Nic jenož na wsach, ale tež w městach maja mnozy doma skót. Něchtóžkuli nimo toho drobny skót plahuje. Wšitcy so wo strowotu swojich lubuškow prócuja. K tomu přinošować chce naša serija z pokiwami z weterinarneje mediciny. (68)
Kokoše su dźeń a woblubowaniše. Za někotrych je kokoš prosće móžnosć, na lochke wašnje k słódnym jejam přińć, druzy je rady wobkedźbuja a za dalšich su hižo kaž domjace zwěrjo. Mnozy sebi mysla, zo je dźerženje kokošow jednore a bjez wulkich narokow móžne. Dokelž pak liči kokoš k zwěrjatam, kotrež zežiwidła produkuja, měli so tři bytostne dypki wobkedźbować: Sprěnja ma so dźerženje kokošow pola kasy za skótne mrětwy (Tierseuchenkasse) přizjewić; zdruha wobsteji winowatosć, zo su kokoše přećiwo chorosći Newcastle šćěpjene (štóž potajkim kokoše sam wulahnyć da, dyrbi sebi po wotpowědny srědk do skótnolěkarskeje praksy dóńć); střeća ma so wobsedźer na postajenja k wotedaću a wužiwanju medikamentow dźeržeć.
