Na twarnišću hudźbneje šule časowe swědki namakali

Budyšin (SN). Při twarskich dźěłach za nowu wokrjesnu hudźbnu šulu Budyskeho wokrjesa su njewšědnu namakanku wuhladali. Pod drjewjanym špundowanjom w zadnim dźělu twarjenja na Budyskej Tzschirnerowej namakachu dwě tyzy. Wonej podatej zajimawy dohlad do lěta 1968, jako je jej něchtó na tymle městnje schował. W tym času je Němska železnica twarjenje wužiwała.

Jedna z tyzow bě w starej pjekarskej tiće. W njej běchu někotre zajimawe dokumenty kaž dźěłowa rozprawa ­brigady IV wo lěće 1968, eksemplar nowiny, w kotrejž rozprawjeja wo artiklach w sowjetskich medijach, tydźenska nowina němskich železnicarjow a słužbny zešiwk ze železniskimi zapiskami. Druhi časowy swědk bě schowany w starej tyzy za tablety. W njej bě rukopisna notica železnicarja Wilfrieda Teicha. Wón je tehdy hižo 15 lět na městnje dźěłał a rozprawja w powěsći wo swojim dźěle a dožiwjenjach.