijach organizatorow měješe „Narodny pochod za žiwjenje“ dohromady samo 30 000 wobdźělnikow. Dołhodobny zaměr iniciatiwy, kotruž katolska cyrkej podpěra, je zběhnjenje liberalneho zakonja wo wotehnaću. Tutón hižo 40 lět dołho płaći.
Putinowa strona wólby dobyła
