Berlin (dpa/SN). Z poł wysoko wisacymi chorhojemi, wopominanskimi stražemi a wustajeńcami su w Němskej dźensa wopory nadpada Hamas na Israel před lětomaj wopominali. W Lipsku je so zwjazkowy prezident Frank-Walter Steinmeier ze zastupnikami židowskeje wo­sady zetkał. Prezidentka zwjazkoweho sejma Juila Klöckner (CDU) je w Berlinje wustajeńcu wotewrěła, kotraž nadpad islamistiskich teroristow na hudźbny festiwal Nova zwobraznja. Před Braniborskimi wrotami w Berlinje su mjena wšěch woporow předčitali. Na naměsće Bebela w stolicy zarjaduja dźensa wječor wopomnjensku stražu.

7. oktobra 2023 běchu terorisća radikalno-islamistiskeje Hamas najhórši masaker na Židach po Druhej swětowej wójnje skućili. Něhdźe 1 200 ludźi su při tym morili a wjace hač 250 do Gazaskeho pasma zawlekli. Jeničce na festiwalu ­Nova morichu wjace hač 400 wopytowarjow. Stat Israel reagowaše z masiwnym wojerskimi nadpadami na Gazaske pasmo a je tam 60 000 Palestinjanow morił.

Wonkowny minister Johann Wadephul na diplomatiskej misiji Gazy dla

Tel Aviv (dpa/SN). Wonkowny minister Johann Wadephul poskićuje Israelej a Palestinjanam wobšěrnu pomoc Němskeje při přesadźenju měroweho plana za Gazaske pasmo. Tute bě prezident USA Donald Trump namjetował. „Jako mjezynarodnje prašany partner w naležnosćach humanitarneje pomocy, stabilizowanja a noweho natwara móžemy něštožkuli poskićić“, rjekny politikar CDU w Tel Avivje po zetkanju ze swojim kolegu w zastojnstwje Gideonom Saarom a po rozmołwje z přiwuznymi israelskich zastajencow w rukach Hamas.

Israelscy a arabscy rozmołwni partnerojo kładu wulku wažnosć na to, zo so Němska „w tutej hodźinje diplomatije“ sylnje zasadźuje, Wadephul rjekny. Němska je „samozrozumliwje zwólniwa, a chce so angažować a swój podźěl přinošować“. Saar bě Wadephula do swojeho priwatneho domu njedaloko Tel Aviva přeprosył.

Wěšće wy, što su „słowjanske hody“ a „słowjanske jutry“, pěstujeće „swjedźeń zawróta słónca z chodojtypalenjom“ jako słowjanski nałožk? Jeli nic, móžeće do słowjanskeho hrodźišća putnikować, hdźež Dawid Chmelík nowe kulturne žiwjenje Słowjanow w Němskej wozrodźa. To w interviewje z regionalnej nowinu wobkrući. Kak dołho budźe jeho putniske městno wobstać, pak jasne njeje. Dopominaće so na jeho „europski projekt Lusatia Glow“, nowinske konferency ze Serbskim sejmom, wustup z britiskej prawniskej kencliju we wojowanju za „indigeny lud“ Serbow? Haj wšak, tež ja sym rady z tutym zajimawym čłowjekom bjesadował, tola nažel njejsmy jako nowinarjo konkretnu substancu za gigantiskimi wizijemi spóznawali, kotrež je ze Serbskim sejmom wupjekł, doniž ­njejstaj so dźěliłoj. Nětko so najskerje dalši pucher puknje, štož je drje škoda. Přiwšěm je wuraz wěrnosće, zo nam nowi „Jězu­sojo“ njepomhaja, kotřiž porno njemu raj na zemi lubja. Marcel Brauman

Zhorjelc (AK/SN). Gerharta Hauptmannowe dźiwadło w Zhorjelcu dospołnje ponowja. Tole su radźićeljo Zhorjelskeho wokrjesneho sejmika minjeny tydźeń wobzamknyli. Nimo toho ponowja centrum za dźiwadłowu pedagogiku Apollo w Zhorjelcu. Stare nakładne dwórnišćo słuži dźiwadłu nachwilnje jako přechodne hrajnišćo.

Dźiwadło dyrbja po wjele lětach dźěła modernizować, krajny rada dr. Stephan Meyer (CDU) rozłoži. Mjez druhim trjebaja modernu techniku, wohnjoškit a bjezbarjernosć. Diskusija wo ponowjenju saha hač do časa do katastrofy zapławjenja wróćo, Meyer rozłoži. W nowembru 2022 bě defekt wěstotneho systema awtomatiski hašenski system aktiwizował. Na to wukidny so 18 000 litrow wody na jewišćowu techniku, swětłomjetaki, zwukowu připrawu a elektriku. Wšo to dyrbja nětko ponowić. Historisku techniku za zběhanje zawěška z lěta 1925 dyrbja tohorunja modernizować – wšitko pod krutym dohladom škitarjow pomnika.

„Apollo“ – wažne městno dźěćaceho a młodźinskeho dźěła, je tohorunja dodźeržane. Tam ponowja jewišćowu techniku. Nimo toho zhotowja probowej rumnosći a bydlenje za hosći.