KI-chatbot podpěruje zarjadnikow
Drježdźany (SN). Sakske dawkowe zarjadnistwo je dalšu wažnu kročel do směra na digitalizaciju zdokonjało. W swojej wčerawšej nowinskej zdźělence piše sakske financne ministerstwo, zo ma něhdźe 5 250 zarjadnikow wot spočatka tydźenja noweho sobudźěłaćerja poboku, mjenujcy KI-chatbota z mjenom MAXi. Wirtuelny asistent ma jim čas rubjace rutinowe nadawki wotewzać, tak zo móža so wobdźěłanju kompleksnych jednotliwych padow wěnować.
Konkretny wobłuk, w kotrymž chcedźa chatbot zasadźować, je na přikład wobdźěłanje spřećiwjenjow dawkipłaćerjow. Dohromady 167 459 tajkich mějachu zarjadnicy loni wobdźěłać. Nětko móže jich MAXi při tym podpěrować, mjez druhim při analyzy pismow, zhotowjenju zjimanjow abo naćiskow za wotmołwy. „Zamołwitosć za fachowe pohódnoćenje kaž tež doskónčny rozsud w dawkowych naležnosćach pak zwostanu w rukach zamołwitych fachowcow“, wuzběhnje ministerstwo.
Nowe jězdźidło do słužby wzali
To a tamne (14.10.26)
Konjace zapřahi w Central Parku, za wopytowarjow New Yorka přewšo woblubowana atrakcija, tam prawdźepodobnje bórze hižo njepojězdźa. Měšćanosta Zohran Mamdani a předsydka měšćanskeje rady Julie Menin staj so wčera na naćisk zakonja dojednałoj, kotryž 150lětnu tradiciju zakaza. Škitarjo zwěrjatow hižo dołho na hubjene wobstejnosće za měšćanske konje skedźbnjeja.
Kocor Larry, maskotka sydła britiskeho knježerstwa pod znatej Londonskej adresu Downing Street 10, je so po operaciji spěšnje zaso zhrabał. To zdźěla zamołwići knježerstwa za zjawnostne dźěło wčera na Instagramje. Do bydlenja „zaćahnył“ běše dźensa nimale 20lětny Larry w lěće 2011 zhromadnje z tehdyšim premierministrom Davidom Cameronom. Po nim je kocor tam dalšich šěsć šefow britiskeho knježerstwa přewodźował.
Wjace připóznaća za medije mjeńšinow sej žadał
Strasbourg (SN). Martxelo Otamendi, prezident Europskeho zwjazka dźenikow w mjeńšinowych a regionalnych rěčach MIDAS, porěči minjeny štwórtk před interskupinu Europskeho parlamenta za mjeńšiny, narodne zhromadźenstwa a rěče w Strasbourgu. Wón wobswětli wužadanja, před kotrymiž steja medije w mjeńšinowych a regionalnych rěčach po cyłej Europje, a žadaše sej sylniše připóznaće na runinje EU. Na posedźenju, kotrež zapósłanc Europskeho parlamenta a předsyda interskupiny Loránt Vincze nawjedowaše, wuzběhny Otamendi rólu medijow w mjeńšinowych rěčach hladajo na profesionelny žurnalizm a skrućenje zhromadźenstwow. Nimo ryzy rozprawnistwa přinošuja medije zachowanju mjeńšinowych rěčow. Wosebje podšmórny jich wuznam w přiběrajcy ćežkim wobswěće medijow: „Njeje demokratije bjez profesionalnych medijow a profesionelnych medijow bjez demokratije.“
Rata inflacije so znowa zwyšiła
Wiesbaden (dpa/SN). Rata inflacije je prěni raz po nimale třoch lětach marku třoch procentow překročiła. Twory a posłužby běchu w septembrje 3,3 procenty dróše hač loni. Tole zdźěla Zwjazkowy zarjad za statistiku. Dotal najwyšu ratu inflacije mějachu w Němskej w decembrje 2023 z 3,7 procentami. Wosebje płaćizny za energiju a ćěriwo dale do wysokosće tłóča, wšako přetrjebarjo něhdźe 14,9 procentow wjace za nje płaća hač loni.
Špatna bilanca za FFH-kónčiny
Halle (dpa/SN). Bilanca za mnohe škitne pasma w Němskej je po měnjenju ekspertow špatna. Po wobšěrnej wědomostnej analyzy tak mjenowanych FFH-kónčinow je jenož šěsć procentow žiwjenskich rumow a štyri procenty družinow flory a fawny w dosahacym stawje. Tole je rezultat, kotryž je nacionalna akademija wědomosćow Leopoldina w diskusijnej papjerje wozjewiła. Škitne pasma po europskej směrnicy za habitaty flory a fawny (FFH) maja wosebje wohrožene zwěrjata a rostliny wosebje škitać.
Rozšěrja rozmołwy
Tutón młody, njewšědnje šakaty žrěbc z mjenom J-Nimon K z ...
Kretschmer so wuprajił
Drježdźany/Berlin (dpa/SN). Po tym, zo je předsydka SPD Bärbel Bas swoje zastojnstwo jako předsydka swojeje strony a ministerka za dźěło złožiła, sej sakski ministerski prezident Michael Kretschmer (CDU) žada, zo měli z planowanymi reformami pospochi pokročować. Wón so „spěšnych a konkretnych wuslědkow“ nadźija, rjekny wón nowinomaj Leipziger Volkszeitung a Sächsische Zeitung. Designěrowanemu nowemu ministrej za dźěło Alexanderej Schweitzerej (SPD) Kretschmer swoju podpěru za wužadace nadawki w přichodnych měsacach poskići.
Jako reakciju na rozsud Bas je předsyda SPD Lars Klingbeil připowědźił, zo na přichodnym stronskim jězdźe cyłe předsydstwo znowa wola.
Kabinet na wuprawje
Zniženje dawka derje za hosćency
Lipsk (dpa/SN). Zniženje sadźby nadhódnotneho dawka za gastronomiju na spočatku lěta wot 19 na sydom procentow je po měnjenju Axela Kleina, jednaćela sakskeje wotnožki zwjazka němskich hotelierow a gastronomow DEHOGA, „žołmje insolwencow zadźěwała. Bjez zniženja bychmy katastrofu dožiwili.“ Wosebje w tak mjenowanym wjesnym rumje bychu mnohe zawody bjez naprawy zawrěć dyrbjeli. Nimo toho je niski dawk tomu zadźěwał, zo so płaćizny za jědź podróša. Byrnjež so kóšty za žiwidła a personal – minimalna mzda wučinja wot spočatka toho lěta město 12,82 mjeztym 13,90 eurow na hodźinu – zwyšili, su płaćizny w 90 procentach stabilne wostali. Zwjazkowy sejm bě so w lěće 2025 za změnu zakonja wo wysokosći nadhódnotneho dawka wuprajił. Na napoje sej nadal 19 procentow dawka žadaja.
Podhladneju zajeli
Drama kołowokoło zapalerstwa w Pólskej so nachila
Waršawa/Nürtingen/Berlin (dpa/SN). Mužej, kotrajž staj pječa staciju zastaraćela ze satelitowym internetom Starlink zapaliłoj, su zastojnicy w Němskej popadnyli. Tole zdźěla pólske knježerstwo. „Na próstwu pólskeje tajneje słužby je němska policija dweju mužow turkowskeho pochada zajała, kotrejuž wobwinuja zapalerstwa Starlink-stacije w Mazowskim wojewódstwje dla“, piše ministerski prezident Donald Tusk na platformje X. Pozdatnymaj saboteromaj činja nětko w Pólskej proces. Knježerstwo we Waršawje wuńdźe z toho, zo tča ruske tajne słužby za ataku.
Wjacore medije su wo zajeću rozprawjeli. Dźenik Schwäbische Zeitung piše wo tym, zo su zastojnicy podhladneju na dwórnišću w badensko-württembergskim Nürtingenje zajeli. Nimo toho je policija w Berlinskim měšćanskim dźělu Spandau dalšeho podhladneho zajała. Tón je pječa šofer saboterow, rěka w nowinje Bild.
